ارنايى ۇيىمداستىرىلعان ءباسپاسوز تۋرى اياسىندا اتا-انالار، جەرگىلىكتى باق وكىلدەرى، ءبىلىم سالاسىنىڭ ماماندارى جاڭا مەكتەپتىڭ قۇرىلىسىمەن تانىستى. ءبىلىم ورداسىندا 56 زامان تالابىنا ساي ءپان كابينەتى قاراستىرىلعان. قازىرگى تاڭدا مەكتەپتىڭ كابينەتتەرى زامانعا ساي قۇرىلعالارمەن جابدىقتالۋدا. وقۋشىلاردىڭ شىعارماشىلىعىن دامىتۋ ماقساتىندا مەكتەپ STEM زەرتحانالارى، ۆيزۋالدى ديزاين، حورەوگرافيا كابينەتتەرى دە جۇمىس ىستەيدى. سونداي-اق، ەرەكشە ءبىلىمدى قاجەت ەتەتىن وقۋشىلار ءۇشىن سەنسورلىق كابينەت، لوگوپەد، دەفەكتولوگ، پسيحولوگ كابينەتتەرى سوڭعى ۇلگىدەگى قۇرالدارمەن قامتاماسىز ەتىلگەن. وقۋشىلاردىڭ بوس ۋاقىتىن ءتيىمدى ۇيىمداستىرۋ ءۇشىن 2 سپورت زال، ۆيزۋالدى ونەر، ديزاين جانە تەحنولوگيا، شەبەرحانا، تاماقتانۋ مادەنيەتى كابينەتتەرى جۇمىس ىستەيتىن بولادى.

وبلىستىق ءبىلىم باسقارماسىنىڭ مالىمەتىنە سايكەس، ماڭعىستاۋ وبلىسىندا «كەلەشەك مەكتەپتەرى» جوباسى اياسىندا جالپى سانى 12 600 وقۋشىعا ارنالعان 13 مەكتەپتىڭ قۇرىلىسى جۇرگىزىلىپ، ولار كەزەڭ-كەزەڭىمەن پايدالانۋعا بەرىلۋدە. ال بيىل جالپى سانى 8100 ورىندىق 9 مەكتەپتى پايدالانۋعا بەرۋ جوسپارلانعان. ونىڭ ىشىندە 6600 وقۋشىعا ارنالعان 8 ءبىلىم ورداسى قىركۇيەك ايىندا ەل يگىلىگىنە تاپسىرىلادى. اتاپ ايتقاندا، اقتاۋ قالاسى - ومىرزاق اۋىلى «راۋان» تۇرعىن ءۇي ءماسسيۆى، 20-شاعىناۋداندا جانە جاڭاوزەن قالاسى – مەرەي شاعىناۋدانىندا، بەينەۋ اۋدانى – سام اۋىلى مەن بەينەۋ اۋىلىندا، ماڭعىستاۋ اۋدانى– قوسبۇلاق-2 شاعىناۋدانىندا، مۇنايلى اۋدانى – ماڭعىستاۋ-3 اۋىلى، باتىر اۋىلى «سامال» شاعىناۋدانىندا جاڭا مەكتەپتەر پايدالانۋعا بەرىلەدى.