شىلدە ايىنىڭ قورىتىندىسى بويىنشا تەڭگە باعامى 1 اقش دوللارى ءۇشىن 540,72 تەڭگەگە دەيىن، 4%-عا السىرەدى. 

قازاقستان قور بيرجاسىنداعى ساۋدا-ساتتىقتىڭ ورتاشا ايلىق كولەمى ءبىر ايدا 235 ملن اقش دوللارىنان 260 ملن اقش دوللارىنا دەيىن ۇلعايدى. جالپى ساۋدا-ساتتىق كولەمى 5,7 ملرد اقش دوللارى بولدى.

بۇل رەسپۋبليكالىق بيۋدجەتكە ترانسفەرتتەر ءبولۋدى، سونداي-اق "تالدىقورعان-ءۇشارال" ماگيسترالدىق گاز قۇبىرىن سالۋ جونىندەگى ينفراقۇرىلىمدىق جوبانى قارجىلاندىرۋدى قامتاماسىز ەتۋگە مۇمكىندىك بەردى. ۇلتتىق قوردىڭ ساتۋ ۇلەسى جالپى ساۋدا كولەمىنىڭ 12%-ىن، نەمەسە كۇنىنە شامامەن 32 ميلليون اقش دوللارى بولدى.

– ۇكىمەتتىڭ رەسپۋبليكالىق بيۋدجەتكە ترانسفەرتتەر بولۋگە ارنالعان الدىن الا بولجامدى وتىنىمدەرى بويىنشا تامىزدا ۇلتتىق بانكتىڭ ۇلتتىق قوردان 400 ملن اقش دوللارىنان 500 ملن اقش دوللارىنا دەيىن ۆاليۋتا ساتاتىنى كۇتىلەدى. "تەڭەستىرۋ" وپەراتسياسى اياسىندا شىلدەدە 290 ملرد تەڭگە الىندى. تامىز ايىندا وسى ماقساتتا شامامەن 290 ملرد تەڭگە بالاماسىندا ۆاليۋتا ساتۋ جوسپارلانىپ وتىر.

ۇلتتىق قوردىڭ قاراجاتىمەن وپەراتسيالار جۇرگىزۋ، سونداي-اق "تەڭەستىرۋ" تەتىگىن ىسكە اسىرۋ كەزىندە ۇلتتىق بانك نارىقتىق بەيتاراپ قاعيداتىن ساقتايدى، ول شەتەل ۆاليۋتاسىن تۇراقتى جانە بىركەلكى ساتۋدى بىلدىرەدى، – دەلىنگەن حابارلامادا.

30 شىلدەدە ۆاليۋتا نارىعىنداعى وتىمدىلىك بارىنشا تومەندەپ، الىپساتارلىق قىسىمنىڭ كۇشەيۋىنە بايلانىستى ۇلتتىق بانك 125,6 ميلليون اقش دوللارى كولەمىندە ۆاليۋتالىق ينتەرۆەنتسيالار جۇرگىزدى.

ينتەرۆەنتسيالاردى جۇرگىزۋ الىپساتارلىق بەلسەندىلىكتى تومەندەتۋگە جانە نارىقتا قاجەتتى وتىمدىلىكتى قامتاماسىز ەتۋگە مۇمكىندىك بەردى.

كۆازيمەملەكەتتىك سەكتور سۋبەكتىلەرىنىڭ ۆاليۋتالىق ءتۇسىمنىڭ ءبىر بولىگىن مىندەتتى ساتۋ نورماسى اياسىندا وتكەن ايدىڭ قورىتىندىسى بويىنشا ۆاليۋتالىق ءتۇسىمدى ساتۋ كولەمى شامامەن 450 ملن اقش دوللارى بولدى.

– بجزق زەينەتاقى اكتيۆتەرىنىڭ ۆاليۋتالىق ۇلەسىن ۇزاق مەرزىمدى كەزەڭدە كەمىندە 40% دەڭگەيىندە ۇستاپ تۇرۋ ماقساتىندا ۇلتتىق بانك شىلدە ايىندا بيرجا ساۋدا-ساتتىعىندا شەتەل ۆاليۋتاسىن ساتىپ الدى، ونىڭ جالپى سوماسى 35 ملن اقش دوللارىن نەمەسە جالپى ساۋدا-ساتتىق كولەمىنىڭ شامامەن 0,6%-ىن قۇرادى. اعىمداعى باعام دەڭگەيىندە بجزق ۆاليۋتا ۇلەسىنىڭ 40%-دان اسۋىنا بايلانىستى تامىز ايىندا بجزق زەينەتاقى اكتيۆتەرى ەسەبىنەن ۆاليۋتا ساتىپ الۋ جوسپارلانبايدى.

ۇلتتىق بانك ترانسپارەنتتىلىك قاعيداتى اياسىندا ۆاليۋتا نارىعىنداعى بارلىق وپەراتسيا تۋرالى تولىق اقپاراتتى جاريالاپ وتىرادى. قىسقا مەرزىمدى پەرسپەكتيۆادا تەڭگە باعامىنىڭ ديناميكاسى نارىققا قاتىسۋشىلاردىڭ كۇتۋىنە، توقسان سايىنعى سالىق تولەمدەرىنە، الەمدىك نارىقتارداعى احۋالعا جانە گەوساياسي وزگەرىستەرگە بايلانىستى بولادى. ۇلتتىق بانك تەڭگەرىمسىزدىكتىڭ جيناقتالۋىنا جول بەرمەيتىن جانە التىنۆاليۋتا رەزەرۆتەرىنىڭ ساقتالۋىن قامتاماسىز ەتەتىن يكەمدى باعام بەلگىلەۋ رەجيمىن ۇستانادى، – دەلىنگەن ۇلتتىق بانك حابارلاماسىندا. 

Abai.kz