جوبالىق كەڭسەنىڭ وتىرىستارىندا سالىق كودەكسىنىڭ نورمالارىن يمپلەمەنتاتسيالاۋعا بايلانىستى بارلىعى 60 ماسەلە قارالعان.

- اتاپ ايتقاندا، دەنساۋلىق ساقتاۋ سالاسىندا ءدارى-دارمەكتەر مەن مەديتسينالىق بۇيىمداردى يمپورتتاۋ كەزىندە ققس قولدانۋعا جانە ورفاندىق جانە الەۋمەتتىك ماڭىزى بار ءدارى-دارمەكتەردى ققس-تان بوساتۋعا قاتىستى زاڭعا تاۋەلدى اكتىلەرگە وزگەرىس ەنگىزۋ جۇمىسى اياقتالۋدا. بيىلعى 13 اقپاندا دەنساۋلىق ساقتاۋ مينيسترلىگىنىڭ ققس-سىز ءدارى-دارمەكتەر مەن مەديتسينالىق بۇيىمدارعا شەكتى باعانى بەلگىلەۋ تۋرالى بۇيرىعى قابىلداندى، – دەلىنگەن حابارلامادا. 

ونەركاسىپ جانە قۇرىلىس، ەنەرگەتيكا، قارجى مينيسترلىكتەرى، تابيعي مونوپوليالاردى رەتتەۋ كوميتەتى جانە «سامۇرىق-قازىنا» وڭايلاتىلعان دەكلاراتسيا نەگىزىندە ارناۋلى سالىق رەجيمىن قولداناتىن سالىق تولەۋشىلەردەن تاۋارلاردى، جۇمىستار مەن كورسەتىلەتىن قىزمەتتەردى ساتىپ الۋعا قاتىستى ساتىپ الۋ قاعيدالارىنداعى وزگەرىستەردى پىسىقتاپ جاتىر.

- بۇل كۆازيمەملەكەتتىك كومپانيالار تاراپىنان شىعىنداردى ۇلعايتپاي سالىق زاڭناماسىن، وندىرىستىك پروتسەستەردى ساقتاۋعا جانە باسەكەلەستىك ورتانى قولداۋعا باعىتتالعان تەتىكتەر تۋرالى. سالىق كودەكسىنىڭ يدەولوگياسىن نەگىزگە الا وتىرىپ، ءتيىستى وزگەرىستەردى ازىرلەۋ ءۇشىن بىرىڭعاي نەگىزدى ۇلتتىق ەكونوميكا مينيسترلىگى قالىپتاستىرادى، – دەلىنگەن ۇكىمەت حابارلاماسىندا. 

Abai.kz