كەشە، 27 اقپاننان باستاپ ەلىمىزدىڭ بارلىق كينوتەاترلارىندا «بولماعان بالالىق شاق» ءفيلمى كورسەتىلىپ جاتىر. بۇل - ەسىم-سويى ەلگە تانىمال اقىن، قر جازۋشىلار وداعىنىڭ مۇشەسى، «دارىن» جاستار سىيلىعىنىڭ يەگەرى اقبەرەن ەلگەزەكتىڭ ومىرباياندىق بەستسەللەرى.

ءفيلمنىڭ پرەمەراسى الماتى جانە استانا قالالارىندا ءوتتى. درامالىق ءفيلمنىڭ باس پروديۋسەرى اۆتوردىڭ ءوزى – اقبەرەن ەلگەزەك، رەجيسسەرى – ايدىن ساحامان، ستسەناريىن جازعان – ەفرات ءشارىپوۆ.

قازىرگە دەيىن فيلم كينو سالاسىنىڭ ماماندارىنىڭ، ونەر مايتالماندارىنىڭ وڭ باعاسىن الىپ ۇلگەردى. ءفيلمدى كورۋگە بارعان كورەرمەندەر دە الەۋمەتتىك جەلىلەردە فيلمنەن العان اسەرلەرىن جازىپ، بولىسۋدە.

دەسە دە سوڭعى كۇندەرى ورىنسىز قارالاعان اقپاراتتىق شابۋىلدارعا ۇشىراعان اقىن ءارى باسپاگەر اقبەرەن ەلگەزەكتى بۇركەنشەك ات جامىلعان بىرەۋلەر كولدەنەڭ تابىس تاۋىپ وتىر دەپ كۇستانالاپ باققان بولاتىن. الگى عايباتتاۋلارعا بايلانىستى اقبەرەن ەلگەزەك دەر كەزىندە جاۋاپ قايىرىپ، الەمجەلىدە جاريالاعان بولاتىن.

اقىننىڭ جارى دينا ەلگەزەك تە الەۋمەتتىك جەلىدەگى جەكە پاراقشاسىندا وزدەرى تۋرالى تاعى ءبىر نەگىزسىز اڭگىمەنىڭ باستالعانىن جازدى. ءبىز دينا حانىمنىڭ جازباسىن وقىرمان قاۋىمعا ۇسىنعاندى ءجون كوردىك:

دينا ەلگەزەك:

– بىزگە جاسالعان اقپاراتتىق شابۋىلدىڭ ارتىندا – مۇرات نۇرتىلەۋ تۇر دەگەن اقپار تاراپتى. اقبەرەن ەكەۋمىز ارينە بۇل جالعان اقپارعا ابدەن كۇلىپ الدىق…

ساياسي بەلسەندىلەرگە جالا جابۋدىڭ ءتۇرلى ايلا-امالدارىن ابدەن مەڭگەرىپ، «ونەر» دەڭگەيىنە جەتكىزگەن الگىلەر ايەلىنىڭ اۋىزىن جاپتىرۋ ءۇشىن كۇيەۋىن ماسقارالاپ جەكسۇرىن ەتسەك، «دينا ەلگەزەكتى سىندىرۋ وپەراتسياسى ءساتتى اياقتالادى» دەپ توپشىلادى.

بىراق 30 جىل بويى ازاماتتىق قوعام وكىلدەرىنە جاسالعان نەبىر ارانداتۋ حيكايالارىنا قانىق ءارى «قاڭتاردان» كەيىن تەز ەسەيگەن ءبىزدىڭ قوعامعا مۇنداي وتىرىكتەر وتپەيدى. ۇلتتىڭ ەسەيگەنىن ەسەپكە الماعاندار البەتتە قوعام تاراپىنان ءدال وسىنداي رەاكتسيا كۇتكەن جوق. بۇل دا اللانىڭ بىزگە بەرگەن راقىمى بولار

ەندى اقپارعا كەلەيىك، سىرتقى كۇشتەرمەن سىبايلاس ءھام پرەزيدەنتتىك كرەسلودان دامەلى ارانداتۋشى ادامدار وزدەرىنىڭ بىزگە جاساعان جىمىسقى ارەكەتتەرىن مۇرات نۇرتىلەۋدەن كورىپ، «سترەلكانى» سىرتقى ىستەر مينيسترىنە بۇرا سالىپتى.

قازاق قوعامى مەن اقبەرەن ەكەۋمىزدى اقىماق ساناسا كەرەك. ءبىزدى جالادان قورعاعانسۋدىڭ ارتىندا بىزگە قاتىسى جوق مۇرات نۇرتىلەۋدى قارالاۋدىڭ «قامى» مەن كەزەكتى تاپسىرىستىڭ ءيىسى مۇڭكىپ-اق تۇر.

اينالىپ كەتەيىندەر، بىزگە جالا جاۋىپ جۇرگەندەردىڭ كىم ەكەنىن بىلەمىز. ول ادامنىڭ پرەزيدەنتتىكتەن دامەلى ەكەنىنەن دە سەزەمىز. پرەزيدەنتتىككە ۇمىتكەر بولۋى مۇمكىن (وپپوزيتسيا تاراپىنان دا) قازاقتىڭ جىگىتتەرى تۋرالى سىپسىڭ وسەك تاراتىپ، قالاي تۇقىرتىپ جۇرگەنىنەن دە حاباردارمىز.

الەمدىك ساياسي احۋال ۋشىعىپ تۇرعان ۋاقىتتا ۇلتتىڭ ازاماتتارىن بىرىكتىرىپ، مەملەكەتىمىزدىڭ ىرگەسىن بەكىتە ءتۇسىپ، كوزىمىزدىڭ قاراشىعى تاۋەلسىزدىگىمىزگە قورعان بولۋدىڭ ورنىنا، ەل ازاماتتارىن ءبىر-بىرىنە ايداپ سالىپ، ەلدىڭ ىشىنەن ىرىتكى سالىپ ءجۇرۋ نەندەي ۇيات تىرلىك دەسەڭىزشى.

وتە ۇساق، وتە ساسىق، وتە جىمىسكى ارەكەتتەر. ماسشتاب جوق، ءبىلىم جوق، ساياسي ساليحالىلىق جوق. تەك قانا قاراقان باستىڭ قامى. مۇنىڭ ءوزى ءبىزدىڭ كەيبىر جىگىتتەردىڭ بويىندا مەملەكەتشىلدىك سانا قالىپتاسپاعانىن بىلدىرەدى… مەملەكەتتىڭ تاعدىرىن الگىندەي ارانداتۋشىعا سەنىپ تاپسىرۋدىڭ ءوزى قاۋىپتى عوي… ءىرى جۇرسەڭدەرشى، - دەپ اياقتادى ول جازباسىن.

سونىمەن، الەۋمەتتىك جەلىدە جاريالانىپ جاتقان «اقپاراتتىق شابۋىل» كىمگە باعىتتالعان؟ اقبەرەن مەن دينا ەلگەزەكتەر وتباسىنىڭ «بولماعان بالالىق شاق» كينوپرەمەراسىنا باعىتتالعان شابۋىل ما، الدە مينيستر مۇرات نۇرتىلەۋدى اياقتان شالۋدىڭ امالى ما؟

Abai.kz