تالعار قالاسىندا جاستارعا ارنالعان سۋجاڭا زاماناۋي ورتالىق اشىلدى، – دەپ حابارلايدى الماتى وبلىسى اكىمىنىڭ ءباسپاسوز قىزمەتى.

بۇعان دەيىن وبلىس اكىمدىگىنىڭ قولداۋىمەن ءدال وسىنداي عيمارات بالقاش، كەگەن، رايىمبەك، قاراساي اۋداندارىندا بوي كوتەرگەن. سونداي-اق قوناەۆ قالاسى مەن ىلە، ۇيعىر اۋداندارىندا كوۆوركينگ ورتالىقتار جاستار يگىلىگىنە قىزمەت ەتۋدە. تالعارداعى جاڭا نىسان – سول جۇمىستىڭ زاڭدى جالعاسى. بۇل ورتالىق جاستاردىڭ جان-جاقتى دامىپ، جەتىلۋىنە، تىڭ يدەيالاردى ىسكە اسىرۋىنا مۇمكىندىك بەرەدى.

عيمارات زاماناۋي جيھازبەن، قۇرال-جابدىقتارمەن تولىق قامتاماسىز ەتىلگەن. ورتالىقتا ءتۇرلى كەزدەسۋلەر وتكىزۋگە ارنالعان ءماجىلىس زالى، شىعارماشىلىققا سەرپىن بەرەتىن كوۆوركينگ الاڭى قاراستىرىلعان. سونداي-اق مەيىرىم مەن جاناشىرلىققا تاربيەلەيتىن ەرىكتىلەر كلۋبى جۇمىس ىستەيتىن بولادى.

بۇگىندە الماتى وبلىسىندا 432 مىڭ جاس بار. ونىڭ 70 مىڭنان استامى تالعار اۋدانىندا تۇرادى. ونىڭ ىشىندە 2 مىڭعا جۋىعى NEET ساناتىنا جاتادى. ورتالىق ماماندارى ولارعا باعىت-باعدار كورسەتىپ، قوعاممەن ەتەنە ارالاسۋىنا جاعداي جاسايدى.

وسىلايشا جاڭا ورتالىق جاستارعا جان-جاقتى قولداۋ كورسەتىپ، بولاشاعىنىڭ جارقىن بولۋىنا ىقپال ەتەدى.

Abai.kz