اۋعانستان بيلىگى پاكىستاندى كابۋلداعى ەسىرتكىگە قارسى رەابيليتاتسيالىق اۋرۋحاناعا سوققى جاسادى دەپ ايىپتادى. شابۋىلدان كەم دەگەندە 400 ادام قازا تاپقان.

APnews-ءتىڭ اقپاراتىنشا، اۋعانستان ۇكىمەتى وكىلى حامدۋللا فيترات X جەلىسىندە جاريالاعان حابارلاماسىندا سوققىنىڭ ساعات 21:00-دە جاسالعانىن، 2 000 ورىندىق اۋرۋحانانىڭ ءىرى بولىكتەرى قيراعانىن مالىمدەدى. وعان قوسا، شامامەن 250 ادام جاراقات الدى.

جەرگىلىكتى تەلەارنالار قاۋىپسىزدىك كۇشتەرىنىڭ ءورتتى ءسوندىرىپ، زارداپ شەككەندەردى تاسىمالداپ جاتقان بەينەماتەريالدارىن كورسەتتى. اۋعانستان ۇكىمەتىنىڭ وكىلى زابيحۋللا مۋدجاحيد پاكىستاندى «اۋرۋحانالاردى جانە بەيبىت تۇرعىنداردى نىساناعا الۋ ارقىلى قورلىق جاساۋ» دەپ ايىپتاپ، بۇل ارەكەتتى ادامزاتقا قارسى قىلمىس دەپ اتادى.

پاكىستان پرەمەر-ءمينيسترى شەحباز ءشاريفتىڭ وكىلى مۇشارراف زايدي اۋرۋحاناعا سوققى جاسالعانى تۋرالى ايىپتاۋدى نەگىزسىز دەپ سانادى. پاكىستاننىڭ اقپارات ءمينيسترى اتتاۋللا تارار اۋە سوققىلارى تەك كابۋل مەن شىعىس افعانستانداعى اسكەري وبەكتىلەرگە جاسالعانىن اتاپ ءوتتى. ونىڭ ايتۋىنشا، كابۋلداعى ەكى نىساندا «تەحنيكالىق ينفراقۇرىلىم جانە وق-ءدارى قويمالارى» جويىلعان.

بارلىق نىسان تەك اۋعانستانداعى تاليبان رەجيمى ارقىلى قولداۋ كورسەتىلەتىن تەررورلىق توپتارعا باعىتتالعان، - دەدى تارار.

Abai.kz