1 شىلدەدەن باستاپ الماتىدا جاڭا تسيفرلىق باقىلاۋ جۇيەسى ىسكە قوسىلادى.

بۇل جۇيە تەك ستاندارتتى جول ەرەجەلەرىنىڭ بۇزىلۋىن عانا ەمەس، جۇرگىزۋشىنىڭ كولىك تىزگىنىندەگى مىنەز-قۇلقىن دا باقىلايدى. مۇندا نەيروجەلىلەر دە قولدانىستا بار.

ەندى كامەرالار كەلەسىدەي ەرەجە بۇزۋشىلىقتاردى انىقتاي الادى:

- قاۋىپتى جانە اگرەسسيۆتى جۇرگىزۋ،
- بۇرىلىس كورسەتكىشىن قوسپاي ءجيى جول اۋىستىرۋ،
- قارسى باعىتپەن ءجۇرۋ،
- كەنەتتەن جىلدامدىق ارتتىرۋ نەمەسە تەجەلۋ،
- ساقتاندىرۋ ءپوليسى جوق كولىكتەر،
- جالعان نەمەسە جاسىرىلعان نومىرلەر،
- ايىپپۇلدارىن تولەمەگەن جۇرگىزۋشىلەر.

بارلىق مالىمەتتەر دەرەۋ قر ءىىم-ءنىڭ بىرىڭعاي بازاسىنا جىبەرىلەدى. ەگەر جۇرگىزۋشى ەرەجەنى بۇزسا — جۇيە ونى باقىلاۋ رەجيمىنە قوسىپ، پوليتسياعا اۆتوماتتى تۇردە حابار بەرەدى. جولداعى كولىك قوزعالىسى ناقتى ۋاقىتتا باقىلانادى، ال كامەرالار ەندى جاي عانا "قاراپ قويماي", تالداۋ جاسايدى.

ەرەجەنى ءجيى بۇزاتىندار ەندى وڭاي قۇتىلا المايدى — ايىپپۇلدارى جينالعاندار جولدا توقتاتىلۋى مۇمكىن.

ال جول ەرەجەسىن ساقتايتىن جۇرگىزۋشىلەرگە الاڭداۋعا نەگىز جوق. ەگەر ءبارى زاڭدى بولسا — جۇيە نازار اۋدارمايدى.

Abai.kz