2023 جىلدان باستاپ ەلىمىزدە پرەزيدەنتتىك جاستار كادرلىق رەزەرۆىنىڭ ۇلگىسىمەن «ءبىلىم بەرۋدەگى وزگەرىستەردىڭ 1000 كوشباسشىسى» جاڭا فورماتتاعى باسشىلاردى ىرىكتەۋ جانە دايارلاۋ باعدارلاماسى جۇزەگە اسىرىلۋدا.

جوبا قازىرگى زامانعى تاسىلدەر مەن باسقارۋ شەشىمدەرىن ەنگىزۋگە دايىن، ءبىلىم سالاسىنداعى ءتيىمدى باسقارۋشىلار كورپۋسىن قالىپتاستىرۋعا ىقپال ەتەدى. بۇل جوبانى جۇزەگە اسىرۋ ءبىلىم بەرۋ پروتسەسىنىڭ ساپاسىن ارتتىرىپ، جۇيەنىڭ ۇزاق مەرزىمدى تۇراقتىلىعىن قامتاماسىز ەتە وتىرىپ، ونىڭ بولاشاقتا سەرپىندى دامۋىنا جول اشادى.

ۇمىتكەرلەردى ىرىكتەۋ بەس كەزەڭنەن تۇرادى: 1-كەزەڭ – تەستىلەۋ، 2-كەزەڭ – وقىتۋ، 3-كەزەڭ – ەلدىڭ جەتەكشى مەكتەپتەرىندە تاعىلىمدامادان ءوتۋ، 4-كەزەڭ – قورىتىندى باعالاۋ، 5-كەزەڭ – كوميسسيامەن سۇحبات.

بارلىق كەزەڭدەردەن وتكەن ۇمىتكەرلەرگە سەرتيفيكات تابىستالىپ، سونىڭ نەگىزدە ولار كادرلىق رەزەرۆكە ەنگىزىلەدى جانە ءارى قاراي جۇمىسقا ورنالاسۋ مۇمكىندىگىنە يە بولادى.

ايتا كەتەيىك، ەكى جىل ىشىندە جاڭا بۋىننان 583 كوشباسشى دايارلاندى. بيىل جوباعا 2059 ۇمىتكەر قاتىسىپ، ولاردىڭ اراسىنان 471-ءى ەلدىڭ ۇزدىك مەكتەپتەرىندە تاعىلىمدامادان وتۋدە.

Abai.kz