قارجى مونيتورينگ اگەنتتىگى الماتىنىڭ ەكس-اكىمى باۋىرجان بايبەك پەن ونىڭ وتباسىنا قاتىستى قىلمىستىق ءىس قوزعالماعانىن حابارلادى دەپ جازادى Ertenmedia.

بۇعان دەيىن جۋرناليستەر بايبەكتىڭ وتباسى مۇشەلەرىنىڭ اتىشۋلى Esentai City تۇرعىن ءۇي كەشەنىندەگى مۇلىكتەرى تۋرالى سۇراق قويعان.

اتالعان جك-داعى جىلجىمايتىن مۇلىكتىڭ ءبىر بولىگىن اتىشۋلى قوسپاەۆتىڭ قىلمىستىق توبى زاڭسىز يەمدەنگەن ەدى. افم توراعاسىنىڭ ورىنباسارى جەڭىس ەلەمەسوۆتىڭ ايتۋىنشا، بايبەك پەن ونىڭ جاقىندارىنا قاتىستى اگەنتتىكتە رەسمي تىركەلگەن قىلمىستىق ءىس جوق.

«باۋىرجان بايبەكتىڭ وزىنە دە، اكەسىنە دە ەشقانداي ءىس قوزعالماعان. ال قوسپاەۆتىڭ ءىسى بويىنشا سوت ۇكىمى شىقتى. سونىمەن قاتار بۇل ىسكە قاتىسى بار باسقا لاۋازىمدى تۇلعالار مەن ءالى انىقتالماعان ادامدارعا قاتىستى بولەك ءىس قوزعالدى. ولاردىڭ اراسىندا وسى قىلمىستىق توپتىڭ ارەكەتىن جاسىرۋعا جانە زاڭسىز الىنعان اكتيۆتەردى تىعۋعا كومەكتەسكەن ادامدار بار»، – دەدى جەڭىس ەلەمەسوۆ.

ەسكە سالا كەتسەك، قوسپاەۆتىڭ توبى 2018–2022 جىلدارى AV-Construction كومپانياسىن باسىپ الىپ، Esentai City كەشەنىندەگى 133 جىلجىمايتىن مۇلىكتى وزدەرىنىڭ، تۋىستارى مەن جاقىن ادامدارىنىڭ اتىنا نارىقتان تومەن باعامەن راسىمدەگەن. كومپانياعا كەلگەن شىعىن كولەمى – 4,6 ملرد تەڭگە.

جىلجىمايتىن مۇلىكتەردى يەلەنگەندەردىڭ قاتارىندا نازارباەۆتىڭ تۋىستارى مەن باۋىرجان بايبەكتىڭ اكەسى دە اتالعان بولاتىن.

كەيبىر دەرەككوزدەردىڭ ءمالىم ەتكەنىندەي، بايبەك قازىر كيپر ارالىندا الاڭسىز ءومىر ءسۇرىپ جاتىر.

"ونىڭ تۇسىندا دەمالىس ايماقتارى مەن زاڭمەن قورعالاتىن جەرلەر مەملەكەت مەنشىگىنەن شىعىپ، وليگارحتارعا بەرىلدى. سول جىلدارى ەسەنتاي، كوكتوبە سىندى كوپتەگەن ەليتالىق تۇرعىن ءۇي كەشەندەرى پايدا بولدى. مەدەۋ، بوستاندىق، ناۋرىزباي اۋداندارىنىڭ قۇرىلىس جوسپارلارى قايتا-قايتا تۇزەتىلدى.

بايبەك ەكى جارلىق شىعارعان. ونىڭ ناتيجەسىندە ءال-فارابي اتىنداعى قازۇۋ-دىڭ جەرلەرى "وميرەكس" پەن "اتلاس دەۆەلوپمەنت" فيرمالارىنا ءوتتى. ال ول فيرمالاردىڭ نەگىزىن دينارا قۇلىباەۆا قالاعان.

ودان بولەك، مەدەۋ جانە بوستاندىق اۋداندارىندا 116 گەكتاردان استام تابيعي زونالار مەن دەمالىس ورىندارى كوتتەدجدەر مەن كوپپاتەرلى ۇيلەر سالۋ ءۇشىن وليگارحتارعا ساتىلىپ كەتتى، دەيدى وسى تۇستا اشكەرە دەرەككوزى.

Abai.kz