وڭىردە 2025–2026 جىلدارداعى جىلىتۋ ماۋسىمىنا دايىندىق اياسىندا تۇرعىن ءۇي سەكتورىندا پروفيلاكتيكالىق جۇمىستىڭ ءبىرىنشى كەزەڭى باستالدى. ەرەكشە نازار الەۋمەتتىك تۇرعىدان وسال توپتاعى ازاماتتاردىڭ ۇيلەرىنە اۋدارىلۋدا. سەبەبى جىل سايىن ءورت وقيعالارىنىڭ باسىم بولىگى جەكە تۇرعىن ۇيلەردە تىركەلەدى.

اباي وبلىسى تجد باستىعىنىڭ ورىنباسارى الەكسەي شتىكەلدىڭ مالىمەتىنشە، 15 تامىز بەن 15 قىركۇيەك ارالىعىندا كوپبالالى جانە از قامتىلعان وتباسىلاردىڭ، زەينەتكەرلەر مەن مۇمكىندىگى شەكتەۋلى جانداردىڭ ۇيلەرىنە بارىپ، تەكسەرۋ جۇرگىزىلىپ جاتىر. مۇنداي الدىن الۋ شارالارى ءورت قاۋىپسىزدىگى ەرەجەلەرىن بۇزۋشىلىقتاردى انىقتاۋعا جانە ءتۇسىندىرۋ جۇمىستارىنا مۇمكىندىك بەرەدى.

– ستاتيستيكاعا سايكەس، ەڭ قاۋىپتى ايماق – تۇرعىن ءۇي سەكتورى. ورتتەردىڭ شامامەن 70 پايىزى جانە ادام ءولىمى جاعدايلارىنىڭ 90 پايىزى وسى سەكتورعا تيەسىلى. 2024–2025 جىلعى جىلىتۋ ماۋسىمىندا وبلىستا 304 ءورت تىركەلدى، بۇل الدىڭعى كەزەڭمەن (211 جاعداي) سالىستىرعاندا 44 پايىزعا كوپ. ءورت سالدارىنان 12 ادام زارداپ شەگىپ، 9 ادام قازا تاپتى، ولاردىڭ ىشىندە ەكى بالا بار. قايعىلى وقيعالاردىڭ باستى سەبەپتەرى – بالالاردى قاراۋسىز قالدىرۋ جانە ماس كۇيىندە توسەككە جاتىپ شىلىم شەگۋ، – دەپ اتاپ ءوتتى سپيكەر.

سۋرەت: gov.kz سايتىنان الىندى.

ورتتەن بولەك، جالىن شىقپاي-اق كومىرقىشقىل گازىنان ۋلانۋ دەرەكتەرى دە تىركەلگەن. وتكەن ماۋسىمدا 11 ادام قازا تاپتى، بۇل وتكەن جىلمەن سالىستىرعاندا 2,7 ەسە كوپ. دەگەنمەن الەۋمەتتىك تۇرعىدان وسال توپتاعى وتباسىلاردىڭ ۇيلەرىنە ورناتىلعان كومىرقىشقىل گازىنىڭ داتچيكتەرى تيىمدىلىگىن دالەلدەدى. سەمەي مەن جارما اۋدانىندا دەر كەزىندە ىسكە قوسىلعان قۇرىلعىلاردىڭ ارقاسىندا ءتورت ادامنىڭ، سونىڭ ىشىندە ءبىر بالانىڭ ءومىرى ساقتالىپ قالدى.

وڭىردە حالىقتىڭ الەۋمەتتىك تۇرعىدان وسال توپتارىنا داتچيك ورناتۋ باعدارلاماسى جالعاسۋدا. 2025 جىلى مۇنداي وتباسىلاردىڭ سانى 30 پايىزعا ارتىپ، 6 733-كە جەتتى. بۇگىنگى كۇنى ولاردىڭ بارلىعى تولىقتاي داتچيكتەرمەن قامتاماسىز ەتىلگەن.

– تۇرعىن ءۇي سەكتورىنداعى جاعداي ەرەكشە نازاردى قاجەت ەتەدى. ءورت پەن ادام ءولىمى دەرەكتەرىنىڭ ءوسۋىن كورىپ وتىرمىز، سوندىقتان تاۋەكەل توبىنداعى وتباسىلارمەن ماقساتتى پروفيلاكتيكالىق جۇمىستار جۇرگىزۋدەمىز. ەڭ باستىسى، كومىرقىشقىل گازىنىڭ داتچيكتەرى شىن مانىندە ادام ءومىرىن ساقتاپ قالاتىنىن سوڭعى جىلدارداعى تاجىريبە ايقىن كورسەتتى، – دەپ تۇيىندەدى الەكسەي شتىكەل.

Abai.kz