بۇل تىيىم 25 ساۋىردەن باستاپ كۇشىنە ەنەدى. 

شۆەيتساريا ۇكىمەتى ەۋرووداقتىڭ 19-شى پاكەتىنە سايكەس رەسەيگە قارسى سانكتسيالاردى كۇشەيتتى، دەپ حابارلايدى DW اگەنتتىگى. 

"25 ساۋىردەن باستاپ شۆەيتساريادا رەسەيلىك سۇيىتىلعان تابيعي گازدى ساتىپ الۋعا جانە يمپورتتاۋعا تولىق تىيىم سالىنادى", – دەلىنگەن ۇكىمەت تاراتقان حابارلامادا.

قولدانىستاعى ۇزاق مەرزىمدى كەلىسىمشارتتار بويىنشا وسى جىلدىڭ سوڭىنا دەيىن وتپەلى كەزەڭ كوزدەلگەن. ەۋروپالىق وداققا كىرمەيتىن شۆەيتساريا ۋكراينادا سوعىسى باستالعاننان بەرى بريۋسسەلدىڭ رەسەيگە قارسى بىرقاتار ەكونوميكالىق سانكتسيالارىنا قوسىلدى.

"بۇل شارا رەسەيدىڭ پايدالى قازبانى ساتۋدان تۇسكەن كىرىسىن ازايتۋدى ماقسات ەتەدى. سەبەبى قارجىنىڭ كوپ بولىگى ۋكرايناعا قارسى سوعىسقا كەتىپ جاتىر", – دەپ ءتۇسىندىردى شۆەيتساريا ۇكىمەتى.

بۇدان باسقا بەرن تاياۋدا كۇشىنە ەنۋى ءتيىس قوسىمشا شارالاردى دا جاريالادى. سونىڭ ىشىندە رەسەيلىك ازاماتتار مەن كومپانيالارعا كەز كەلگەن كريپتوۆاليۋتا قىزمەتىن كورسەتۋگە تىيىم سالىنادى. سونداي-اق، شۆەيتساريا فەدەرالدىق كەڭەسى ەۋرووداق ەلدەرىندە اككرەديتتەلگەن رەسەيلىك ديپلوماتتارعا شۆەيتسارياعا كىرگەندە جانە ونىڭ اۋماعىنان ترانزيتپەن وتكەندە مىندەتتى تىركەۋدى ەنگىزەدى.

Abai.kz