مەملەكەت باسشىسى قاسىم-جومارت توقاەۆ بۇگىن بىرقاتار اۋىس-تۇيىستەر جاسادى. قر وقۋ-اعارتۋ ءمينيسترى اۋىستى. ال قر جاساندى ينتەللەكت مينيسترلىگى قۇرىلىپ، ول تسيفرلىق دامۋمەن بىرىكتى.

سونىمەن، كىمدەر قىزمەتتەرىنەن بوساتىلدى، كىمدەر جاڭا قىزمەتتەرگە تاعايىندالدى؟ قاراڭىز:

مەملەكەت باسشىسىنىڭ جارلىعىمەن جاسلان حاسەنۇلى ماديەۆ قازاقستان رەسپۋبليكاسى پرەمەر-ءمينيسترىنىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى بولىپ تاعايىندالدى.

مەملەكەت باسشىسىنىڭ جارلىعىمەن عاني بەكتايۇلى بەيسەمباەۆ قازاقستان رەسپۋبليكاسىنىڭ وقۋ-اعارتۋ ءمينيسترى لاۋازىمىنان بوساتىلدى.

مەملەكەت باسشىسىنىڭ جارلىعىمەن جۇلدىز دوسبەرگەنقىزى سۇلەيمەنوۆا قازاقستان رەسپۋبليكاسىنىڭ وقۋ-اعارتۋ ءمينيسترى بولىپ تاعايىندالدى.

مەملەكەت باسشىسىنىڭ وكىمىمەن جاندوس جانىبەكۇلى ومىراليەۆ قازاقستان رەسپۋبليكاسى باس پروكۋرورىنىڭ ءبىرىنشى ورىنباسارى بولىپ تاعايىندالدى, ول بۇرىنعى اتقارعان لاۋازىمىنان بوساتىلدى.

مەملەكەت باسشىسىنىڭ وكىمىمەن تيمۋر عازيزبەكۇلى تاشىمباەۆ قازاقستان رەسپۋبليكاسى باس پروكۋرورىنىڭ ءبىرىنشى ورىنباسارى لاۋازىمىنان بوساتىلدى.

اقورداداعى سوڭعى اپتالارداعى اۋىس-تۇيىستەر جايلى قازاقستان پرەزيدەنتىنىڭ كومەكشىسى – ءباسپاسوز حاتشىسى رۋسلان جەلدىباي تۇسىنىكتىمە بەردى.

– كەيىنگى كادرلىق وزگەرىستەرگە بايلانىستى باق وكىلدەرىنەن كوپتەگەن ساۋال كەلىپ جاتىر. ەڭ الدىمەن، مىنا ماسەلەنى باسا ايتۋ كەرەك، بۇل – ادەتتەگى كادرلىق روتاتسيا. نەگىزگى ماقسات – مەملەكەتتىك جۇيەدەگى ەڭ ماڭىزدى باعىتتاردىڭ تيىمدىلىگىن كۇشەيتۋ.

مەملەكەت باسشىسى جۋىرداعى جولداۋىندا ۇلتتىق ەكونوميكاعا تۇسەتىن ينۆەستيتسيا كولەمىن ارتتىرۋدى باسىم مىندەتتىڭ ءبىرى رەتىندە بەلگىلەدى.

بۇل ماڭىزدى سالا تاجىريبەلى ديپلومات مۇرات نۇرتىلەۋگە جۇكتەلدى. پرەزيدەنتتىڭ كومەكشىسى رەتىندە ول حالىقارالىق ينۆەستيتسيالىق جانە ساۋدا ىنتىماقتاستىعىن ىلگەرىلەتۋ ماقساتىندا شەت مەملەكەتتەردىڭ جوعارى دەڭگەيدەگى وكىلدەرىمەن، سونداي-اق الەمدىك ءىرى كومپانيالاردىڭ جەتەكشىلەرىمەن بايلانىستى دامىتادى.

مەملەكەت باسشىسىنىڭ جارلىعىمەن جاسلان ماديەۆ پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى بولىپ تاعايىندالدى. ۆەدومستۆو باسشىسى جولداۋدا ايتىلعان قازاقستاندى تسيفرلىق مەملەكەتكە اينالدىرۋ جونىندەگى ماقساتتى ىسكە اسىرۋمەن شۇعىلدانادى. پرەزيدەنت مينيسترگە ستراتەگيالىق ماڭىزى زور جۇمىستى اتقارۋعا قاتىستى باعىت-باعدار بەردى.

سونىمەن قاتار پرەمەر-ءمينيستردىڭ كەلىسىمى بويىنشا ءماجىلىس دەپۋتاتى جۇلدىز سۇلەيمەنوۆانى وقۋ-اعارتۋ ءمينيسترى لاۋازىمىنا تاعايىنداۋ تۋرالى شەشىم قابىلداندى. جاڭا مينيستر قوعامداعى بەلسەندى قىزمەتىمەن جانە ءبىلىم بەرۋ سالاسىنداعى مول تاجىريبەسىمەن بەلگىلى، - دەپ جازدى رۋسلان جەلدىباي.

Abai.kz