تۇركىستان وبلىسى اقسۋ اۋىلىنىڭ تۇرعىنى ۆلاديسلاۆ گولياركو قالدىق كولەمىن ازايتىپ قانا قويماي، تۇراقتى بيزنەس قالىپتاستىرۋعا مۇمكىندىك بەرگەن ەكولوگيالىق جوبانى ىسكە قوستى.

باستاما جاھاندىق ەكولوگيالىق قور مەن بىرىككەن ۇلتتار ۇيىمىنىڭ دامۋ باعدارلاماسى بولگەن شاعىن گرانتتىڭ ارقاسىندا جۇزەگە اسقان. الىنعان قارجىعا كاسىپكەر العاشقى قوقىستى بولەك جيناۋعا ارنالعان كونتەينەرلەردى ءوز اۋلاسىنا ورناتقان.

جۇيە قاراپايىم ءارى ءتيىمدى بولىپ شىققان: اۋىل تۇرعىندارى پلاستيك، شىنى جانە قاعازدى سۇرىپتاپ بولەدى، سودان كەيىن قالدىقتار قايتا وڭدەۋگە جىبەرىلەدى. شيكىزات تازارتىلىپ، پرەستەلىپ، قايتا وڭدەۋشى كاسىپورىندارعا وتكىزىلەدى. ونىڭ ۇستىنە تۇسكەن تابىستىڭ ءبىر بولىگى قايتادان اۋىل تۇرعىندارىنا قايتارىلادى، ال ولار بۇل قاراجاتتى قايدا جۇمساۋدى وزدەرى شەشەدى.

ۋاقىت وتە كەلە جوبا اۋقىمى كەڭەيگەن. تۇرعىندارعا ىڭعايلى بولۋ ءۇشىن ءموبيلدى سەرۆيس ەنگىزىلگەن: تاكسي شاقىرعانداي، پايدالانۋشىلار سۇرىپتالعان قوقىستىڭ سۋرەتىن جىبەرىپ، مەكەنجايىن كورسەتەدى، سودان كەيىن قالدىقتار جەدەل تۇردە الىپ كەتىلەدى.

بۇگىندە جۇيەگە شامامەن 1 000 وتباسى، 200-گە جۋىق كاسىپورىن جانە 11 مەكتەپ قوسىلعان. وندىرىستىك تسەحتا 12 ادام جۇمىس ىستەيدى، ال قايتا وڭدەلەتىن شيكىزات كولەمى جىلىنا 300 توننادان اسادى.

ۆلاديسلاۆ گولياركونىڭ جوباسى جەرگىلىكتى باستامانىڭ اۋقىمدى ەكولوگيالىق قوزعالىسقا اينالىپ، قوعامعا ناقتى پايدا اكەلە الاتىنىنىڭ جارقىن ۇلگىسىنە اينالدى.

Abai.kz