قاسىم-جومارت توقاەۆ Alemcloud ۇلتتىق سۋپەركومپيۋتەر ورتالىعىندا جاڭا سۋپەركومپيۋتەردى ىسكە قوستى. 

2025 جىلعى 9 شىلدەدە مەملەكەت باسشىسى قاسىم-جومارت توقاەۆ Alemcloud ۇلتتىق سۋپەركومپيۋتەر ورتالىعىنا بارىپ، NVIDIA H200 گرافيكالىق پروتسەسسورلارى نەگىزىندە جاساقتالعان جاڭا سۋپەركومپيۋتەردى ىسكە قوسۋ راسىمىنە قاتىستى.

اتالعان جوبا قازاقستان رەسپۋبليكاسىنىڭ تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى مەن حالىقارالىق سەرىكتەستەردىڭ بىرلەسكەن كۇش-جىگەرىمەن جۇزەگە استى. سۋپەركومپيۋتەر جاڭا داتا-ورتالىقتا ورناتىلىپ، رەسمي تۇردە پايدالانۋعا بەرىلدى.

جاڭا سۋپەركومپيۋتەر كلاستەرى FP8 فورماتىنداعى ەسەپتەۋ ادىستەمەسى بويىنشا 2 ەكزافلوپسقا دەيىنگى جوعارى ونىمدىلىكتى قامتاماسىز ەتە الادى. بۇل كورسەتكىش بويىنشا ول ورتالىق ازياداعى ەڭ قۋاتتى ەسەپتەۋ جۇيەسى سانالادى.

سۋپەركومپيۋتەر – بۇل ءارتۇرلى سەرۆەرلەر مەن دەرەكتەردى ساقتاۋ جۇيەلەرىنەن قۇرالعان، GPU (گرافيكالىق پروتسەسسور) بازاسىندا جۇمىس ىستەيتىن نەيروجەلىگە جانە جاساندى ينتەللەكت ۇلگىلەرىنە نەگىزدەلگەن ەسەپتەۋ ماشيناسى. مۇنداي جوعارى ءونىمدى جۇيە عىلىمي جانە تەحنولوگيالىق مىندەتتەردى شەشۋدە اسا ماڭىزدى ءرول اتقارادى.

مەملەكەت باسشىسى بۇل جوبانىڭ ەلىمىزدىڭ تسيفرلىق دامۋ جولىنداعى ماڭىزدى جەتىستىكتەرىنىڭ ءبىرى ەكەنىن اتاپ ءوتتى:

“سۋپەركومپيۋتەردىڭ ىسكە قوسىلۋى – ەلىمىزدىڭ نەگىزگى سالالارىن تسيفرلاندىراتىن ماڭىزدى قادام. بۇل – قازاقستاننىڭ تسيفرلىق تەحنولوگيالاردى دامىتۋدا ايتارلىقتاي وركەندەۋىنە جول اشادى،” – دەدى قاسىم-جومارت توقاەۆ.

سۋپەركومپيۋتەردىڭ ەسەپتەۋ قۋاتىن:

• نەيروجەلى شەشىمدەرىن ازىرلەيتىن ستارتاپتار،
• ۋنيۆەرسيتەتتەر مەن عىلىمي ورتالىقتار،
• مەملەكەتتىك مەكەمەلەر،
• جەكە كومپانيالار پايدالانا الادى.

جوعارى ءونىمدى ەسەپتەۋ رەسۋرستارى وزىق تەحنولوگيالاردى دامىتۋعا، عىلىم مەن ءبىلىم سالاسىندا جاڭا سەرپىن بەرۋگە، سونداي-اق جاساندى ينتەللەكت پەن ۇلكەن دەرەكتەردى وڭدەۋ باعىتتارىندا اۋقىمدى جوبالاردى جۇزەگە اسىرۋعا مۇمكىندىك بەرەدى.

سونىمەن قاتار، تسيفرلاندىرۋ سالاسىنداعى ءىرى ماقساتتار جونىندە تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ تە مالىمدەدى. ونىڭ ايتۋىنشا، 2027 جىلعا قاراي قازاقستان اۋماعىندا ءموبيلدى بايلانىسپەن قامتۋ دەڭگەيى 99%-عا جەتەدى، وعان رەسپۋبليكالىق جانە وبلىستىق ماڭىزداعى 40 مىڭ شاقىرىم اۆتوجول دا كىرەدى. بۇل كورسەتكىش تسيفرلىق تەڭسىزدىكتى جويۋعا جانە بۇكىل ەلدى ساپالى بايلانىسپەن قامتاماسىز ەتۋگە باعىتتالعان ناقتى قادام بولماق.

ايىم الماسقىزى

Abai.kz