قازاقستاندا بالالاردى مەكتەپكە دەيىنگى تاربيە جانە وقىتۋمەن قامتۋدى ارتتىرۋ جۇمىستارى جالعاسۋدا. مەملەكەت باسشىسىنىڭ تاپسىرماسىنا سايكەس جاڭا مەكتەپكە دەيىنگى ۇيىمداردى اشۋ جونىندەگى 2023–2027 جىلدارعا ارنالعان جوسپار كەزەڭ-كەزەڭىمەن ىسكە اسىرىلۋدا - دەپ حابارلايدى قر وقۋ-اعارتۋ مينيسترلىگىنىڭ ءباسپاسوز قىزمەتى.

العاشقى  جارتىجىلدىقتىڭ قورىتىندىسى بويىنشا بيىل ەلىمىزدە 13,2 مىڭ ورىندى قامتيتىن 172 مەكتەپكە دەيىنگى ۇيىم اشىلدى. بۇل 2 جاستان 6 جاسقا دەيىنگى بالالاردىڭ 93,1 پايىزىن مەكتەپكە دەيىنگى بىلىممەن قامتۋعا مۇمكىندىك بەردى.

مەكتەپكە دەيىنگى بىلىممەن قامتۋدى ارتتىرۋ قۇرىلىس جۇرگىزۋ، قولدانىستاعى بالاباقشالاردى كەڭەيتۋ، تۇرعىن ۇيلەردىڭ ءبىرىنشى قاباتتارىندا شاعىن ورتالىقتار اشۋ، مەملەكەتتىك ءبىلىم بەرۋ تاپسىرىسىن ورنالاستىرۋ، ونىڭ ىشىندە «اقشا بالاعا بەرىلەدى» قاعيداتى بويىنشا ۆاۋچەرلىك قارجىلاندىرۋ ەسەبىنەن جۇزەگە اسىرىلۋدا.

جاڭا ۆاۋچەرلىك قارجىلاندىرۋ تەتىگى ەلىمىزدىڭ 19 قالاسىندا جانە 7 اۋدانىندا ىسكە اسىرىلدى. ول ارقىلى 300 مىڭعا جۋىق بالا مەكتەپكە دەيىنگى بىلىمگە قول جەتكىزدى، ال كەزەك 44 پايىزعا قىسقاردى.

سونىمەن قاتار مەكتەپكە دەيىنگى ۇيىمدارعا بارمايتىن بالالاردىڭ اتا-انالارىنا ارنالعان كونسۋلتاتسيالىق پۋنكتتەر جەلىسى كەڭەيدى. جىل باسىنان بەرى ولاردىڭ سانى 4,2 مىڭنان 5,5 مىڭعا دەيىن ارتتى.

بۇدان بولەك، 260 مەملەكەتتىك بالاباقشادا جوندەۋ جۇمىستارى جۇرگىزىلۋدە جانە ولاردىڭ ماتەريالدىق-تەحنيكالىق بازاسى نىعايتىلۋدا.

ەسكە سالا كەتەيىك، بۇگىندە ەلىمىزدەگى 11,8 مىڭنان استام بالاباقشادا 1 ميلليوننان استام بالا تاربيەلەنۋدە.

Abai.kz