قازاقستان رەسپۋبليكاسى پرەزيدەنتى قاسىم-جومارت توقاەۆتىڭ اگرارلىق سەكتوردى تۇراقتى تۇردە سۋمەن قامتاماسىز ەتۋ بويىنشا بەرگەن تاپسىرماسىن ىسكە اسىرۋ اياسىندا ۇكىمەت رەزەرۆىنەن قىزىلوردا وبلىسىنىڭ قاجەتتىلىكتەرى ءۇشىن 53 جىلجىمالى ديزەلدى سورعى ستانساسىن ساتىپ الۋعا شامامەن 1 ملرد تەڭگە ءبولىندى. قر پرەمەر-ءمينيسترى ولجاس بەكتەنوۆ ءتيىستى قاۋلىعا قول قويدى.

مامانداردىڭ ەسەبىنشە، جاڭا جابدىق ماگيسترالدى ارنالاردا سۋ دەڭگەيى تومەن بولعان كۇننىڭ وزىندە 6 مىڭنان استام گەكتار جەردى سۋارىپ تۇرۋعا مۇمكىندىك بەرەدى. سورعى ستانسالارى ماگيسترالدى جانە شارۋاشىلىقتار ارالىعىنداعى ارنالاردان ىشكى شارۋاشىلىق جەلىلەرىنە سۋ جىبەرۋ ءۇشىن قولدانىلادى.

وڭىردە 126,4 مىڭنان استام گەكتار جەرگە سۋارمالى ەگىن ەگىلگەن، ونىڭ 82,4 مىڭ گەكتارى كۇرىش. اعىمداعى سۋارۋ ماۋسىمىندا جوسپارلانعان سۋ كولەمى 2,5 ملرد تەكشە مەتر قۇرايدى.

وبلىس اكىمدىگى «قازسۋشار» رمك-ءنىڭ قىزىلوردا فيليالىمەن بىرلەسە ارنايى مونيتورينگ توبىن جاساقتاپ، سىرداريادان كەلىپ جاتقان سۋ كولەمىنە سايكەس، بەس ماگيسترالدى جانە ءۇش شارۋاشىلىقتار ارالىعىنداعى ارنالارعا سۋ بەرۋ كەستەسىن ازىرلەپ، بەكىتتى.

قىزىلوردا وبلىسىنىڭ اگروونەركاسىپتىك كەشەنى ترانسشەكارالىق سۋ رەسۋرستارىنا تىكەلەي تاۋەلدى ەكەنىن ەسكەرە وتىرىپ، ءوڭىردى تۇراقتى تۇردە سۋمەن قامتاماسىز ەتىپ، استىق ونىمدىلىگىن جانە ازىق-تۇلىك قاۋىپسىزدىگىن ساقتاۋ مەملەكەتتىڭ باستى مىندەتى بوپ قالادى.

Abai.kz