2025 جىلى مەملەكەتتىك قولداۋ ارقىلى تۇسىرىلگەن «Qaitadan» ءفيلمى قازاقستاندىق كينويندۋسترياداعى ەڭ تابىستى كارتينالاردىڭ قاتارىنا ەندى. فيلم پروكاتتان 1 ميلليارد تەڭگەدەن استام تابىس جينادى. تۋىندى مەملەكەت جۇمساعان قاراجاتتى تولىق قايتارىپ قانا قويماي، ونى بەس ەسە ارتتىردى. بۇل جەتىستىك مەملەكەتتىك قولداۋدىڭ ناتيجەلى بولعانىن ايقىنداپ، كورەرمەننىڭ وتاندىق كينوعا دەگەن سەنىمىن نىعايتا ءتۇستى. مەملەكەت باسشىسىنىڭ تاپسىرماسى بويىنشا قر مادەنيەت جانە اقپارات مينيسترلىگى «كينەماتوگرافيا تۋرالى» زاڭعا وزگەرىستەر مەن تولىقتىرۋلار ەنگىزۋ جۇمىستارىن جۇرگىزۋدە. بۇل تۇزەتۋلەر فيلمدەردى پروكاتقا دەيىنگى ساراپتاۋ ءراسىمىن جەتىلدىرۋگە جانە ۇلتتىق فيلمدەردىڭ ساپاسىن ارتتىرۋعا باعىتتالعان.

جىلدىڭ ماڭىزدى جەتىستىكتەرىنىڭ ءبىرى – «قازاقفيلم» كينوستۋدياسىنا مەملەكەتتىك قولداۋدىڭ قايتا جاندانۋى. ستۋديا قازاق كينوسىنىڭ التىن قورىن قالپىنا كەلتىرۋ شارالارىن جالعاستىرۋدا.

سونىمەن قاتار ستۋديا عيماراتتارىن جاڭارتۋ جۇمىستارى باستالدى. سوڭعى 15 جىلدا العاش رەت جوندەۋ جۇمىستارى جەكەمەنشىك سەكتوردىڭ قاتىسۋىمەن جۇزەگە استى. جوبا تولىقتاي جەكە قاراجات ەسەبىنەن جۇرگىزىلدى.

ۇلتتىق كينونى قولداۋ مەملەكەتتىك ورتالىعى جاريالاعان كونكۋرس ناتيجەسىندە 16 جاڭا جوبا جەڭىمپاز اتاندى. ولاردىڭ قاتارىندا تاريحي جانە پاتريوتتىق تاقىرىپتارعا ارنالعان فيلمدەر بار.

2025 جىلى پروكاتقا 10 وتاندىق فيلم شىقتى. ولاردىڭ قاتارىندا «90+1»، «تارلان»، «يگرومانكا»، «كاپيتان بايتاسوۆ»، «Qaitadan»، «التىن ادام» انيماتسيالىق ءفيلمى جانە باسقا دا تۋىندىلار بار.

«Qaitadan» ءفيلمىنىڭ رەجيسسەرى دۋمان ەركىمبەك مەملەكەتتىك قولداۋدىڭ ماڭىزىن اتاپ ءوتتى.

«Qaitadan» ءفيلمى اقتاۋدا وتكەن «قورقىت اتا» فەستيۆالىن اشتى. سونىمەن قاتار ريمدە وتكەن قازاقستان كينوسى اپتالىعىنىڭ ءبىرىنشى كۇنى كورسەتىلدى. بۇدان بولەك، مەن جاس رەجيسسەرلەر مەن پروديۋسەرلەرگە ارنالعان شانحاي ىنتىماقتاستىق ۇيىمى باعدارلاماسى اياسىندا قىتايدا تاعىلىمدامادان ءوتۋ مۇمكىندىگىنە يە بولدىم. جاس بۋىنعا كورسەتىلەتىن مەملەكەتتىك قولداۋ جاڭا ماقساتتارعا جول اشىپ، قازاقستاندىق كينونىڭ جاڭا دەڭگەيدە دامۋىنا مۇمكىندىك بەرەدى»,– دەدى ول.

وتاندىق «باۋىرىنا سالۋ»، «شاتىرداعى ەكەۋ»، «پريانيكي دليا ەە وتتسا، موەگو پرادەدا، ەە دەدا»، «پوبەديتەلەي ۆيدنو نا ستارتە» جانە باسقا دا فيلمدەر اقش، رەسەي، فرانتسيا، يتاليا، قىتاي جانە وزگە ەلدەردە وتكەن حالىقارالىق كينوفەستيۆالدەرگە ۇسىنىلىپ، 30-دان استام بەدەلدى ماراپاتقا يە بولدى.

اكتەر باقىت قاجىباەۆتىڭ جەتىستىگىن دە ەرەكشە اتاپ وتكەن ءجون. ول شىۇ ەلدەرىنىڭ كينوفەستيۆالىندە «ۇزدىك اكتەر» نوميناتسياسىن يەلەندى. فەستيۆال قىتايدىڭ چۋنتسين قالاسىندا ءوتتى، وندا اكتەر «نابات وپەراتسياسى» فيلمىندەگى ءرولى ءۇشىن ماراپاتتالدى.

تامىز ايىندا قازاقستان تسينداو قالاسىندا وتكەن شىۇ ەلدەرىنىڭ كينو اپتالىعىنا قاتىستى. باعدارلاماعا «وبۋچەنيە ادەموكي» جانە «اعايىندىلار» فيلمدەرى ەندى.

قازاقستان كينوسىنىڭ كۇندەرى 15-تەن استام ەلدە ءوتتى. اتاپ ايتساق، گرەكيا، قىرعىزستان، البانيا، فرانتسيا، نورۆەگيا، يتاليا، چەحيا، جاپونيا، تۇركيا، سينگاپۋر، ازەربايجان، رەسەي، بەلگيا، وزبەكستان جانە باسقا دا مەملەكەتتەردە وتاندىق كينو كورسەتىلدى.

Abai.kz