باتىس قازاقستان وبلىسىنىڭ اكىمى ناريمان تورەعاليەۆ رەسەي فەدەراتسياسىمەن شەكارالاس ورنالاسقان «سىرىم» شەكارالىق باقىلاۋ بەكەتىنە باردى. وتكىزۋ بەكەتى ينفراقۇرىلىمىن جاڭعىرتۋ ماقساتىندا قايتا قۇرۋ جۇمىستارى جوسپارلانعان.

مەملەكەت باسشىسى قاسىم-جومارت توقاەۆ ءوز سوزىندە مەملەكەتتىك شەكارانىڭ قاۋىپسىزدىگىن قامتاماسىز ەتۋ – كەز كەلگەن مەملەكەتتىڭ ەڭ ماڭىزدى شارتى ەكەنىن اتاپ وتكەن بولاتىن. سوندىقتان، وتكىزۋ بەكەتتەرىن زاماناۋي ينسپەكتسيالىق-تەكسەرۋ جۇيەلەرىمەن جابدىقتاۋ – شەكارا قاۋىپسىزدىگىن كۇشەيتىپ، كوممەرتسيالىق ءترانزيتتىڭ تيىمدىلىگىن ارتتىرۋعا مۇمكىندىك بەرەدى.

ءوڭىر باسشىسى بەكەتتىڭ قازىرگى جاي-كۇيى، جولاۋشىلار مەن تاسىمالداۋشىلارعا جاسالعان جاعدايلارمەن جانە قايتا جاڭعىرتۋ جوباسىنىڭ دايىندىق بارىسىمەن تانىستى.

جوسپارعا سايكەس، تەحنيكالىق بازا جاڭعىرتىلىپ، تەكسەرۋ مەن كۇتۋ ايماقتارى كەڭەيتىلەدى. سونىمەن قاتار، شەكارالىق راسىمدەردى جەدەلدەتۋگە باعىتتالعان بىرقاتار ءتيىمدى شارالار جۇزەگە اسىرىلادى.

«سىرىم» وتكىزۋ پۋنكتى قازاقستان مەن رەسەي اراسىنداعى ۇزدىكسىز قوزعالىستى قامتاماسىز ەتۋدە ستراتەگيالىق ءرول اتقارادى. جاڭعىرتۋ جۇمىستارى شەكارادان ءوتۋ پروتسەسىن جەدەلدەتىپ، ازاماتتار مەن كاسىپكەرلەرگە قولايلى ءارى ءتيىمدى جاعدايلار جاساۋعا مۇمكىندىك بەرەدى»، – دەدى وبلىس اكىمى ناريمان تورەعاليەۆ.

ايتا كەتۋ كەرەك، «سىرىم» شەكارالىق بەكەتى – «باتىس ەۋروپا – باتىس قىتاي» حالىقارالىق كولىك دالىزىندەگى ماڭىزدى پۋنكت بولىپ سانالادى. كولىك اعىنى كوپ كەزەڭدە بۇل بەكەت ارقىلى تاۋلىگىنە 1300-دەن استام جۇك كولىگى، 800 جەڭىل كولىك ءوتىپ، 6000 جولاۋشى شەكارادان وتەدى.

وبلىس اكىمى ناريمان تورەعاليەۆ قر ۇقك بقو بويىنشا شەكارا قىزمەتى دەپارتامەنتىنە، «قازاۆتوجول» ۇلتتىق كومپانياسىنىڭ وبلىستىق فيليالىنا جانە باس مەردىگەرگە ناقتى تاپسىرمالار بەردى. ايماق باسشىسى جۇمىستاردىڭ ناقتى جوسپارىن مۇقيات پىسىقتاۋدى، قايتا قۇرۋ كەزىندە بەكەتتىڭ ۇزدىكسىز جۇمىسىن قامتاماسىز ەتۋدى، ءتۇسىندىرۋ جۇمىستارىن جۇرگىزۋدى جانە رەسپۋبليكالىق قۇرىلىمدارمەن ءتيىمدى ءوزارا ءىس-قيمىلدى قامتاماسىز ەتۋدى تاپسىردى.

Abai.kz