قازاقستاندا ناۋرىز مەرەكەسىنە وراي «Nauryz Sale» رەسپۋبليكالىق اكتسياسى باستالدى. مەرەكەلىك ناۋقان 13–23 ناۋرىز ارالىعىندا ەل اۋماعىندا ءوتىپ، جۇزدەگەن ساۋدا الاڭىن بىرىكتىرىپ، تۇرعىندار مەن ەل قوناقتارى ءۇشىن كوكتەمگى جاڭارۋ مەن ءتيىمدى ساۋدانىڭ ەرەكشە اتموسفەراسىن قالىپتاستىرۋدا.

اكتسيا اياسىندا ساۋدا نىساندارى ساتىپ الۋشىلارعا ازىق-تۇلىك جانە ازىق-تۇلىك ەمەس تاۋارلارعا 10–70 پايىزعا دەيىن جەڭىلدىكتەر ۇسىنۋدا. اكتسيالىق تاۋارلار ارنايى مەرەكەلىك باعا بەلگىلەرىمەن جانە ناۆيگاتسيالىق كورسەتكىشتەرمەن بەلگىلەنگەن، بۇل كەلۋشىلەرگە جەڭىلدىكپەن ۇسىنىلعان تاۋارلاردى وڭاي تابۋعا مۇمكىندىك بەرەدى.

اكتسياعا شامامەن 300 ساۋدا سۋبەكتىسى قاتىسۋدا. ولاردىڭ قاتارىندا 140 ساۋدا ءۇيى مەن ساۋدا-ويىن-ساۋىق ورتالىعى، 140 ساۋدا جەلىسى جانە 20 ينتەرنەت-پلاتفورما بار. قاتىسۋشىلار اراسىندا ەلىمىزدىڭ ءىرى ساۋدا جەلىلەرى Magnum Cash&Carry, Small, Galmart, انۆار، دينا، Toimart, استىكجان، Greenwich جانە باسقالارى بار.

اكتسيا بارىسىندا وتاندىق وندىرۋشىلەردى قولداۋعا ەرەكشە كوڭىل بولىنۋدە. ساۋدا ورتالىقتارىندا قازاقستاندىق كومپانيالاردىڭ ونىمدەرى ۇسىنىلعان ارنايى ايماقتار ۇيىمداستىرىلىپ، وندا تاۋارلار نارىقتىق باعادان ورتا ەسەپپەن 10–20 پايىزعا تومەن باعامەن ساتىلۋدا.

ساتىپ الۋشىلار دا بىرقاتار تاۋارلار باعاسىنىڭ ايتارلىقتاي تومەندەگەنىن اتاپ وتۋدە.

«جەڭىلدىكتەر وتە كوپ ەكەنىن كورىپ وتىرمىن. وسى ساۋدا جەلىسىندە اكتسيا ارقىلى 5 كەلى ۇندى 1400 تەڭگەگەساتىپ الدىم، سونداي-اق كوكونىستەردىڭ باعاسى دا تومەندەگەن — كارتوپ پەن ءسابىز الدىم. شىنىمدى ايتسام، 100 تەڭگەلىك باعا بەلگىلەرىن بۇرىننان كورمەپ ەدىم، بۇگىن شىنىمەن مەرەكەلىك جەڭىلدىكتەر سەزىلەدى»، — دەدى ەلوردا تۇرعىنى اقبوتا جاقاەۆا.

مەرەكەلىك كوڭىل كۇيدى ەلىمىزدىڭ بارلىق وڭىرىندە ءوتىپ جاتقان اۋىل شارۋاشىلىعى جارمەڭكەلەرى دە تولىقتىرۋدا. مۇندا تۇرعىندار جەرگىلىكتى وندىرۋشىلەردىڭ جاڭا ونىمدەرىن قولجەتىمدى باعادا ساتىپ الا الادى.

«Nauryz Sale» اكتسياسى ناۋرىزدى جالپىحالىقتىق مەرەكەلەۋدىڭ ءبىر بولىگىنە اينالىپ، وتاندىق بيزنەستى قولداۋعا، ىشكى ساۋدانى دامىتۋعا جانە قازاقستاندىقتار ءۇشىن مەرەكە قارساڭىنداعى ساۋدانى ودان ءارى ءتيىمدى ەتۋگە باعىتتالعان.

Abai.kz