2026 جىلى مەملەكەت اتاۋلى الەۋمەتتىك كومەك ءۇشىن (ااك) 62,7 ملرد تەڭگە ءبولۋدى جوسپارلاپ وتىر. بۇل قيىن جاعدايعا تاپ بولعان وتباسىلارعا بەرىلەتىن قاراجات. 2026 جىلعى 1 اقپانداعى مالىمەتكە زەر سالساق، اتاۋلى الەۋمەتتىك كومەك 25,8 مىڭ وتباسىنىڭ قۇرامىنداعى 138,1 مىڭ ادامعا تاعايىندالىپ، جالپى تولەم كولەمى 2,3 ملرد تەڭگە بولدى، دەپ حابارلايدى Qaz365.kz.

اتاۋلى الەۋمەتتىك كومەك — تابىسى كەدەيلىك شەگىنەن تومەن وتباسىلارعا بەرىلەتىن مەملەكەتتىك الەۋمەتتىك قولداۋ. ونىڭ نەگىزگى ماقساتى — وتباسىلاردى قارجىلاي قولداۋ ارقىلى قيىن جاعدايدان شىعارۋ جانە ەڭبەككە قابىلەتتى مۇشەلەرىن جۇمىسپەن قامتۋعا سەپ بولۋ.

اتاۋلى الەۋمەتتىك كومەك بىرنەشە باعىتتى قامتيدى. اتاپ ايتقاندا، تابىسى تومەن ازاماتتارعا الەۋمەتتىك كومەك توقسان سايىن تاعايىندالادى. سونىمەن قاتار، تابىسى از وتباسىلارداعى 1 جاستان 6 جاسقا دەيىنگى بالالارعا اي سايىن ءار بالاعا 1,5 ايلىق ەسەپتىك كورسەتكىش مولشەرىندە قوسىمشا تولەم قاراستىرىلعان. 2026 جىلعى 1 اقپاندا بۇل تولەم 42,4 مىڭ مەكتەپ جاسىنا دەيىنگى بالاعا تاعايىندالىپ، جالپى قۇنى 270,4 ملن تەڭگە بولعان.

بۇدان بولەك، ااك اياسىندا جۇمىسپەن قامتۋعا جاردەم كورسەتۋ شارالارى جۇزەگە اسىرىلادى. اتاپ ايتقاندا، ەڭبەككە قابىلەتتى ازاماتتاردى جۇمىسقا ورنالاستىرۋ، ءوز كاسىبىن اشۋعا نيەتتى وتباسىلارعا قايتارىمسىز گرانت بەرۋ، قاجەت بولعان جاعدايدا قايتا دايارلاۋ جانە بىلىكتىلىكتى ارتتىرۋ كۋرستارىنا جولداۋ كوزدەلگەن.

قازاقستاندىقتار اتاۋلى الەۋمەتتىك كومەك الۋ ءۇشىن تۇرعىلىقتى جەرى بويىنشا مانساپ ورتالىعىنا، اۋىلدىق وكرۋگ اكىمدىگىنە نەمەسە ەلەكتروندى ۇكىمەت پورتالى (egov.kz) ارقىلى ءوتىنىش بەرە الادى.

Abai.kz