ماۋسىم ايىنداعى زەرتتەۋ ەل دامۋىنا قاتىستى باعالاردىڭ تۇراقتى ەكەنىن كورسەتىپ وتىر. بۇل – تاڭدالعان باعىتقا قاتىستى قوعامدا كونسەنسۋس ساقتالىپ وتىرعانىن جانە الەۋمەتتىك كوڭىل-كۇيدىڭ ورنىقتى بولىپ وتىرعانىن كورسەتەدى. رەسپوندەنتتەردىڭ باسىم بولىگى (79,4%) ەل دۇرىس باعىتتا دامىپ كەلە جاتىر دەپ سانايدى.

پىكىرلەردىڭ وڭ سەرپىنى الەۋمەتتىك-ەكونوميكالىق جاعدايعا قاتىستى دا بايقالادى. ماۋسىم ايىندا رەسپوندەنتتەردىڭ 73,6%-ى بۇل جاعدايعا وڭ باعا بەرگەن. بۇل ءۇردىس حالىقتىڭ قازىرگى احۋالدى قابىلداۋىندا تۇراقتانۋ ۇدەرىسى ءجۇرىپ جاتقانىن كورسەتەدى.

ساياسي جاعداي دا نەگىزىنەن وڭ باعالانادى: رەسپوندەنتتەردىڭ 76,2%-ى قازىرگى جاعدايعا قاناعاتتاناتىندارىن بىلدىرگەن.

قوعام تاراپىنان بەرىلگەن جوعارى وڭ باعالار كوبىنە ساياسي، الەۋمەتتىك-ەكونوميكالىق جانە پسيحولوگيالىق فاكتورلاردىڭ جيىنتىعىنا بايلانىستى. ولاردىڭ قاتارىندا ءجىو-ءنىڭ 6%-عا ءوسۋى، جاڭا ينفراقۇرىلىمدىق جانە الەۋمەتتىك نىسانداردىڭ سالىنۋى مەن ىسكە قوسىلۋى، تكش جانە كولىك ينفراقۇرىلىمىن جوندەۋ مەن جاڭعىرتۋ جۇمىستارى بار.

اتالعان سوتسيولوگيالىق زەرتتەۋدى قوعامدىق ساياسات ينستيتۋتى 2025 جىلى 18 ماۋسىم مەن 4 شىلدە ارالىعىندا جۇرگىزدى. ساۋالناماعا 18 جاستان اسقان 2000 قازاقستاندىق قاتىستى. ساۋالناما ۇلتتىق رەپرەزەنتاتيۆتى ىرىكتەمە بويىنشا جۇرگىزىلدى. ىرىكتەمەنىڭ قاتەلىك مولشەرى ±2,2%-دان اسپايدى.

Abai.kz