ەلىمىزدە مادەني نىسانداردى جاڭعىرتۋ مەن ساقتاۋ باعىتىنداعى اۋقىمدى مەملەكەتتىك باعدارلاما اياسىندا قازاقستاننىڭ باستى ونەر وردالارىنىڭ ءبىرى – الماتىداعى ءابىلحان قاستەەۆ اتىنداعى مەملەكەتتىك ونەر مۋزەيىندە جوندەۋ-قالپىنا كەلتىرۋ جۇمىستارى باستالدى.

جاڭعىرتۋ شەڭبەرىندە شاتىردى اۋىستىرۋ، زاماناۋي كليماتتىق جۇيەلەر ورناتۋ، پاركەت جابىندىسىن قالپىنا كەلتىرۋ جانە وزگە دە ماڭىزدى تەحنيكالىق جەتىلدىرۋلەر كوزدەلگەن.

بۇل شارالار كەلۋشىلەر ءۇشىن بارىنشا قولايلى جاعداي جاساپ، ونەر تۋىندىلارىن ساقتاۋدىڭ زاماناۋي تالاپتارىن قامتاماسىز ەتۋگە باعىتتالعان.

وسىعان بايلانىستى 5 تامىزدان باستاپ مۋزەي ۋاقىتشا جابىلدى.

مۇنداي شەشىم ەڭ الدىمەن ەل قازىناسىنا اينالعان قۇندى جادىگەرلەردىڭ ساقتالۋى مەن قۇرىلىس كەزەڭىندەگى قاۋىپسىزدىكتى قامتاماسىز ەتۋ ءۇشىن قابىلداندى.

وسى ماڭىزدى جوبانى جۇزەگە اسىرۋعا قولداۋ كورسەتكەن Senim Qogamy قورى مەن باس دەمەۋشى «سامۇرىق-قازىنا» اق-نا شىنايى العىسىمىزدى بىلدىرەمىز. جوندەۋ جۇمىستارىن مەردىگەر ۇيىم – «Lucky Build Company» جشس اتقارىپ جاتىر. بارلىق جۇمىستار اياقتالعان سوڭ جاڭارعان مۋزەي قوناقتارىن جاڭا زامانعا ساي، شابىت سىيلايتىن، ءوز كوللەكتسياسى مەن مارتەبەسىنە لايىق جاڭا كەڭىستىكتە قارسى الادى دەپ سەنەمىز.

ايدا بالاەۆا، 

قر مادەنيەت جانە اقپارات ءمينيسترى

Abai.kz