داڭعازا جىلدار ءالى بىتپەگەن بە؟! قارتايىپ، بارار جەر، باسار تاۋى قالماعانداردىڭ سوڭعى باراتىن ەلى — قازاقستان ەكەن... ەندى دجەنيفەر لوپەس كەلمەك...

2008 جىلى استانا قالاسىنىڭ 10 جىلدىعى تويلانعاندا قازاق مادەنيەتىنىڭ ءۇنى وشكەندەي بولدى. شەنەۋنىكتەر ساحناداعى جۇلدىزدىق ساتتەرى 1990 جىلدارى ءوتىپ كەتكەن امەريكالىق ءانشى ۋيتني حيۋستوندى شاقىرعان. بۇل ءانشى 2005 جىلى عانا ناشاعا بايلانىپ قالىپ، ەمحانادان ەم الىپ شىققان ەدى.
سوعان قاراماستان 2008 جىلى ماڭگۇرت شەنەۋنىكتەر ونى استانانىڭ تورىندە شىرقاتتى. ىشىمدىك پەن ەسىرتكىدەن سول كۇيى ەسىن جيا الماعان حيۋستون 2012 جىلى اق ولىمگە جەتە الماي، ابىرويسىز جاعدايدا دۇنيەدەن وزدى. قازاقتىڭ ماڭدايالدى انشىلەرى وعان تولەنگەن گونوراردىڭ كولەمىن ءوڭى تۇگىلى تۇسىندە دە كورمەدى. ول Radisson Hotel Astana قوناق ۇيىنە تۇسكەندە بولمەسىنىڭ ءبىر كۇندىك اقىسى 4 مىڭ دوللار بولاتىن. ۇكىمەت ءۇيىنىڭ ءبىر بولمەسىن بوساتىپ، حيۋستونعا بولا ارنايى گريمەر بولمەسىن جاساقتاعان. استانادا ءجۇرىپ تۇرۋعا ارنايى ليمۋزين ءبولىپ، پروفەسسيونال كۇزەتشىلەردى قاسىنا قوسىپ قويدى. كولىگى قالا ىشىندە كەدەرگىسىز ءجۇرۋ ءۇشىن پوليتسيا كولىگى ىلەسىپ ءجۇردى. ونىڭ كونتسەرتىنە نۇرسۇلتان نازارباەۆ پەن سارا الپىسقىزى جانە ۇكىمەتتىڭ بۇكىل جاندايشابى بوتا-تايلاق، باۋ-شارباعىمەن شۇبىرىپ بارىپ، داۋىسىنىڭ اجارى قاشقان تانىمال ءانشىنىڭ ونەرىن تاماشالادى.

بۇلاردىڭ قانشالىقتى مارگينالدانىپ، ءوز ۇلتىنىڭ مادەني جاۋھارلارىنان قانشالىقتى جىراق كەتكەنىن وسىلاي سالىستىرۋ ارقىلى بىلۋگە بولادى. مىسالى، ەركىن شۇكىمان، الماس المات، سەرجان شاكىرات، بەرىك سايماعانبەت، رامازان ستامعازيەۆ، قايرات بايبوسىنوۆ سياقتى ءداستۇرلى ونەردىڭ مايتالمان ءانشى، جىرشى، كۇيشىلەرى وسىلاي ونەر كورسەتسە ساياسي ەليتانىڭ نەشە پايىزى قاتىسۋى مۇمكىن؟

2008 جىلعى استانا كۇنىنە ۋيتني حيۋستوننان بولەك، 66 جاستاعى بريتان ءانشىسى پول ماككارتني كەلدى. ءوزىڭىز بىلەتىندەي، ول - داۋرەنى 1960-70 جىلدارى دۇرىلدەگەن اتاقتى «Beatles» توبىنىڭ ەكسپوناتقا اينالعان ءانشىسى بولاتىن. بۇل كەزدە مادەنيەت ءمينيسترى ەرمۇحامبەت ەرتىسباەۆ ەدى. 2009 جىلدان باستاپ مۇحتار قۇل-مۇحاممەدتىڭ ءداۋىرى باستالدى.

2009 جىلى استانانىڭ 11 جىلدىعىن تويلاعاندا 67 جاسار يسپاندىق وپەرا ءانشىسى پلاسيدو دومينگونى شاقىردى پلاسيدونىڭ تۇراقتى گونورارى — 300 مىڭ دوللار ەكەن ەندى ونى الدىرۋ، جاتقىزۋ، ىشكىزىپ-جەگىزۋ شىعىندارىن قوسساڭىز ەڭبەكاقىسى جارتى ميلليونعا جۋىقتاۋى مۇمكىن. پلاسيدودان بولەك ارگەنتينالىق وپەرا ءانشىسى ۆيردجينا تولا، امەريكالىق ديريجەر يۋدجين كون، كانادا ءانشىسى لارا فابيان، رەسەيلىك ءانشى يگور كرۋتوي، لايما ۆايكۋلە كەلدى. يگور كرۋتوي مەن لايما ۆايكۋلە بۇل كەزدە 55 جاسقا كەلگەن ەدى. يگور كرۋتويدىڭ تۇراقتى گونورارى — 75 مىڭ دوللار، لايما ۆايكۋلە — 55 مىڭ دوللاردان تومەن سوماعا كەلمەيدى، ال لارا فابياننىڭ ساحنادان ءبىر جىلت ەتكەنى — 150 مىڭ دوللارعا تۇسەدى.

ءدال وسى كەزەڭدە قازاقتىڭ ماڭداي الدى ءداستۇرلى انشىلەرى مۇنداي ساحنانى تۇسىندە كورەتىن. باعى جانىپ، ءبىر-ەكەۋى ۇكىمەتتىك كونتسەرتكە شىعا قالسا، 1000 دوللاردىڭ ماڭايىندا عانا جالاقى الاتىن. تالانتى تاسىپ تۇرسا دا، اتاعى جەتىسپەگەندەرى اعايىننىڭ توي-تومالاعىندا 50-60 مىڭ تەڭگەگە ونەر كورسەتۋگە ءماجبۇر بولدى. بۇدان تومەندەرى شىلدەحانا، قونىس توي، قۇدالىق سياقتى ۇساق-تۇيەك جيىنداردا ءان سالىپ، 20-30 مىڭ تەڭگەنى قاناعات تۇتتى. ونەرىنە شەشەندىك سەرىك بولعاندارى تويدا اسابا بولىپ، ريزىعىن ءسال-ءپال ارتتىردى.

ولار كەيدە وسى نىعمەتىنەن دە ايرىلىپ قالاتىن ەدى. دومبىراسىن ارقالاپ، باسقا قالاعا ۇشقاندا قازاقستاننىڭ اۋە كومپانيالارى دومبىرانى ۇشاقتىڭ سالونىنا كىرگىزبەيدى. ونى «باگاجعا وتكىز»، دەپ تالاپ قوياتىن. ولار امالسىز تالاپقا كونەدى. بىراق دومبىرا باگاج بولىمىنەن قيراعان كۇيىندە يەسىنە ورالاتىن. تاۋەلسىز وتىز جىل وتسە دە، ۇكىمەت پەن مينيسترلىك دومبىرانى قورعايتىن ءتيىمدى قاۋلى شىعارا المادى. ۇشقان سايىن دومبىراسى قيراعان انشىلەر بارار جەر، باسار تاۋ تاپپاي، بۇكىل مۇڭ-مۇقتاجىن الەۋمەتتىك جەلىگە عانا جازادى.

2010 جىلى استانانىڭ 12 جىلدىعى تويلاندى. وعان يتاليانىڭ وپەرا ءانشىسى، 52 جاستاعى اندرەا بوچەللي كەلدى. بوچەلليدىڭ گونورارى — 200 مىڭ دوللار. ودان بولەك دجاز انشىلەرى نيكول جانە كيمبەرلي دەۆيستەر كەلدى. رەسەيدەن وپەرا ءانشىسى دميتري حۆوروستوۆسكي، يگور كرۋتوي، سەرگەي لازارەۆ، پيانيست سەرگەي ماتسۋەۆ شاقىرىلدى. جاسى 56-عا كەلگەن ەسترادا ءانشىسى الەكساندر سەروۆ تە استانا تورىندە ءان شىرقادى. سەرگەي بەزرۋكوۆ «حۋليگان» دەپ اتالاتىن سپەكتاكلىن قويۋ ءۇشىن استاناعا ترۋپپاسىمەن شۇبىرىپ كەلدى. امەريكادان ني-يو، رۋمىنيادان «Morandi» توبى كەلدى.
ۇلتتىق نامىستان جۇرداي بولعان شەنەۋنىكتەردىڭ مادەني سالاعا قوسىمشا بەرگەن سوققىسىن مىنا فاكتىگە قاراپ تا بولجاي بەرىڭىز. ءدال سول جىلدارى مادەنيەت مينيسترلىگىندە كۇندىز-ءتۇنى شاپقىلايتىن مەملەكەتتىك قىزمەتكەردىڭ جالاقىسى 35-70 مىڭ تەڭگەنىڭ اراسىندا بولعان. ولاردىڭ كوبى استانادا جەكە پاتەر جالداي الماي، بىرنەشە وتباسى ءبىر پاتەردىڭ ىشىندە بىرىگىپ تۇرۋعا ءماجبۇر ەدى. جەكە وتباسىلىق ءومىر دەگەن كوزدەن بۇلبۇل ۇشتى. ولاردى پاتەرمەن كامتيتىن قىرۋار قارجى، داۋرەنى ءوتىپ كەتكەن شەتەلدىك انشىلەردىڭ ەسەپشوتىنا اۋدارىلىپ جاتتى.

2011 جىلى استانانىڭ 13 جىلدىعىن تويلاعاندا 51 جاسار بريتان ءانشىسى سارا برايتمان كەلدى. ونىمەن بىرگە رەسەيلىك انشىلەر يگور كرۋتوي، تيماتي، كانادالىق لارا فابيان، ءانشى Arash, بريتان ءانشىسى Jay Sean كەلدى. اگاѕh-تىڭ گونورارى — 50 مىڭ دوللار، ال تيماتي — 25 مىڭ دوللار. بۇل مەرەيتويعا رەسەيلىك «گرادۋسى» جانە ۋكراينالىك «Quest Pistols» توپتارى دا كەلدى.

وسى نۇكتەدە ادامسۇيگىشتىك قاسيەتى سۇمدىق دامىپ كەتكەن بىرەۋ تۇرىپ: «ونەرپازدار شەتەلدەن كەلسە نە بوپتى؟ مادەنيەتتە شەكارا جوق. مۋزىكا — جالپىادامزاتتىق قۇندىلىق. قازاقتار دا الەمدىك برەندتى تىڭداپ، دەڭگەيىن وسىرسە نە بوپتى؟ پلاسيدو، بوچەللي، سارا برايتمان دەگەن انشىلەر الەمدىك دەڭگەيدەگى جۇلدىزدار. ولاردىڭ قازاقستان ساحناسىندا ولەڭ ايتۋىنىڭ ءوزى ۇلكەن ابىروي»،- دەسە، نە دەپ جاۋاپ بەرۋگە بولادى؟

ەندى وبەكتيۆتى جاۋاپتى تىڭداڭىز. ولاردىڭ بيلەتىنىڭ الدى — 150 مىڭ تەڭگە (ول كەزدە 1000 دوللار شاماسىندا), سوڭى 30 مىڭ تەڭگە (200 دوللار) بولاتىن. قاراپايىم ادام تۇرماق ورتا كلاستى قۇرايتىن كوزى اشىق قازاقتىڭ ءوزى مۇنداي كونتسەرتكە بارا المايتىن. ءبىر بيلەتتىڭ قۇنى ونىڭ ءبىر ايلىق جالاقىسى بولاتىن. سوندىقتان شەتەلدىك جۇلدىزداردىڭ ونەرىن ات توبەلىندەي مارگينالدار عانا تاماشالاي الادى.

ءتىپتى وسى كونتسەرتكە قاتىسقان مودەرن شونجارلار، ولاردىڭ ونەرىنەن قانداي دا ءبىر ەستەتيكالىق ءلاززات العانى كۇماندى. بۇل داڭق پەن داڭعازانىڭ قۇربانى بولعان قارابايىر شەنەۋنىكتەن قۇرالعان كادىمگى توبىر بولاتىن. ال مەملەكەتتىك مەرەكەنى ۇلتتىق ناقىشتا تويلاعاندى ۇناتاتىن بۇقارا حالىق، ولاردىڭ ونەرىن زالدا وتىرىپ تاماشالاسا دا قۇلاعىنىڭ قۇرىشى قانىپ، كەۋدەسىن ماقتانىش سەزىم كەرنەمەيتىن. داڭق پەن داڭعازانىڭ استارىندا مەملەكەتتىڭ اقشاسىن ۇرلاۋ دەگەن ءبىر عانا موتيۆاتسيا جاتاتىن.

قۇرمەتتى وقىرمان، ءسىزدى وسى جەردە سابىرعا شاقىرامىز. سەبەبى جوعارىدا باياندالعان دەرەكتەردە ءسال دە بولسىن ناعىز ونەردىڭ ءيىسى شىعاتىن. مادەنيەت سالاسىنىڭ ناداندانعانى سونشا، 2012 جىلدان باستاپ بۇل تالعامعا دا زار بوپ قالدىق. ەندى ەشقانداي سالماعى جوق، ونەرىن سىڭعىرلاعان تازا تابيعي داۋىسىمەن كورسەتە المايتىن، ونىڭ ورنىن ەسترادانىڭ حالتۋراسىمەن جابۋعا تىرىساتىن ەسترادا جۇلدىزدارى باستى.
ءدال وسى جىلى مادەنيەت ءمينيسترى بولىپ مۇحتار قۇل-مۇحاممەدتىڭ ورنىنا دارحان مىڭباي تاعايىندالىپ ەدى. باسشىنىڭ تالعامىنا قاراي استاناعا كەلەتىن جۇلدىزداردىڭ دا ساپاسى وزگەردى.

2012 جىلى استانانىڭ 14 جىلدىعىن وتكىزگەندە كەللي روۋلەند دەگەن امەريكالىق ءانشىنى شاقىردى. ونىڭ گونورارى — 150 مىڭ دوللار. رەسەيدەن نيۋشا، تيماتي، GeeGun, يۆان دورن، «سەرەبرو» توبى جانە مولدوۆالىق ءانشى Dan Balan شاقىرىلدى.

2013 جىلى استانانىڭ 15 جىلدىعىن وتكىزگەندە امەريكالىق پوپ ءانشى نيكول شەرزينگەردى شاقىردى. ونىڭ گونورارى — 350 مىڭ دوللار. 1990 مەن 2000 جىلدارى داۋرەنى ءوتىپ كەتكەن ديما بيلان، اننا سەمەنوۆيچ، ميتيا فومين، يرينا دۋبتسوۆا، ساتي كازانوۆا، ستاس كوستيۋشكين، يۋليا ساۆيچەۆا، ۆيكتوريا داينەكو، الەكساندر رەۆۆا جانە «گليۋكوزا»،«باند'ەروس»، «پيتستسا»، «فابريكا»، دجيگان، «M-BAND»، «بيانكا»، «ديسكوتەكا اۆاريا»، «گرادۋسى»، SWANKY TUNES سىندى رەسەيلىك انشىلەر مەن توپتار كەلدى. دانيادان توماس Nevergreen, ۋكراينادان دومينيك دجوكەر سىندى انشىلەر شۇبىردى.
2014 جىلى ارىستانبەك مۇحامەديۇلى مينيستر بولىپ تاعايىندالدى. ءمينيستردىڭ تالعامىنا قاراي كەلۋشى قوناقتاردىڭ سانى مەن ساپاسى تاعى دا وزگەرىپ شىعا كەلدى. ونى تومەندەگى تىزىمگە قاراپ، ءوزىڭىز پايىمداي بەرىڭىز.
2014 جىلى استانا قالاسىنىڭ 16 جىلدىعىندا امەريكالىق رەپەر اkوn-دى (ەيكون) شاقىردى. ونىڭ گونورارى — 200 مىڭ دوللار. رەسەيدەن پولينا گاگارينا، «پيتستسا» توبى، بريتاندىق «Blue» توبى كەلگەن.

2015 جىلى استانانىڭ 17 جىلدىعىن تويلاعاندا رەسەيلىك «سپلين»، «ۋماتۋرمان» روك توپتارى كەلىپ ونەر كورسەتتى.

2016 جىلى استانانىڭ 18 جىلدىق مەرەيتويىنا امەريكالىق «Broadway band» مۋزىكالىق توبى كەلدى.

بۇل جولى شەتەلدەن مانەرلەپ سىرعاناۋشىلاردى شاقىرىپ، «سنەجنىي كورول» قويىلىمىن قويدى. جاڭا مينيستر ەسكى نومىرلەردەن شارشاسا كەرەك، كرەاتيۆتىڭ كوكەسىن ويلاپ كەلدى. ول ەندى انشىلەرگە سپورتشىلاردى قوسىپ شاقىراتىن «ونەر» ويلاپ تاپتى. بالكىم، ەكى مينيسترلىك بىرىككەننەن بولار (بۇل كەزدە مادەنيەت جانە سپورت مينيسترلىگى دەپ اتالاتىن).
قويىلىمدى قويۋعا رەسەيدەن ەۆگەني پليۋششەنكو، يرينا سلۋتسكايا، دميتري سۋحانوۆ، چەحيادان توماش ۆەرنەر، فرانتسيادان بريان جۋبەر، انگليادان فيونا زالدۋز، ۋكراينادان سەرگەي ياكيمەنكو، يرينا ۋسەنكو سياقتى مانەرلەپ سىرعاناۋشىلاردى تارتتى.

2017 جىلى استانا قالاسىنىڭ 19 جىلدىعىن تويلاعاندا «ششەلكۋنچيك» قويىلىمىن قويدى. وعان رەسەيدەن تاعى دا ەۆگەني پليۋششەنكو، يرينا سلۋتسكايا، نيكيتا ميحايلوۆ، اناستاسيا مارتيۋشەۆا، نودار مايسۋرادزە، كانادان ەمانۋەل سانديۋ سىندى سپورتشىلار كەلدى.

مۇنشاما شۇبىرعان سپورتشىلاردى، انشىلەرمەن ىمداستىرىپ-جىمداستىرىپ، مۇزايدىن ساحناسىندا جارقىراتىپ كورسەتۋ ءۇش-ءتورت كۇننىڭ شارۋاسى ەمەس. ولاردىڭ جابىلىپ ءبىر ءنومىر قويۋىنىڭ ءوزى قىرۋار قارجى مەن ەسەپسىز شىعىندى قاجەت ەتەدى.

«كورەسىڭدى كورمەي كورگە كىرمەيسىڭ» دەگەن ءسوز راس ەكەن. قازاق حالقىنىڭ كورۋگە ءتيىس تاعى ءبىر شەكتەن شىققان داڭعازاسى بار ەكەن. قوتىر اتقا سوقىر ات ىلەسىپ الىپ، ءدال سول جىلى يتاليالىق «لا سكالا» وپەرا تەاترىنىڭ 260 حور ترۋپپاسى تۋرا ءبىر ناعاشى اتاسىنىڭ ۇيىنە كەلگەندەي استاناعا تۇگەل ۇشىپ كەلدى. مۇنداي اس تا توك راحات ءومىردى ولار يتاليادا دا كورمەگەن شىعار.
بىراق بۇلاردىڭ ءوزى تۇك بولماي قالدى. «ءبىر اپام ءبىر اپامنان وتكەن سوراقى» دەمەكشى، سايقىمازاقتىقپەن داڭقى شىققان، رەسەيلىك «Comedy Club» ءازىل-شوۋ توبىنىڭ ءتىلى مەن جاعىنا سۇيەنگەن جىلماقاي جىگىتتەرىن جيناپ الدى.

كانادادان «تسيرك ديۋ سولەي» تسيركىن بۇكىل ۇجىمىمەن الدىردى. اۋەلدە ءجاسوسپىرىم بالالاردى تاڭعالدىرىپ، تامساندىرۋ ءۇشىن ارنالعان وسى ءبىر ونەردىڭ جەڭىلتەكتەۋ تۇرىنە قازاقستان رەسپۋبليكاسىنىڭ ساياسي ەليتاسى بالادان بەتەر ءماز بولدى.

توي مۇنىمەن توقتامادى. ءبىزدىڭ ينفانتيليست شەنەۋنىكتەردىڭ قۇمارى قانباعان ەكەن. ولار بەينە ءبىر سوعىس كەزىندە ويىنعا قۇمارى قانباي قالعان كەمباعال ۇرپاق قۇساپ، جارتىلاي ونەرىمەن، جارتىلاي جارنامانىڭ كۇشىمەن جۇلدىز اتانعان ورتاڭقول ونەرپازدىڭ ءبارىن استاناعا الدىرا بەردى.

امەريكالىق Limp Bizkit روك گرۋپپاسى، يتاليالىق 58 جاسار ەروس رامازوتتي، تايۆان ءانشىسى تەرري لين، اعىلشىندىق سوفي ەليس بەكستور، رەسەيلىك كريستينا ورباكايتە، پولينا گاگارينا، ەگور كريد، تيماتي، «موت»، «L'One»، «كريستينا ءЅى»،«بي-2» ي «مۋمي ترولل» توپتارى ءتوردى بەرمەس قۇرمەتتى قوناققا اينالدى.

ەگەر اكەسىنەن قالعان اقشا بولسا، تويىنا كىمدى شاقىرسا دا ءوزى بىلەدى. بىراق مەملەكەتتىك مەرەكەگە ۇلتتىق قوردىڭ اقشاسىن شاشىپ، ازعانتاي توپتىڭ كوڭىلىن كوتەرۋ كادىمگىدەي قىلمىس.

2018 جىلى استانا قالاسىنىڭ 20 جىلدىعىنا امەريكالىق وپەرا ءانشىسى ەندجەل ءبلۋدى شاقىردى. كورەيلىك «Boyfriend» توبى كەلدى. جانە گولليۆۋد جۇلدىزى ستيۆەن سيگالدى شاقىردى. رەسەيدەن 1980 جىلى قۇرىلعان «فورۆارد» توبى مەن 1989 جىلى قۇرىلعان «نا-نا» توبى كەلدى. ودان بولەك «كگەس»، «كارانداش»، «پيتستسا» سياقتى رەسەيلىك توپتار دا بولدى.

قازاق مادەنيەتىنىڭ باسىنا سور بوپ جابىسقان وسى «استانا كۇنى» قازاق حالقىن ارتىق-كەمى جوق ءدال 10 جىل دىڭكەلەتتى. بۇل كۇنگى مال شاشۋدىڭ تاعى ءبىر استارلى سەبەبى بار ەدى. شىلدەنىڭ 6 جۇلدىزىنا بەكىتىلگەن بۇل مەرەكە ن.نازارباەۆتىڭ تۋعان كۇنىنە «كەزدەيسوق» ءدال كەلگەنى قوسىمشا سوققى بولدى.

پاتشانىڭ تۋعان كۇنىن لايىقتى اتاپ ءوتۋ دەگەن ورتاعاسىرلىق تۇسىنىك قازاق مادەنيەتىنىڭ تۇبىنە جەتۋگە ءسال-اق قالدى. قازاق حالقىنا قۇدايدىڭ جانى اشىدى ما، 2019 جىلى وسى مەرەكەنىڭ باستاۋىنا ءبىر اپتا قالعاندا، ياعني 24 ماۋسىمدا ارىس قالاسىندا جويقىن اپات بولدى. اۋعان سوعىسىنان بەرى جينالىپ جاتقان اسكەري قويماداعى قيساپسىز بومباعا وت ءتيىپ، بىرنەشە كۇن توقتاۋسىز جارىلدى. قالانىڭ تۇرعىندارى باس ساۋعالاپ، جان-جاققا بوسىپ كەتتى. وسىنداي تراگەديانىڭ قاباتىندا دۇركىرەتىپ تۋعان كۇن اتاپ ءوتۋدىڭ رەتى كەلمەي قالدى.

ال 2020 جىلى قازاققا قۇداي تاعى دا قاراسىپ، الەمدىك پاندەميا بۇرق ەتە قالدى. توي تاعى دا جايىنا قالدى. بىراق سونىڭ وزىندە نامىسسىز شەنەۋنىكتەر، حالىك كوۆيد دەرتىنەن جاپا شەگىپ، شىبىنداي قىرىلىپ جاتقاندا، بىرنەشە وتشاشۋ اتىپ ۇلگەردى.

2021 جىلى پاندەميا تاعى دا مال شاشۋعا مۇمكىندىك بەرمەدى. 2022 جىلى «قاندى قاڭتار» وقيعاسى بولدى دا، پاتشانىڭ باسىنان باعى، استىنان تاعى تايدى. قازاقستان قوعامىنا ۇستەمدىك ورناتقان قارالى كوڭىل كۇي 6 شىلدەنى تاعى دا تويلاتپاي تاستادى.

2008 جىلى ۋيتني ءحيۋستوندى شاقىرىپ باستالعان داڭعازا توي، 2018 جىلى نا-نا توبىمەن «جورعا، جورعا، جورعا، جورعالا» دەگەن انىمەن اياقتالدى. استانا مەرەكەسىنىڭ وسىنداي انمەن ءبىتۋىن جامان ىرىمعا دا بالاۋعا بولادى. قازاق مادەنيەتى تۋرا ماعىناسىندا شەتەلدىك ونەرپازداردىڭ الدىندا قۇرداي جورعالاپ كەتتى. وسى ماعىناسىز مال شاشۋدى شىرقاۋ شەگىنە جەتكىزگەن مادەنيەت ءمينيسترى ا.مۇحامەديۇلىنىڭ ۇستىنەن 2023 جىلى جەمقورلىققا قاتىستى ءىس قوزعالدى. ەكس-مينيستر جۋرناليستەردىڭ: «جاعدايىڭىز قالاي؟» دەگەن سۇراعىنا، قازىر سيزو-دا جاتىپ يوگامەن اينالىسىپ جاتقانىن ايتتى. سول جىلى 22 ماۋسىمدا 8 جىلعا سوتتالدى.

سانجار كەرىمباي

Abai.kz