جەتىسۋ وبلىسىندا حالىقارالىق ۆولونتەرلار جىلى اياسىندا «Zhetysu Youth Forum 2026» وڭىرلىك جاستار فورۋمى ءوتتى. فورۋم ۆولونتەرلەر، ۇكىمەتتىك ەمەس ۇيىمداردىڭ مۇشەلەرى، ستۋدەنتتەر، وقۋشىلار – جالپى سانى 500-دەي ادامنىڭ باسىن قوستى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى. 

ەركىن پىكىر الماسۋ فورماتىندا وتكەن فورۋمدا وبلىس اكىمىنىڭ ورىنباسارى دياس ەسداۋلەتوۆ قاتىستى. فورۋمعا قاتىسۋشىلار جاستاردىڭ ەل دامۋىنداعى ءرولى تۋرالى ءوز ويلارىن ورتاعا سالىپ، ۇسىنىستارىن ايتتى. نەگىزىنەن ۆولونتەرلىك مادەنيەتتى دامىتۋ تەتىكتەرى، سونداي-اق جاستاردى قولداۋ باعىتىندا جۇزەگە اسىرىلاتىن باستامالار تالقىلاندى.

- بارىمىزگە بەلگىلى، ەلىمىزدىڭ پرەزيدەنتى قاسىم-جومارت توقاەۆتىڭ باستاماسىمەن بۇۇ-نىڭ باس اسسامبلەياسى 2026 جىلدى حالىقارالىق ۆولونتەرلەر جىلى دەپ جاريالاعان بولاتىن. سوعان سايكەس اتالعان جىلدىڭ رەسمي اشىلۋى رەتىندە بۇگىن وڭىرلىك جاستار فورۋمىن ۇيىمداستىردىق. مۇنداي ەركىن فورماتتاعى شارالار جاستاردىڭ ءوزارا تاجىريبە الماسۋىنا، اشىق پىكىرتالاس الاڭىن قالىپتاستىرۋعا، ولاردى قوعامدىق جانە الەۋمەتتىك جوبالارعا بەلسەندى قاتىسۋعا ىنتالاندىرادى دەپ ويلايمىن، - دەدى «Jetisu jastary» كمم ديرەكتورى شاميل ۆانكەەۆ.

باسقوسۋدىڭ نەگىزگى سپيكەرلەرى رەتىندە ءسوز العان «Future IT» روبوتوتەحنيكا مەكتەبىنىڭ نەگىزىن قالاۋشى دامير نۇركەجانوۆ وزىق تەحنولوگيالاردى مەڭگەرۋدىڭ جاستارعا بەرەتىن جاڭا مۇمكىندىكتەرى جايلى باياندادى. سول سياقتى بلوگەر، ەكو بەلسەندى دۋلات نابيەۆ تە سپيكەرلەر قاتارىندا ءسوز سويلەپ، قازاقستان ەستراداسىنىڭ جۇلدىزدارى ونەر كورسەتتى.

فورۋمعا قاتىسۋشىلار دا ءوز پىكىرلەرىن ءبىلدىردى.

- ءبىزدىڭ ۆولونتەرلىك قوزعالىسىمىز شالا تۋعان نارەستەلەرگە جۇننەن جىلى كيىمدەر (شۇلىق، باس كيىم، كۇرتەشە) توقۋمەن اينالىساتىن ادامداردى ورتاق ماقساتقا بىرىكتىرەدى. دايىن كيىمدەردى اۋرۋحانالاردىڭ جانساقتاۋ جانە پاتولوگيا بولىمدەرىنە رياسىز نيەتپەن تاپسىرامىز. ءبىزدىڭ بۇل بۇيىمدارىمىز سابيلەردى جىلىتۋعا كومەكتەسسە ەكەن دەيمىز. مەيىرىم تانىتۋ، قايىرىمدىلىق كورسەتۋ قيىن ەمەس، تەك ادال نيەت بولسا جەتىپ جاتىر. بارلىق جاستاردى ءبىزدىڭ قاتارىمىزعا قوسىلۋعا شاقىرامىن، - دەدى تالدىقورعانداعى «28 ىلمەك» كلۋبىنىڭ ۇيلەستىرۋشىسى جاننا ساكوۆيچ.

- مەنىڭ ۆولونتەرلىك قىزمەتپەن اينالىسىپ جۇرگەنىمە ەكى جىلدان استام ۋاقىت بولدى. وسى ۋاقىت ىشىندە ۆولونتەرلىك تەك ادامدارعا كومەكتەسۋ عانا ەمەس، قوعاممەن ەتەنە جاقىن بولىپ، ءتۇرلى الەۋمەتتىك ماسەلەلەرگە بەيجاي قاراماۋ ەكەنىن ءتۇسىندىم. ۆولونتەرلىك ارقىلى ءبىز تەك مۇقتاج جاندارعا قولداۋ كورسەتىپ قانا قويماي، تابيعاتتى قورعاۋ، قورشاعان ورتانى ايالاۋ سياقتى ماڭىزدى باعىتتارعا دا ءوز ۇلەسىمىزدى قوسىپ كەلەمىز. ءوزىم وسىنداي جاستارعا ارنالعان باسقوسۋلارعا ءجيى قاتىسامىن. سەبەبى مۇنداي كەزدەسۋلەردە ءوزىمىز سەكىلدى بەلسەندى جاستارمەن تانىسىپ، ورتاق يدەيالاردى بىرگە تالقىلاۋعا مۇمكىندىك بەرەدى، - دەدى ءىلياس جانسۇگىروۆ اتىنداعى جەتىسۋ ۋنيۆەرسيتەتىنىڭ 4 كۋرس ستۋدەنتى تەمىرلان تولەگەن.

فورۋم سوڭىندا جەتىسۋلىق جاستار 15 ناۋرىزداعى رەفەرەندۋمعا بەلسەنە قاتىسۋعا دايىن ەكەندىكتەرىن ءبىلدىردى. وسى ورايدا ولار وسكەلەڭ ۇرپاقتىڭ ورتاق بولاشاققا دەگەن جاۋاپكەرشىلىكتى سەزىنۋىنىڭ جانە ەلدىڭ قوعامدىق-ساياسي ومىرىنە قاتىسۋىنىڭ ماڭىزدىلىعىن اتاپ ءوتتى.

جالپى، قازىر جەتىسۋ وبلىسىندا 13 ۆولونتەرلىك ۇيىم مەن 18 باستاماشى توپ بەلسەندى جۇمىس ىستەيدى، ولارعا شامامەن 1100-دەن اسا جاس تارتىلعان. وتكەن جىلى  مۇقتاج جاندارعا كومەك كورسەتۋ، ەسكەرتكىشتەردى تازالاۋ، ەكولوگيالىق، الەۋمەتتىك جانە باسقا دا باعىتتاردا 3 مىڭداي ۆولونتەرلىك اكتسيا ۇيىمداستىرىلدى.

جەتىسۋ وبلىسى اكىمىنىڭ ءباسپاسوز قىزمەتى.