مەملەكەت باسشىسىنىڭ وكىمىمەن ەلنۇر سابىرجانۇلى بەيسەنباەۆ قازاقستان رەسپۋبليكاسى پرەزيدەنتى اكىمشىلىگىنىڭ ىشكى ساياسات ءبولىمىنىڭ مەڭگەرۋشىسى لاۋازىمىنا تاعايىندالدى.

بۇل تۋرالى اقوردانىڭ ءباسپاسوز قىزمەتى حابارلادى.

1986 جىلى 27 ماۋسىمدا كەنتاۋ قالاسىندا دۇنيەگە كەلدى. ءال-فارابي اتىنداعى قازاق ۇلتتىق ۋنيۆەرسيتەتىنىڭ تۇلەگى. ساياساتتانۋشى، الەۋمەتتىك عىلىمدار ماگيسترى.

ءال-فارابي اتىنداعى قازۇۋ-دىڭ فيلوسوفيا جانە ساياساتتانۋ فاكۋلتەتىن بىتىرگەن.

ەڭبەك جولىن «جاستار ءۇنى» جاستار قوعامدىق ۇيىمىندا مامان رەتىندە باستاپ، كەيىننەن 2009 جىلى توراعا بولدى.

2012-2015 جىلدارى تاريح ءپانىنىڭ مۇعالىمى، قازاقستان كوممۋنيستىك حالىق پارتياسىنىڭ الماتى قالالىق فيليالىندا يدەولوگيا جانە ناسيحات جونىندەگى حاتشى قىزمەتتەرىن قوسا اتقاردى.

2016 جىلدان 2017 جىلعا دەيىن الماتى قالاسى اكىمدىگىنىڭ جاستار جوبالارى جانە ۇيىمداستىرۋ جۇمىستارى ءبولىمىنىڭ باسشىسى، جاستار ساياساتى ماسەلەلەرى باسقارماسىنىڭ باسشىسى لاۋازىمدارىندا ەڭبەك ەتتى.

2017 جىلدان 2018 جىلعا دەيىن اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە تاربيە جۇمىسى دەپارتامەنتىنىڭ ديرەكتورى بولدى.

2019 جىلى نۇر-سۇلتان قالاسى اكىمىنىڭ الەۋمەتتىك ماسەلەلەر جونىندەگى كەڭەسشىسى.

2020 جىلى «Nur Otan» پارتياسى جانىنداعى «Jas Otan» جاستار قاناتىنىڭ توراعاسى.

2021 جىلعى قاڭتاردان 2023 جىلعى قاڭتارعا دەيىن - جەتىنشى شاقىرىلعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتى.

2023 جىلعى قاڭتاردان 2023 جىلعى تامىز – «AMANAT» پارتياسىنىڭ اتقارۋشى حاتشىسى.

2023 جىلدىڭ ناۋرىزىنان باستاپ قازىرگى ۋاقىتقا دەيىن - سەگىزىنشى شاقىرىلعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، «AMANAT» پارتياسى فراكتسياسىنىڭ جەتەكشىسى.

«قۇرمەت» وردەنىمەن (2021 ج.), «قازاقستان رەسپۋبليكاسىنىڭ تاۋەلسىزدىگىنە 25 جىل» (2016 ج.), «حالىق العىسى» (2020 ج.), «قازاقستان رەسپۋبليكاسىنىڭ تاۋەلسىزدىگىنە 30 جىل» (2021 ج.) مەدالدارىمەن، قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن. ءا. نازارباەۆتىڭ (2016 ج.، 2020 ج.), قازاقستان رەسپۋبليكاسىنىڭ پرەزيدەنتى ق. ك. توقاەۆتىڭ (2019 ج.، 2020 ج.) العىس حاتتارىمەن ماراپاتتالعان.

Abai.kz