«تازا قازاقستان» ەكولوگيالىق اكتسياسى اياسىندا ەلىمىزدىڭ بارلىق وڭىرىندە ءبىر مەزگىلدە «تۇلەكتەردىڭ اعاش ەگۋى» ەكو-چەللەندجى ءوتتى. ىزگى باستاما جاس ۇرپاقتىڭ تابيعاتقا دەگەن جاۋاپكەرشىلىگىن ارتتىرۋعا باعىتتالعان كەڭ اۋقىمدى ەكولوگيالىق قوزعالىسقا اينالدى.

قازاقستاننىڭ بارلىق ءبىلىم بەرۋ ۇيىمدارىندا «ەڭبەكقورلىق جانە كاسىبي بىلىكتىلىك ايى» جاريالانىپ، ونىڭ اياسىندا «حالىقارالىق بالالار كىتابى كۇنى»، «حالىقارالىق ەسكەرتكىشتەر مەن تاريحي ورىنداردى قورعاۋ كۇنى»، «ۇلتتىق كىتاپ كۇنى» جانە باسقا دا بىرقاتار رەسپۋبليكالىق اكتسيالار ۇيىمداستىرىلدى. بۇل باستاما وسكەلەڭ ۇرپاقتى كىتاپ وقۋعا، قايىرىمدى ىستەرگە باۋلۋعا، سونداي-اق قورشاعان ورتاعا دەگەن قامقورلىق پەن ەكولوگيالىق مادەنيەتتىلىكتى قالىپتاستىرۋعا باعىتتالعان. سونىمەن قاتار «تابيعاتقا قامقورلىق جاسايمىز» اكتسياسى اياسىندا مەكتەپ اۋماقتارى مەن قوعامدىق كەڭىستىكتەردە تازالىق جۇمىستارىن جۇرگىزۋ قولعا الىنۋدا.

اعاش وتىرعىزۋ ەكو-چەللەندجى ءداستۇرلى شاراعا اينالدى. بيىل ول ءتورتىنشى جىل قاتارىنان ەلىمىزدىڭ بارلىق ءبىلىم بەرۋ ۇيىمدارىندا تۇراقتى تۇردە وتكىزىلۋدە.

بيىلعى جىلى ەكو-چەللەندجگە 9 جانە 11 سىنىپتاردىڭ 100 مىڭنان استام وقۋشىسى قاتىستى. ولار مەكتەپ اۋماقتارىندا، ساياباقتار مەن قوعامدىق كەڭىستىكتەردە اعاش وتىرعىزىپ، ەلدى مەكەندەردى كوگالداندىرۋعا ءوز ۇلەستەرىن قوستى.

ايتا كەتەيىك، وسىدان ءبىر اپتا بۇرىن «كەلەشەك مەكتەپتەرى» جوباسىنىڭ وقۋشىلارى دا سەنبىلىككە قاتىسىپ، قورشاعان ورتانى قورعاۋ ىسىنە بەلسەندى ۇلەس قوسقان بولاتىن.

Abai.kz