قازاقستان ادام كاپيتالىنىڭ Human Capital Index Plus يندەكسىندە ەۋروپا مەن ازيانىڭ بىرقاتار ەلدەرىن باسىپ وزدى.

جاڭارتىلعان Human Capital Index Plus يندەكسىندە ەل 13 ساتىعا كوتەرىلىپ، ەۋروپا مەن ازيانىڭ بىرقاتار مەملەكەتتەرىن ارتقا تاستادى.

قازاقستان ەۋروپا مەن ازيانىڭ بىرقاتار ەلىن باسىپ وزدى

HCI+ يندەكسىنىڭ كورسەتكىشتەرى بويىنشا قازاقستان ەۋروپانىڭ، ازيانىڭ جانە تاياۋ شىعىستىڭ بىرقاتار مەملەكەتتەرىنەن جوعارى بولدى.

اتاپ ايتقاندا، ەلىمىز ارگەنتينانى (200 بالل), مالايزيانى (201), گرۋزيانى (207), ازەربايجاندى (208) جانە قىتايدى (218) ارتتا قالدىردى.

سونداي-اق قازاقستان مولدوۆا مەن گرەكيادان (222 بالدان), ارمەنيادان (224), يتاليادان (225), بولگاريادان (226) جانە تۇركيادان (228) جوعارى ورنالاستى.

قازاقستاننىڭ ورتالىق ازيا ەلدەرى اراسىنداعى كوشباسشىلىعى ەرەكشە اتالىپ وتكەن. تاجىكستاننىڭ يندەكسى 138 بالدى، وزبەكستاندىكى — 170, تۇرىكمەنستاندىكى — 179, ال قىرعىزستاندىكى — 198 بالدى قۇرادى.

13 ساتىعا ءوسۋدىڭ ماڭىزى قانداي؟

ساراپشىلار رەيتينگتەگى ايتارلىقتاي ىلگەرىلەۋ مەملەكەتتىڭ الەۋمەتتىك سالاعا سالعان ينۆەستيتسيالارىنىڭ ۇزاقمەرزىمدى اسەرىن كورسەتەتىنىن ايتادى.

ءبىلىم دەڭگەيى، دەنساۋلىق جاعدايى جانە ءومىر ءسۇرۋ ۇزاقتىعى سياقتى ادام كاپيتالىنىڭ كورسەتكىشتەرى بىرتىندەپ وزگەرەدى جانە جۇيەلى مەملەكەتتىك ساياسات پەن ۇزاق مەرزىمدى ينۆەستيتسيالاردى تالاپ ەتەدى، - دەپ جازىلعان دۇنيەجۇزىلىك بانكتىڭ تالداۋىندا.

سوندىقتان قازاقستاننىڭ رەيتينگتەگى ءوسىمى ءبىلىم بەرۋ، دەنساۋلىق ساقتاۋ جانە الەۋمەتتىك ساياسات سالاسىنداعى رەفورمالاردىڭ جيىنتىق ناتيجەسى رەتىندە قاراستىرىلادى.

ادام كاپيتالى جانە ەكونوميكالىق دامۋ

دۇنيەجۇزىلىك بانكتىڭ باعالاۋىنشا، ادام كاپيتالى تۇراقتى ەكونوميكالىق ءوسۋدىڭ نەگىزگى فاكتورلارىنىڭ ءبىرى.

حالقىنىڭ ءبىلىم دەڭگەيى جوعارى جانە دەنساۋلىق كورسەتكىشتەرى جاقسى ەلدەر ەڭبەك ونىمدىلىگىنىڭ جوعارىلىعىن جانە ەكونوميكانىڭ تۇراقتىلىعىن كورسەتەدى، - دەپ اتاپ ءوتتى ساراپشىلار.

قازاقستان ءۇشىن رەيتينگتەگى پوزيتسيانى جاقسارتۋ ەكونوميكانى ءارتاراپتاندىرۋ جانە دامۋدىڭ تەحنولوگيالىق مودەلىنە كوشۋ الەۋەتىن نىعايتۋدى بىلدىرەدى.

HCI+ يندەكسى نەنى ولشەيدى؟

Human Capital Index Plus (HCI+) يندەكسى بالانىڭ كامەلەتكە تولىپ، ەڭبەك ومىرىنە ارالاسقان ساتىنە دەيىن جيناي الاتىن ادام كاپيتالىنىڭ دەڭگەيىن باعالايدى.

كورسەتكىش قوعام دامۋىنىڭ نەگىزگى فاكتورلارىن، سونىڭ ىشىندە ءبىلىم ساپاسىن، دەنساۋلىق ساقتاۋ جۇيەسىنىڭ جاعدايىن، جۇمىسپەن قامتۋ پەرسپەكتيۆالارىن ەسكەرەدى.

ءىس جۇزىندە يندەكس الەۋمەتتىك سالانىڭ اعىمداعى جاعدايىن عانا ەمەس، سونىمەن بىرگە ەلدىڭ بولاشاق ەكونوميكالىق الەۋەتىن مەملەكەتتىڭ ءوز ازاماتتارىن دامىتۋعا قانشالىقتى ءتيىمدى ينۆەستيتسيا سالىپ جاتقانىن كورسەتەدى.

Abai.kz