اتوم ەنەرگياسى جونىندەگى حالىقارالىق اگەنتتىك (ماگاتە) وكىلدەرى وزبەكستاندا سالىنىپ جاتقان اەس قۇرىلىسىن باقىلاۋ ءۇشىن ۇستىمىزدەگى جىلدىڭ ەكىنشى جارتىسىندا كورشىلەس ەلگە كەلەدى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى.

بۇل تۋرالى پاريجدە وتكەن II حالىقارالىق اتوم ەنەرگياسى ءسامميتى اياسىندا كەزدەسكەن Uzatom اگەنتتىگىنىڭ ديرەكتورى ازيم احمەدحادجاەۆ پەن اتوم ەنەرگياسى جونىندەگى حالىقارالىق اگەنتتىكتىڭ باس ديرەكتورى رافاەل گروسسي ۋاعدالاستى.

سونداي-اق، تاراپتار جيزاق وبلىسىنىڭ فاريش اۋدانىندا بوي كوتەرىپ جاتقان ەلدەگى العاشقى اەس الاڭىندا العاشقى بەتون قۇيۋ جۇمىستارىنىڭ باستالۋىن تالقىلادى.

ماگاتە باسشىسى جوبانىڭ ماڭىزدىلىعىنا توقتالىپ، شاعىن جانە ۇلكەن قۋاتتى رەاكتورلاردى ءبىر كەشەنگە ينتەگراتسيالاۋ جوسپارىنا ەرەكشە نازار اۋداردى.

— كەزدەسۋ قورىتىندىسى بويىنشا رافاەل گروسسي ۇيىمنىڭ وزبەكستاننىڭ يادرولىق باعدارلاماسىن ىسكە اسىرۋ ۇمتىلىسىنا قولداۋ كورسەتۋ جالعاساتىنىن اتاپ ءوتتى. سونىمەن قاتار، ازيم احمەدحادجاەۆ ونى العاشقى بەتون قۇيۋ راسىمىنە قاتىسۋعا شاقىردى، - دەلىنگەن Uzatom اگەنتتىگى تاراتقان حابارلامادا.

وزبەكستاندا سالىنىپ جاتقان اەس جيزاق، سامارقاند جانە ناۋاي وبلىستارىن ەلەكتر ەنەرگياسىمەن قامتاماسىز ەتپەك.

23 جەلتوقساندا وزبەكستاندا اەس قۇرىلىسى بويىنشا قوعامدىق تىڭداۋ ءوتتى.

Abai.kz