بۇگىن ەلىمىزدىڭ بارلىق مەكتەپتەرىندە ءبىر مەزگىلدە «ءبىلىمىم - وتانىما» بىرىڭعاي سىنىپ ساعاتى ءوتتى. سىنىپ ساعاتىنىڭ اياسىندا مينيستر بارلىق مەكتەپ وقۋشىلارىن 2024-2025 وقۋ جىلىن تابىستى اياقتاۋلارىمەن قۇتتىقتادى.

بيىلعى وقۋ جىلى تولاعاي تابىستار مەن جارقىن جەتىستىكتەرگە تولى بولدى.

«مەملەكەت باسشىسىنىڭ باستاماسىمەن ەلىمىزدە ءبىر جىل ىشىندە رەكوردتىق كورسەتكىش - 257 جاڭا مەكتەپ اشىلدى. وقۋشىلارىمىز حالىقارالىق ءبىلىم دودالارىندا 362 مەدال يەلەنىپ، ونىڭ 41-ءى — التىن مەدال بولدى. ەل تاريحىندا العاش رەت كوللەدج ستۋدەنتتەرىنەن قۇرالعان قازاقستاننىڭ ۇلتتىق قۇراماسى فرانتسيادا وتكەن 47-ءشى WorldSkills چەمپيوناتىندا زور تابىسقا جەتىپ، 7 مەدالون يەلەندى. مۇنىڭ بارلىعى — وتاندىق ءبىلىم بەرۋ جۇيەسىندەگى جۇيەلى رەفورمالار مەن قاجىرلى ەڭبەكتىڭ ناقتى جەمىسى»، — دەپ اتاپ ءوتتى مينيستر.

ول پەداگوگتەردىڭ جەتىستىكتەرىنە جەكە توقتالدى. بيىل ءبىلىم بەرۋ سالاسىندا العاش رەت بىردەن ەكى پەداگوگ — گۇلجانار نۇرپەيىسوۆا مەن ەلمارا ترايسوۆا «قازاقستاننىڭ ەڭبەك ەرى» اتاعىنا يە بولدى.

«سىزدەر – مەكتەپتىڭ جۇرەگى، ءبىلىم مەن تاربيەنىڭ التىن ارقاۋىسىزدار. اكادەميالىق بىلىممەن قاتار، شاكىرتتەرىڭىزگە ۇلتتىق قۇندىلىقتاردى دارىتىپ، ولاردىڭ سانالى ازامات بولىپ قالىپتاسۋىنا ولشەۋسىز ۇلەس قوسىپ كەلەسىزدەر. سىزدەرگە وسكەلەڭ ۇرپاققا ساپالى ءبىلىم مەن ونەگەلى تاربيە بەرۋدەگى جاناشىرلىقتارىڭىز، ۇستازدىق ميسسياعا دەگەن ادالدىقتارىڭىز ءۇشىن شىنايى ريزاشىلىعىمدى بىلدىرەمىن»، — دەدى عاني بەيسەمباەۆ.

ونىڭ ايتۋىنشا، وسى جىلداعى ماڭىزدى باستامالاردىڭ ءبىرى بالالاردىڭ قۇقىقتارىن قورعاۋ جۇيەسىنىڭ نىعايا ءتۇسۋى. وسى ماقساتتا مەملەكەت بالالاردىڭ ءبىلىم، تاربيە الۋىنا، دامۋىنا جانە ولاردى قورعاۋعا باعىتتالعان ءۇش نەگىزگى زاڭ قابىلدادى.

سونداي-اق مينيستر بارلىق اتا-انالارعا كورسەتكەن قولداۋلارى ءۇشىن العىس ايتىپ، 217 مىڭ مەكتەپ ءبىتىرۋشى مەن 173 مىڭ كوللەدج تۇلەگىنە جارقىن بولاشاق تىلەدى.

Abai.kz