ساياساتتانۋشى نۇرحات وراش الەۋمەتتىك جەلىدە جاڭا كونستيتۋتسيا جوباسىنىڭ ەڭ ماڭىزدى بابىنىڭ ءبىرى – 23-باپ تۋرالى پىكىرىمەن ءبولىستى.ونىڭ ايتۋىنشا، بۇل باپ حالىقتىڭ كۇندەلىكتى پىكىر ءبىلدىرۋىنەن باستاپ، عىلىمي-شىعارماشىلىق ەركىندىگىنە دەيىنگى قۇقىقتارىن ايقىندايدى.

«باپتى قاراپايىم تىلمەن تالداپ كورەيىك: نە نارسەگە كەپىلدىك بەرىلەدى؟

ەركىن ويلاۋ مەن شىعارماشىلىق: ءاربىر ازامات ءوز ويىن ەركىن ايتۋعا، عىلىممەن اينالىسۋعا جانە ونەر تۋىندىلارىن جاساۋعا قۇقىلى.

زياتكەرلىك مەنشىك: ءسىزدىڭ يدەياڭىز، جازعان كىتابىڭىز نەمەسە ويلاپ تاپقان تەحنولوگياڭىز زاڭمەن قورعالادى.

اقپارات الۋ قۇقىعى. مەملەكەتتىك قۇپيالاردان بولەك كەز كەلگەن اقپاراتتى زاڭدى جولمەن الۋعا جانە تاراتۋعا تولىق قاقىڭىز بار. بۇل – اشىق قوعامنىڭ باستى بەلگىسى»، دەپ اتاپ ءوتتى ساياساتتانۋشى.

سونداي-اق ن.وراش ەركىندىك – جاۋاپكەرشىلىكسىز بولمايتىنىن, سءوز بوستاندىعى بار ەكەن دەپ، اۋىزعا كەلگەندى ايتۋ دا دۇرىس ەمەس ەكەنىن، 23-باپتىڭ 4-ءشى جانە 6-شى تارماقتارىندا ناقتى شەكتەۋلەر جازىلعانىن تىلگە تيەك ەتتى.

«جەكە تۇلعانىڭ قادىر-قاسيەتى: باسقا ادامنىڭ ار-نامىسىنا تيۋگە بولمايدى.

قوعامدىق قاۋىپسىزدىك: مەملەكەتتىك تۇتاستىققا نۇقسان كەلتىرەتىن، سوعىستى، قاتىگەزدىكتى نەمەسە ۇلتارالىق الاۋىزدىقتى قوزدىراتىن شاقىرۋلارعا قاتاڭ تىيىم سالىنادى.

بۇل باپ بىزگە ەركىندىك بەرەدى، بىراق سول ەركىندىكتى باسقانىڭ قۇقىعىن بۇزباي، ەلدىڭ تىنىشتىعىن ساقتاي وتىرىپ پايدالانۋدى مىندەتتەيدى»، دەپ ءتۇسىندىردى ول.

Abai.kz