بۇگىن ۇلتتىق اكادەميالىق كىتاپحانانىڭ فاريزا وڭعارسىنوۆا زالىندا «ۇلتتىق سپورت تۇرلەرى مەن مادەنيەتى اكادەمياسى» قۇرىلعانى حابارلاندى. ونى «ناۋرىزىم – نۇرلى ىرىسىم» مەرەكەلىك ءىس-شاراسى اياسىندا وتكەن جيىندا بەلگىلى كۇش مادەنيەتىن زەرتتەۋشى، جوبا قۇرىلتايشىسى ابىلايحان قالنازاروۆ ءمالىم ەتتى.  

«ۇلتتىق سپورت تۇرلەرى مەن مادەنيەتى اكادەمياسى – قازاق حالقىنىڭ بارلىق ءداستۇرلى سپورتىن ساقتاۋ، دامىتۋ جانە حالىقارالىق دەڭگەيدە تانىمال ەتۋگە باعىتتالعان يننوۆاتسيالىق ورتالىق. بۇل اكادەميا ۇلتتىق سپورت تۇرلەرىنىڭ فيزيكالىق، رۋحاني-مادەني جانە زياتكەرلىك قۇندىلىقتارىن زەرتتەپ زەردەلەپ، بولاشاق ۇرپاققا جەتكىزۋدى جانە سپورت ارقىلى ەلدىك رۋحتى كۇشەيتۋدى كوزدەيدى»، – دەپ اتاپ ءوتتى ا.قالنازاروۆ. 

ونىڭ بايانداۋىنشا، اكادەميا ميسسياسى – قازاق حالقىنىڭ ءداستۇرلى سپورت تۇرلەرىن جاڭعىرتۋ جانە ولاردى ەلدىك-الەمدىك ماسشتابتاردا ىلگەرىلەتۋ ارقىلى ۇلتتىق مۇرانىڭ سپورتتىق-مادەني دامۋىنا ۇلەس قوسۋ. 

ماقسات-مىندەتتەرى: 

- ۇلتتىق سپورت تۇرلەرىن كاسىبي دەڭگەيدە دامىتىپ، جاتتىقتىرۋشىلار مەن سپورتشىلاردى دايىنداۋ. 

- ۇلتتىق سپورت تۇرلەرىنىڭ بىرەگەي تەحنيكاسى مەن ادىستەرىن عىلىمي نەگىزدە زەرتتەۋ. 

- جاستار اراسىندا سالاۋاتتى ءومىر سالتىن ناسيحاتتاۋ جانە ۇلتتىق قۇندىلىقتاردى دارىپتەۋ. 

- ءداستۇرلى سپورت تۇرلەرىن حالىقارالىق دەڭگەيدە تانىمال ەتۋ. 

- ۇلتتىق سپورت پەن مادەنيەتتى بىرىكتىرىپ، ينتەگراتسيالىق ءىس-شارالار ۇيىمداستىرۋ. 

جۇمىستىق مىندەتتەرى: 

- زەرتتەۋشىلىك. 

- ۇيىمداستىرۋشىلىق. 

- يدەولوگيالىق.  

- ناسيحات. 

- وقىتۋ. 

- باۋلۋ.  

ال اكادەميا قىزمەتىنىڭ باعىتتارى نەگىزگى ۇلتتىق سپورت تۇرلەرى بويىنشا كەشەندى باعدارلامالار ازىرلەپ، ولاردىڭ ارقايسىسىن دەربەس دامىتۋدان كورىنبەك. مىسالى، قازاق كۇرەسى بويىنشا كاسىبي بالۋانداردى دايىنداۋ، وبلىستىق، رەسپۋبليكالىق جانە حالىقارالىق تۋرنيرلەر وتكىزۋ، قازاق كۇرەسىنىڭ ەرەجەلەرىن حالىقارالىق ستاندارتتارعا بەيىمدەۋ بولماقشى. وسى قاتاردا كوكپار، بايگە، جامبى اتۋ، اۋدارىسپاق، تەڭگە ءىلۋ، ساداق اتۋ، قۇسبەگىلىك، توعىزقۇمالاق، اسىق اتۋ سىندى سپورت تۇرلەرى بار.  

ابىلايحان مامىرايحانۇلىنىڭ ايتۋىنشا، ءبىلىم بەرۋ جانە عىلىمي-زەرتتەۋ باعىتى باستى باسىمدىق. ءبىلىم بەرۋدە ۇلتتىق سپورت تۇرلەرى بويىنشا بالالار، جاستار جانە كاسىبي سپورتشىلارعا ارنالعان وقۋ باعدارلامالارىن ازىرلەۋ، جاتتىقتىرۋشىلار مەن ادىسكەرلەردى وقىتۋ كوزدەلەدى. عىلىمي زەرتتەۋدە ۇلتتىق سپورت تۇرلەرىنىڭ تەحنيكالىق جانە تاريحي ەرەكشەلىكتەرىن، فيزيكالىق جانە پسيحولوگيالىق ارتىقشىلىقتارىن زەرتتەۋ، قازاق حالقىنىڭ سپورتتىق تاريحىنا ارنالعان عىلىمي ەڭبەكتەر جاريالاۋعا باسا ءمان بەرىلمەك. 

سونداي-اق ول قازىردىڭ وزىندە ءوز اۆتورلىعىندا بۇعان دەيىن جارىق كورگەن «بالۋان تاس» قوستومدىعىنىڭ ءۇشىنشى تومى، وسى تومداردان وربىگەن يدەولوگيالىق «بالۋاندار الەمى» كىتابى، كوكپار تۋرالى ءتورت تومدىق جانە «قازاق كۇرەسىنىڭ» بالالارعا ارنالعان وقۋلىعى مەن پالۋاندىق پەن باتىرلىقتى ناسيحاتتايتىن وقۋشىلارعا ارنالعان 3 كىتاپتىڭ ءازىر تۇرعانىن باياندادى.  

«ازىرشە اكادەميا «Silteme.kz پورتالى جانىنان قۇرىلىپ وتىر. الداعى ۋاقىتتا ءبىر توپ مامانداردىڭ باسىن قوسىپ، فوند تۇرىندە ارەكەت ەتپەكپىز. مۇنداعى فيشكا سول، مادەنيەت جانە تۋريزم ءىس-شارالارى دا نازاردا بولادى. ۇلتتىق سپورت پەن مادەنيەتتىڭ سينتەزىن كورسەتەتىن ەتنوفەستيۆالدەر ۇيىمداستىرۋ، ناۋرىز جانە باسقا ۇلتتىق مەرەكەلەردە ارنايى سپورتتىق ءىس-شارالار وتكىزۋ جوسپاردا بار. قازاقتىڭ ءداستۇرلى ءومىر سالتىن كورسەتەتىن ەتنواۋىل قۇرۋ، تۋريستەرگە ارنالعان ينتەراكتيۆتى باعدارلامالار ۇيىمداستىرۋدى دا كوزدەۋدەمىز. عىلىمي-زەرتتەۋ ورتالىقتارى، سپورت كەشەندەرى ماسەلەلەرىنە دە دەن قويامىز. بۇل جاعىنان بىرقاتار ۇلتتىق سپورت فەدەراتسيالارىمەن الدىن الا ىنتىماقتاستىق جونىندە اڭگىمەلەر جۇرگىزىلدى»، – دەپ تۇيىندەدى ءسوزىن ا.قالنازاروۆ 

ايتا كەتەيىك، اتالمىش ءىس-شاراعا بىرقاتار تانىمال تۇلعالار جانە ستۋدەنتتەر مەن مەكتەپ وقۋشىلارى قاتىستى. بۇل ۇلتتىق اكادەميالىق كىتاپحانانىڭ ناۋرىز مەرەكەسىنە وراي بەلگىلەنگەن «شاڭىراق» كۇنىنىڭ دە مەرەيىن اسىرۋعا باعىتتالعان وتىرىستاردىڭ ءبىرى بولاتىن.  

جيىن سوڭىندا كەلۋشىلەرگە ناۋرىز كوجە بەرىلىپ، باۋىرساقتار تاراتىلدى جانە كوپشىلىك بولىپ ەستەلىككە فوتوعا ءتۇستى.  

Abai.kz