الماتىدا حالىقارالىق جاستار كۇنىنە ارنالعان «Alma Love» جاستار فەستيۆالى اياسىندا «JASTAR JOLY» اتتى كۆەست ويىندارى ۇيىمداستىرىلدى. ءىس-شارا الماتى قالاسى جاستار ساياساتى باسقارماسىنىڭ قولداۋىمەن ءوتتى.

ويىنعا قاتىسۋعا 1000-نان استام قالا جاستارى نيەت ءبىلدىردى. ىرىكتەۋ كەزەڭىنىڭ ناتيجەسىندە 40-قا جۋىق كوماندا جارىسقا جولداما الدى. كۆەست بەس نەگىزگى تۋردان تۇردى. قاتىسۋشىلار الماتىنىڭ ساياباقتارىن ارالاپ، ۇيىمداستىرۋشىلار دايىنداعان تاپسىرمالاردى ورىندادى، قالا تاريحى مەن مادەنيەتىنە قاتىستى ۆيكتورينالىق سۇراقتارعا جاۋاپ بەردى، سونداي-اق ءتۇرلى ويىندارعا قاتىستى.

​«بۇل كۆەست مەن ءۇشىن وتە قىزىقتى ءارى پايدالى بولدى. سۇراقتار ءتۇرلى تاقىرىپتاردى قامتىدى، كەيبىرى ويلانۋدى، ال كەيبىرى جىلدام شەشىم قابىلداۋدى تالاپ ەتتى. وسى ويىننىڭ ارقاسىندا الماتى تۋرالى كوپ جاڭا مالىمەت ءبىلدىم، بۇرىن بارماعان جەرلەردى كوردىم. سونىمەن قاتار، كوماندامەن جۇمىس ىستەۋدىڭ ماڭىزىن سەزىندىم جانە جاڭا دوستار تاپتىم», – دەدى ويىنعا قاتىسقان قالا تۇرعىنى ماقسات ساگديەۆ.

​ءتورت تۋردى سۇرىنبەي وتكەن ۇزدىك بەس كوماندا ارباتتا وتكەن گراند-فينالعا جولداما الدى. قورىتىندىسىندا جەڭىمپاز اتانعان كوماندالار باعالى سىيلىقتارمەن ماراپاتتالىپ، جاڭا تانىستار مەن ۇمىتىلماس اسەرلەرگە يە بولدى.

​ايتا كەتەيىك، الماتىدا حالىقارالىق جاستار كۇنىنە ارنالعان ونكۇندىك ءىس-شارالار لەگى 3 تامىزدا باستالعان. فەستيۆال باعدارلاماسىندا ەكولوگيالىق اكتسيالار، سپورتتىق تۋرنيرلەر، Open Mic فورماتىنداعى كونتسەرتتەر جانە باسقا دا قىزىقتى شارالار قاراستىرىلعان.

فەستيۆالدىڭ سالتاناتتى جابىلۋى 12 تامىز كۇنى بالۋان شولاق اتىنداعى سپورت كەشەنىندە وتەدى. قالا تۇرعىندارى مەن قوناقتارىن قازاقستاندىق ەسترادا جۇلدىزدارىنىڭ قاتىسۋىمەن وتەتىن گالا-كونتسەرت پەن الماتىنىڭ بەلسەندى جاستارىن ماراپاتتاۋ ءراسىمى كۇتەدى. ءىس-شاراعا كىرۋ تەگىن.

Abai.kz