قازاقستان Insider Global Education Index رەيتينگىندە 0,092 بالل جيناپ، 18-ورىنعا يە بولدى جانە تۇراقتى دامىپ كەلە جاتقان ءارى حالىقارالىق دەڭگەيدە ىقپالداسقان ءبىلىم بەرۋ جۇيەلەرى بار ەلدەر توبىنا ەندى.

توپ-20 ىشىندەگى بۇل پوزيتسيا سالانىڭ جۇيەلى ترانسفورماتسياسىن جانە ەلدىڭ جاھاندىق ءبىلىم بەرۋ كەڭىستىگىندەگى ىقپالىنىڭ ارتىپ كەلە جاتقانىن كورسەتەدى. قازاقستان پولشا (19-ورىن), ءباا (20-ورىن), سونداي-اق مەكسيكا، برازيليا جانە وڭتۇستىك افريكا سياقتى ءىرى ەكونوميكالاردى باسىپ وزىپ، اكادەميالىق جانە عىلىمي ينفراقۇرىلىمدى بەلسەندى دامىتىپ جاتقان نيدەرلاند (17-ورىن) پەن ساۋد ارابياسىمەن (16-ورىن) ءبىر دەڭگەيدە باسەكەلەسۋدە.

رەيتينگ كوشىن ايقىن باسىمدىقپەن اقش باستاپ تۇر، ودان كەيىن جاھاندىق ءبىلىم بەرۋ جانە عىلىمي كۇن ءتارتىبىن ايقىندايتىن ۇلىبريتانيا مەن قىتاي ورنالاسقان. العاشقى وندىقتا سونداي-اق گەرمانيا، اۋستراليا، جاپونيا جانە وڭتۇستىك كورەيا بار، بۇل ەلدەردە زەرتتەۋ ۋنيۆەرسيتەتتەرىنىڭ شوعىرلانۋى جوعارى جانە عىلىمعا سالىناتىن ينۆەستيتسيا كولەمى ايتارلىقتاي.

رەيتينگ ۋنيۆەرسيتەتتەردىڭ QS Top 1000 تىزىمىندەگى ۇلەسى، ولاردىڭ ورتاشا پوزيتسيالارى جانە ءبىلىم بەرۋگە باعىتتالعان مەملەكەتتىك ينۆەستيتسيالار دەڭگەيى سياقتى ءۇش نەگىزگى پارامەتر نەگىزىندە قالىپتاستى. بۇل كورسەتكىشتەر كادر دايارلاۋ ساپاسىمەن، عىلىمي بازامەن جانە جوعارى وقۋ ورىندارىنىڭ حالىقارالىق ىقپالداسۋىمەن تىكەلەي بايلانىستى.

وسى تۇرعىدا قازاقستان ءوزىنىڭ تۇراقتى دامۋ مودەلىن قالىپتاستىرىپ كەلەدى. بۇگىندە ەلدىڭ 10-نان استام ۋنيۆەرسيتەتى QS Top 1000 قاتارىنا كىرەدى، ولاردىڭ قاتارىندا ءال-فارابي اتىنداعى قازۇۋ، ل.ن. گۋميلەۆ اتىنداعى ەۇۋ جانە Satbayev University بار. 300-800 ورىندار ارالىعى جاھاندىق ءبىلىم بەرۋ كارتاسىنداعى پوزيتسيالاردى نىعايتىپ، ودان ءارى ىلگەرىلەۋگە نەگىز قالايدى.

ءجىو-ءنىڭ 3-4%-ى دەڭگەيىندەگى تۇراقتى مەملەكەتتىك قارجىلاندىرۋ جۇيەنىڭ بولجامدىلىعىن قامتاماسىز ەتىپ، جوعارى ءبىلىم بەرۋدەگى اۋقىمدى رەفورمالاردى قولدايدى. سونىمەن قاتار حالىقارالىق سەرىكتەستىكتەر كۇشەيىپ، اكادەميالىق ۇتقىرلىق كەڭەيىپ، ۋنيۆەرسيتەتتەر مەن يندۋستريا اراسىنداعى بايلانىس نىعايىپ كەلەدى.

قازىرگى كەزەڭنىڭ باستى ەرەكشەلىگى – جاھاندىق رەيتينگتىڭ «ورتاڭعى يادروسى» اياسىنداعى باسەكەگە قابىلەتتىلىكتىڭ ارتۋى. مۇندا زەرتتەۋ ساپاسى، جاھاندىق ىقپالداسۋ جانە ۋنيۆەرسيتەتتەردىڭ حالىقارالىق عىلىمي تىزبەكتەردىڭ ءبىر بولىگىنە اينالۋ قابىلەتى شەشۋشى ءرول اتقارادى.

قازاقستان بەرىك ينستيتۋتسيونالدىق نەگىز قالىپتاستىرىپ، اكادەميالىق بەدەلىن ارتتىرىپ كەلەدى جانە وڭىردەگى ەڭ قارقىندى دامىپ كەلە جاتقان ءبىلىم بەرۋ ورتالىقتارىنىڭ ءبىرى رەتىندە ورنىعۋدا. جاھاندىق تالانتتار ءۇشىن باسەكە كۇشەيگەن جاعدايدا ءدال وسىنداي پوزيتسيالار ۇزاق مەرزىمدى ەكونوميكالىق ءوسىم مەن بىلىمگە نەگىزدەلگەن ەكونوميكاعا كوشۋ ءۇشىن بەرىك ىرگەتاس بولادى.

Abai.kz