الماتىدا وتكەن «قازىرگى زامانعى قازاق رومانى» ادەبي جوباسىنىڭ قورىتىندى سالتاناتى ۇلتتىق ادەبيەت ءۇشىن ماڭىزدى وقيعاعا اينالدى. جوبا قازىرگى قازاق پروزاسىن دامىتۋعا، جاڭا ەسىمدەردى ادەبيەتكە تارتۋعا جانە قوعامداعى رۋحاني سۇرانىستى ارتتىرۋعا باعىتتالعان اۋقىمدى باستاما رەتىندە باعالاندى.

Cۋرەت: شارا ۇيىمداستىرۋشىلارىنان الىندى

بايقاۋعا 3000-نان استام ءوتىنىم كەلىپ ءتۇسىپ، ولاردىڭ ىشىنەن ۇزدىك دەپ تانىلعان 8 اۆتور فينالعا ءوتتى. فيناليستەردىڭ جەتەۋى 3 000 000 تەڭگە كولەمىندە قالاماقى الىپ، ولاردىڭ شىعارمالارى 1000 دانامەن جارىق كوردى. سالتاناتتى كەش بارىسىندا بۇل رومانداردىڭ تۇساۋكەسەرى ءوتىپ، وقىرمانعا جول تارتتى. ءار روماننىڭ 750 داناسى قر ۇلتتىق كىتاپحاناسىنا سىيعا بەرىلىپ، سول ارقىلى ەلىمىزدىڭ تۇكپىر-تۇكپىرىنە تاراتىلادى.

فيناليستەر قاتارىندا دۋمان رامازان («سىناق»), قۋانىش جيەنباي («ارالقۇمداعى اقىرعى ايالداما»), نۇرجان قۋانتايۇلى («وپاسىز ويىن»), اسقار التاي («كاسكاد»), مۇرات الماسبەك («ەكى جاعالاۋ»), قۋات بوراش («تاۋبە»), ايىم اقىلتاي («قارىز») سىندى ەسىمى ەلگە بەلگىلى قالامگەرلەر، جاس جازۋشىلار بار.

ال بايقاۋدىڭ باس جۇلدەسى – 15 000 000 تەڭگە قازاقتىڭ كورنەكتى جازۋشىسى جۇسىپبەك قورعاسبەككە «كەلندەگى كوكجال» رومانى ءۇشىن تابىستالدى. سونىمەن قاتار، بۇل شىعارما جەلىسىمەن كوركەم فيلم ءتۇسىرىلىپ، ۇلكەن ەكرانعا شىعۋى جوسپارلانىپ وتىر. بۇل – ادەبي تۋىندىنىڭ جاڭا دەڭگەيگە كوتەرىلىپ، كەڭ اۋديتورياعا جەتۋىنە مۇمكىندىك بەرەدى.

جوبا ERG ديرەكتورلار كەڭەسىنىڭ توراعاسى شۋحرات يبراگيموۆتىڭ قولداۋىمەن جۇزەگە اسىرىلدى. ءوزىنىڭ بايقاۋ قاتىسۋشىلارىنا ارناپ جولداعان قۇتتىقتاۋ حاتىندا ول ۇلتتىق ادەبيەتتىڭ ماڭىزىنا ەرەكشە توقتالىپ، قازىرگى زامان جازۋشىلارىنا ۇلكەن ءۇمىت ارتاتىنىن جەتكىزدى:

«XXI عاسىردىڭ بەل ورتاسىندا بۇگىنگى جاس ۇرپاققا ۇلتتىق قۇندىلىقتار اۋاداي قاجەت دەپ سەنەمىن. ول قۇندىلىقتار تەك تامىرى تەرەڭ تاريحىمىزعا سۇيەنىپ قانا قويماي، يننوۆاتسيالار مەن تسيفرلىق تەحنولوگيالار ۇستەمدىك ەتەتىن اشىق الەمدە بولاشاقتى سەنىمدى قۇرۋعا جول كورسەتۋى ءتيىس».

Cۋرەت: شارا ۇيىمداستىرۋشىلارىنان الىندى

ونىڭ ايتۋىنشا، جاڭا زاماننىڭ جاڭا قاھارماندارىن قالىپتاستىرۋ – ادەبيەتتىڭ باستى مىندەتتەرىنىڭ ءبىرى. وسى تۇرعىدا مۇنداي بايقاۋلار جاس قالامگەرلەرگە جول اشىپ، ۇلتتىق يدەيانى جاڭاشا پايىمداۋعا مۇمكىندىك بەرەدى. بايقاۋعا مىڭداعان ادامنىڭ قاتىسۋى قوعامداعى ادەبيەتكە دەگەن قىزىعۋشىلىقتىڭ جوعارى ەكەنىن كورسەتتى.

جالپى، «قازىرگى زامانعى قازاق رومانى» بايقاۋى تەك جەڭىمپازداردى انىقتاپ قانا قويماي، قازاق پروزاسىنىڭ جاڭا كەزەڭگە قادام باسقانىن ايقىندادى. بۇل باستاما ۇلتتىق ادەبيەتتىڭ مازمۇنىن بايىتىپ، جاڭا بۋىن قالامگەرلەردىڭ قالىپتاسۋىنا جول اشاتىن ماڭىزدى مادەني پلاتفورماعا اينالىپ وتىر.

سالتاناتتى شارا بارىسىندا قر مادەنيەت جانە اقپارات ءمينيسترى ايدا بالاەۆانىڭ قۇتتىقتاۋ حاتى وقىلدى. سونداي-اق، شاراعا قر جازۋشىلار وداعىنىڭ توراعاسى مەرەكە قۇلكەنوۆ، تۇركسوي باس حاتشىسىنىڭ كەڭەسشىسى قانات ساماتۇلى، حالىق جازۋشىسى بەكسۇلتان نۇرجەكەۇلى، "قازاق ادەبيەتى" گازەتىنىڭ باس رەداكتورى باۋىرجان جاقىپ، قر ۇلتتىق كىتاپحاناسىنىڭ ديرەكتورى عازيزا قۇدايبەرگەنوۆا، باسپاگەر تەمىرعالي كوپباي، بەلگىلى جۋرناليستەر قاينار ولجاي، قانات اۋەسباي سەكىلدى ءبىر توپ زيالى قاۋىم وكىلدەرى قاتىستى.

Abai.kz