قىرعىزستان بيلىگى ەل تاريحىندا اشىق ءارى ءادىل سايلاۋ وتكىزۋگە بار جاعدايدى جاسادى. بۇل تۋرالى ەل پرەزيدەنتى سادىر جاپاروۆ حالىققا جولداۋىندا ايتتى.

قىرعىزستان پرەزيدەنتى پارلامەنت سايلاۋىن جەكە ءوزى باقىلاۋعا نيەتتى.

قىرعىزستان باسشىسى 25 قىركۇيەكتە پارلامەنت ءوزىن-ءوزى تاراتۋ تۋرالى شەشىم قابىلداعانىن، ال 30 قىركۇيەكتە VIII شاقىرىلعان جوگوركۋ كەنەشتىڭ (پارلامەنت) سايلاۋىن 2025 جىلعى 30 قاراشاعا بەلگىلەۋ تۋرالى جارلىققا قول قويىلعانىن اتاپ ءوتتى.

سادىر جاپاروۆ سايلاۋشىلار الدىندا سويلەگەن سوزىندە حالىقتى ءادىل داۋىس بەرۋگە شاقىردى.

- سوڭعى 30 جىلدا ءارتۇرلى دەپۋتاتتاردى كوردىڭىزدەر، جاقسى دا، جامان دا، پوپۋليستەر دە، دەماگوگتار دا، داۋىس كوتەرگەندەر دە، شەشەندەر دە، بايلار دا، كەدەيلەر دە، داۋىستى ساتىپ الۋشىلار مەن ساتۋشىلار دا بولدى. الداعى سايلاۋدا تەك لايىقتى دەپۋتاتتارعا داۋىس بەرۋلەرىڭىزدى سۇرايمىن. ءبىز، ۇكىمەت، سايلاۋلارىڭىزدى ءادىل وتكىزۋ ءۇشىن بارلىق جاعدايدى جاسادىق. بۇل جولى ناعىز حالىق قالاۋلىلارىن – ءوز وكىلدەرىڭىزدى سايلاڭىزدار، - دەدى ول.

قىرعىز رەسپۋبليكاسىنىڭ پرەزيدەنتى الداعى پارلامەنتتىك سايلاۋدى باسىنان اياعىنا دەيىن تورەشى رەتىندە جەكە ءوزى قاداعالايتىنىن مالىمدەدى.

-ەگەر قانداي دا ءبىر وكرۋگتە ادىلەتسىز ارەكەتتەر انىقتالسا، مەن ورتالىق سايلاۋ كوميسسياسىنىڭ تەكسەرۋىنە جەكە قاتىسامىن نەمەسە كوميسسيا قۇرىپ، سول جەرگە ءوزىمنىڭ سەنىمدى وكىلدەرىمدى جىبەرەمىن. ءاربىر ءىس ءادىل قارالادى. دامىعان ەلدەر سياقتى وركەنيەت بيىگىنە ۇمتىلايىق. ەكونوميكانى، قورعانىستى، قاۋىپسىزدىكتى نىعايتايىق. حالىق تاڭداعان كانديدات جەڭۋى كەرەك. ءبىز حالىق سايلاعان دەپۋتاتتارمەن جۇمىس ىستەۋگە دايىنبىز، - دەدى قىرعىز رەسپۋبليكاسىنىڭ باسشىسى.

ەستەرىڭىزگە سالا كەتەيىك، قىركۇيەك ايىنىڭ باسىندا قىرعىزستان رەسپۋبليكاسى جوگوركۋ كەنەشى (پارلامەنت) دەپۋتاتتارىنىڭ باستاماشىل توبى پارلامەنتتى تاراتۋعا، سودان كەيىن مەرزىمىنەن بۇرىن سايلاۋ وتكىزۋگە شاقىرعان بولاتىن.

قىركۇيەكتىڭ 23-ءى كۇنى جوعارعى كەڭەستىڭ كونستيتۋتسيالىق زاڭناما، مەملەكەتتىك قۇرىلىم، سوت-قۇقىقتىق ماسەلەلەر جانە رەگلامەنت كوميتەتى 7-ءشى شاقىرىلىمدى تاراتۋ تۋرالى ۇسىنىستى ماقۇلدادى.

بۇعان دەيىن قىرعىزستاندا پارلامەنتتى تاراتۋ ماسەلەسى نەگە كوتەرىلگەنى تۋرالى جازعان ەدىك.

Abai.kz