«QAITADAN» – مەملەكەت قولداۋىمەن ءتۇسىرىلىپ، پروكاتتا ميلليارد جيناعان العاشقى فيلم.

قازاقستاندىق رەجيسسيور دۋمان ەركىمبەكتىڭ دەبيۋتتىك تولىقمەتراجدى ءفيلمى «QAITADAN» ءۇش اپتا ىشىندە 1 ملرد تەڭگەدەن استام تابىس جيناپ، وتاندىق كينوپروكاتتا كوش باستادى.

فيلم – كينو وندىرىسىنە جۇمسالعان مەملەكەت قاراجاتىنان بەس ەسە ارتىق تابىس تاپقان العاشقى جوبا. كورەرمەن كوزايىمىنا اينالعان «QAITADAN» كينوسىنىڭ وقيعا جەلىسى، ۆيزۋالى ەرەكشە اسەر قالدىرادى.

بۇل فيلم – كوركەم شىعارما عانا ەمەس، شىنايى سەزىمگە نەگىزدەلگەن، تەرەڭ درامالىق مازمۇنداعى تۋىندى. كينو استارىندا قاۋىپسىزدىك، جاۋاپكەرشىلىك پەن بىرلىك يدەياسى بار، ءارى جاستاردى دوستىققا، باۋىرمالدىققا جەتەلەيدى. ءار ديالوگ – بۇگىنگى قوعامعا وي سالادى. فيلمدە وتباسى ينستيتۋتى دارىپتەلىپ، الەۋمەتتىك جاۋاپكەرشىلىك پەن ادامگەرشىلىك قاعيداتتارى كورىنىس تابادى.

«QAITADAN» – قازاق كينوسىنىڭ جاڭا بەلەسكە كوتەرىلگەنىن ايعاقتايتىن فيلم. 2023 جىلى پيتچينگ جەڭىمپازى اتانعان بۇل جوبا قر مادەنيەت جانە اقپارات مينيسترلىگى جانە ۇلتتىق كينونى قولداۋ مەملەكەتتىك ورتالىعىنىڭ قولداۋىمەن تۇسىرىلگەن بولاتىن.

ۇلتتىق كينونى قولداۋ مەملەكەتتىك ورتالىعىنىڭ باسقارما توراعاسى قۇرمانبەك جۇماعاليدىڭ ايتۋىنشا بۇگىندە قازاقستاننىڭ كينويندۋسترياسى قارقىندى دامىپ كەلەدى. بۇل ۇلتتىق كونتەنتتى ىلگەرىلەتۋگە، تۇراقتى قولداۋ جۇيەسىن قالىپتاستىرۋعا جانە حالىقارالىق ىنتىماقتاستىقتى كەڭەيتۋگە مۇمكىندىك بەرىپ وتىر. سونىڭ ارقاسىندا جاس رەجيسسەرلەر مەن دەبيۋتتىك جوبالاردىڭ الدىندا جاڭا پەرسپەكتيۆالار اشىلدى. «QAITADAN» – وسىنىڭ ايقىن دالەلى.

Abai.kz