ايىپتالۋشىلار 2018 جىلدان 2023 جىلعا دەيىن قوماقتى قارجىنى ءوز پايدالارىنا اۋدارىپ وتىرعان.

وسكەمەندە اۋەجايدىڭ بۇرىنعى باسشىلىعىنا قاتىستى اسا ءىرى مولشەردە جىمقىرۋ ءىسى بويىنشا ۇكىم شىقتى. 

«وسكەمەن اۋەجايى» اق پرەزيدەنتى ق. مەن اتقارۋشى ديرەكتورى س. ءوز قىزمەتتىك وكىلەتتىلىكتەرىن پايدالانىپ، الدىن الا ءسوز بايلاسقان توپ قۇرامىندا بىرنەشە رەت اسا ءىرى كولەمدە بوتەن مۇلىكتى جىمقىرعاندارى انىقتالدى.

سونداي-اق، «وسكەمەن اۋەجايى» اق-نىڭ پرەزيدەنتى ك. قر قك-ءنىڭ 361-بابىنىڭ 4-بولىگى، 3-تارماعى بويىنشا سوتتالدى.

مەملەكەتتىك فۋنكتسيالاردى ورىنداۋعا ۋاكىلەتتى تۇلعا رەتىندە ك. ءوز قىزمەتتىك وكىلەتتىكتەرىن قىزمەت مۇددەسىنە قارسى پايدالانىپ، ءوز پايداسى مەن ارتىقشىلىقتارىن الۋ ماقساتىندا ارەكەت ەتكەن، بۇل «وسكەمەن اۋەجايى» اق-نىڭ (اكتسيالارىنىڭ 100% مەملەكەتكە تيەسىلى) زاڭمەن قورعالاتىن مۇددەلەرىنە ەلەۋلى زيان كەلتىرىپ، اۋىر سالدارعا اكەلگەن.

«وسكەمەن اۋەجايى» اق ماتەريالدىق-تەحنيكالىق قامتاماسىز ەتۋ توبىنىڭ باسشىسى د. ءوز قىزمەتتىك وكىلەتتىلىگىن پايدالانىپ، الدىن الا ءسوز بايلاسقان توپ قۇرامىندا ق. مەن بىرگە سەنىپ تاپسىرىلعان بوتەن مۇلىكتى جىمقىرعانى ءۇشىن قر قك-ءنىڭ 189-بابىنىڭ 2-بولىگى، 1 جانە 3-تارماقتارى بويىنشا سوتتالدى.

سوت انىقتاعانداي، ايىپتالۋشىلار 2018 جىلدان 2023 جىلعا دەيىن ەڭبەك شارتتارى بويىنشا كەلىسىمشارتتار جاساپ، سىرتقى ۇيىمدارعا تولەم شىعىستارىن كوبەيتىپ، كەلىسىمشارتتاعى سومما پەن ناقتى تولەنگەن سومما اراسىنداعى ايىرمانى ءوز پايداسىنا اۋدارىپ وتىرعان.

سوتتالۋشىلار ءوز كىناسىن تولىعىمەن مويىنداعان جوق.

ازامات ك. قر قك-ءنىڭ 361-بابىنىڭ 4-بولىگىنىڭ 3-تارمعى جانە 189-بابىنىڭ 4-بولىگى، 2-تارماعى بويىنشا 8 جىلعا باس بوستاندىعىنان ايىرىلىپ، مەملەكەتتىك قىزمەتتە قىزمەت ەتۋ قۇقىعىنان ءومىر بويىنا ايىرىلدى. س. قر قك-ءنىڭ 189-بابىنىڭ 4-بولىگىنىڭ 2-تارماعى بويىنشا 7 جىلعا باس بوستاندىعىنان ايىرىلىپ، قوسىمشا جازا رەتىندە 10 جىل مەرزىمگە بەلگىلى قىزمەت ءتۇرىن اتقارۋ قۇقىعىنان ايىرىلدى. بالاسى كامەلەتتىك جاسقا تولماعاندىقتان، سوت تاعايىنداعان جازاسىنىڭ ورىندالۋىن بالاسى 14 جاسقا تولعانعا دەيىن كەيىنگە قالدىرىلدى. د. قر قك-ءنىڭ 189-باپتىڭ 2-بولىگنىڭ 1 جانە 3-تارماقتارى بويىنشا 2 جىلعا باس بوستاندىعىنا شەكتەۋ جازاسى تاعايىندالدى. «قازاقستان رەسپۋبليكاسىنىڭ كونستيتۋتسياسىنىڭ 30 جىلدىعىنا بايلانىستى امنيستيا تۋرالى» زاڭى بويىنشا جازانىڭ مەرزىمى جارتىسىنا قىسقارتىلىپ، 1 جىلعا باس بوستاندىعىن شەكتەۋ جازاسى تاعايىندالدى جانە قوسىمشا جازا رەتىندە 3 جىل مەرزىمگە بەلگىلى قىزمەتپەن اينالىسۋ قۇقىعىنان ايىرىلدى، - دەپ حابارلادى شقو سوتىنىڭ ءباسپاسوز قىزمەتى.

سونىمەن قاتار، سوت «وسكەمەن اۋەجايى» اق-نىڭ ازاماتتىق تالاپ ارىزىن قاناعاتتاندىردى. ك.-دان 120 512 179 تەڭگە ءوندىرىلدى. ك. مەن س.-دان بىرلەسىپ 18 718 914 تەڭگە ءوندىرىلدى. ك. مەن د.-دان بىرلەسىپ 2 127 501 تەڭگە ءوندىرىلدى.

ۇكىم زاڭدى كۇشىنە ەنگەن جوق.

Abai.kz