16 شىلدە, قاراعاندى وبلىسى. پالاتا سپيكەرى ەرلان قوشانوۆ باستاعان ءماجىلىس دەلەگاتسياسى قاراعاندى وبلىسىنىڭ نۇرا جانە وساكاروۆ اۋداندارىنا باردى. ءماجىلىس دەپۋتاتتارى وڭىردەگى ينۆەستيتسيالىق جوبالاردىڭ جۇزەگە اسىرىلۋ بارىسىمەن جانە الەۋمەتتىك نىسانداردىڭ جاعدايىمەن تانىستى.

نۇرا اۋدانىندا دەپۋتاتتار بولات ابدىكاءرىموۆ اتىنداعى كوپسالالى كوللەدجگە باردى. وقۋ ورنى اگروونەركاسىپ، قۇرىلىس جانە ءوندىرىس سالالارىنا ارنالعان ون ماماندىق بويىنشا كادرلار دايارلايدى. بۇگىندە مۇندا شامامەن 300 ستۋدەنت ءبىلىم الۋدا.

سۋرەتتى تۇسىرگەن – ت.تانىباەۆ.

ءماجىلىس توراعاسى پەداگوگتەرگە ارناعان سوزىندە ەڭبەك ادامىنىڭ ءرولى مەملەكەت ءۇشىن ماڭىزدى ەكەنىن اتاپ ءوتتى. ول قازىرگى تاڭدا قازاقستاندا جۇمىسشى ماماندىقتارى بويىنشا ماماندارعا سۇرانىس 40 پايىزدان اسىپ وتىرعانىن ايتىپ، وسىعان بايلانىستى جاس، بىلىكتى كادرلار دايارلاۋعا ەرەكشە نازار اۋدارۋ قاجەتتىگىنە توقتالدى.

– وزدەرىڭىزگە بەلگىلى, پرەزيدەنتىمىز بيىلعى جىلدى جۇمىسشى ماماندىقتار جىلى دەپ جاريالادى. بۇل باعىتتا كوللەدجدەر مەن ۋچيليششەلەر ەلگە قاجەتتى ماماندار دايارلاۋ ىسىندە ەرەكشە ءرول اتقارادى. سىزدەر جاس دانەكەرلەۋشىلەرگە، قۇرىلىسشىلار مەن تىگىنشىلەرگە ەڭبەككە دەگەن شىنايى قۇرمەتتى، ءوز ماماندىعىنا دەگەن سۇيىسپەنشىلىكتى جانە دۇرىس مورالدىق قۇندىلىقتاردى دارىتىپ كەلەسىزدەر. مىقتى ەكونوميكا مەن ەلدىڭ جارقىن بولاشاعىۇستازداردىڭ قولىندا. سوندىقتان مەملەكەت سىزدەردى تولىق قولدايدى. كوللەدجدەردى دامىتۋعا جانە مۇعالىمدەردىڭ ەڭبەك جاعدايىن جاقسارتۋعا بار كۇشىن سالادى، – دەدى ەرلان قوشانوۆ.

سۋرەتتى تۇسىرگەن – ت.تانىباەۆ.

سونىمەن قاتار ول ەڭبەك ادامىن قولداۋعا باعىتتالعان ناقتى وزگەرىستەرگە، ياعني، جۇمىسشى ماماندىق يەلەرى ءۇشىن جاڭادان تۇرعىن ءۇي يپوتەكالىق باعدارلاماسىنىڭ ىسكە قوسىلعانىن، سونداي-اق زياندى ەڭبەك جاعدايىندا جۇمىس ىستەيتىندەرگە زەينەتكە ەرتە شىعۋ مۇمكىندىگى قاراستىرىلعانىن اتاپ ءوتتى.

ساپار بارىسىندا دەپۋتاتتار كوللەدج ستۋدەنتتەرى ءوز ماماندىقتارى بويىنشا تاجىريبەلىك ماشىق قالىپتاستىراتىن وقۋ شەبەرحانالارىنىڭ جۇمىسىمەن تانىستى. مۇندا دانەكەرلەۋ ءىسى، قۇرىلىس، اۆتوسلەسار, تاماق جانە تىگىن ءوندىرىسى باعىتتارى بويىنشا ءبىلىم بەرىلەدى. كوللەدجدەگى جۇمىس بارىسى جايلى جاس مامان ارايلىم امانكەلدى ايتىپ بەردى. ول «ديپلوممەن – اۋىلعا» باعدارلاماسى اياسىندا تۋعان اۋىلىنا ورالىپ، مۇعالىم بولىپ قىزمەت اتقارىپ ءجۇر.

سۋرەتتى تۇسىرگەن – ت.تانىباەۆ.

دەپۋتاتتار سونداي-اق مەديتسينا قىزمەتكەرلەرىنە ارنالعان كوپپاتەرلى تۇرعىن ءۇي كەشەنىءنىڭ كۇردەلى جوندەۋ جۇمىستارىن تەكسەردى. بۇل ءۇي بۇعان دەيىن بوس تۇرعان عيماراتتان قايتا جاڭعىرتىلىپ جاتىر. جىل سوڭىنا دەيىن جاڭا قىزمەتتىك باسپاناعا اۋداندىق اۋرۋحانانىڭ جاس قىزمەتكەرلەرىنەن 14 وتباسى قونىستانادى دەپ جوسپارلانۋدا.ايماق باسشىلىعىنىڭ ايتۋىنشا، اۋىلداعى مەديتسينا قىزمەتكەرلەرىن قولداۋعا باعىتتالعان مەملەكەتتىك قولداۋ شارالارىنىڭ ارقاسىندا بۇگىندە نۇرا اۋىلىندا بىلىكتى كادرلار تاپشىلىعى ماسەلەسى ءىس جۇزىندە شەشىمىن تاپقان.

اۋداندا اۋىل شارۋاشىلىعى دا قارقىندى دامىپ كەلەدى. ءماجىلىس دەپۋتاتتارى بيىل ىسكە قوسىلعان «مف رامادان» جشس-ءنىڭ ءسۇت فەرماسىنىڭ جۇمىسىمەن تانىستى. كاسىپورىن 1100 گولشتين-فريز تۇقىمدى ساۋىن سيىر ۇستاۋعا ارنالعان. تەحنولوگيالىق تۇرعىدان جاڭا ساۋ جابدىعىنىڭ كومەگىمەن فەرما تاۋلىگىنە – ورتا ەسەپپەن 27 توننا، جىلىنا 10 مىڭ تونناعا دەيىن ءسۇت ءوندىرۋدى جوسپارلاپ وتىر.

وساكاروۆ اۋدانىندا ءماجىلىس توراعاسى مەن دەپۋتاتتارعا تاعى ءبىر ينۆەستيتسيالىق جوبا – قۋاتتىلىعى 150 مۆت بولاتىن جەل ەلەكتر ستانساسىنىڭ قۇرىلىسى تانىستىرىلدى. بۇگىندە مۇندا جوسپارلانعان 21 جەل قوندىرعىسىنىڭ 9-ى ىسكە قوسىلىپ، ەنەرگيا وندىرۋدە. الىنعان «جاسىل» ەلەكتر ەنەرگياسى قوسالقى ستانسا ارقىلى جالپى تاراتۋ جەلىسىنە جىبەرىلەدى. جوبا اياسىندا اۋىلدان 20 جاڭا جۇمىس ورنى اشىلعان.

دەلەگاتسيا سونداي-اق 2020 جىلى تولىق قايتا جاڭعىرتۋدان وتكەن «جاستار» بالالار مەن جاسوسپىرىمدەر ورتالىعىنا باردى. قازىرگى تاڭدا ورتالىقتا زاماناۋي باعىتتار بويىنشا 25 ۇيىرمە جۇمىس ىستەيدى. اۋىلدىڭ 600-دەن استام بالاسى مۇندا IT, روبوتتەحنيكا، جاساندى ينتەللەكت، مۋزىكا مەن تەاتر ونەرى، قولدانبالى شىعارماشىلىق، تىلدەر جانە باسقا دا سالالار بويىنشا ءبىلىم الۋدا.

وسى جەردە ءماجىلىس دەپۋتاتتارى وساكاروۆ اۋدانىنىڭ جۇرتشىلىعى وكىلدەرىمەن كەزدەستءى. اڭگىمە بارىسىندا جەرگىلىكتى ءوندىرىستى دامىتۋ پەرسپەكتيۆالارى تالقىلاندى. اتاپ ايتقاندا، الداعى جىلدارى وڭىردە سىيىمدىلىعى 2500 توننا بولاتىن كوكونىس ساقتاۋ قويماسى، 6000 باس مالعا ەسەپتەلىنگەن ەلىمىزدەگى ەڭ ءىرى ءسۇت-تاۋار فەرماسى، جىلىنا 45 ميلليون كىرپىش شىعاراتىن كىرپىش زاۋىتىنىڭ قۇرىلىسى، سونداي-اق سۋارمالى جەرلەردىڭ اۋماعىن ايتارلىقتاي كەڭەيتۋ ءىسى جوسپارلانىپ وتىر.

سۋرەتتى تۇسىرگەن – ت.تانىباەۆ.

ەرلان قوشانوۆ وتكەن سەسسيادا قابىلدانعان سالىق، بيۋدجەت جانە سۋ كودەكستەرى، سونداي-اق الەۋمەتتىك دامۋ باعىتىنداعى بىرقاتار زاڭ تۋرالى ايتتى. ولاردىڭ قاتارىندا «كەلەشەك» جيناقتاۋ جۇيەسى تۋرالى زاڭ، دارىندىلاردى قولداۋ نورمالارى، ءمامس جۇيەسىندە بازالىق مەديتسينالىق كومەكتى ساقتاۋ، ونكوسكرينينگتى كەڭەيتۋ جانە باسقا دا ماڭىزدى باستامالار بار.

ودان بولەك، ەرلان قوشانوۆ اۋداندىق ءماسليحات دەپۋتاتتارىن زاڭ شىعارۋ جۇمىسىنا بەلسەندىرەك قاتىسۋعا شاقىردى. ءوز ۇسىنىستارىن قوعامدىق پالاتا ارقىلى ەنگىزىپ، سونداي-اق ءماجىلىس سايتىنداعى ارناۋلى ءمودۋلدىڭ مۇمكىندىكتەرىن پايدالانۋعا كەڭەس بەردى. بۇل جايت قابىلداناتىن زاڭداردىڭ ساپاسىن ارتتىرىپ، ولاردىڭ ناقتى وڭىرلىك جاعدايلارعا ساي بولۋىنا ىقپال ەتەدى.

ازاماتتاردىڭ، كاسىپكەرلەردىڭ جانە اۋدان باسشىلىعىنىڭ وتىنىشتەرى مەن ۇسىنىستارى ءماجىلىس دەپۋتاتتارى تاراپىنان جاڭا پارلامەنتتىك سەسسيا باستالعان كەزدە تالقىلاۋعا شىعارىلاتىن بولادى.

Abai.kz