قازاقستان حالقىنىڭ بىرلىگى كۇنى — ەلىمىزدەگى ەڭ ماڭىزدى ءارى مازمۇندى مەرەكەلەردىڭ ءبىرى. جىل سايىن 1 مامىردا اتالىپ وتەتىن بۇل كۇن ەلدەگى تاتۋلىق پەن تۇراقتىلىقتىڭ، دوستىق پەن ءوزارا سىيلاستىقتىڭ سيمۆولىنا اينالعان. كوپۇلتتى قازاقستان ءۇشىن بۇل مەرەكەنىڭ ورنى ەرەكشە. ويتكەنى بۇگىندە ەلىمىزدە كوپتەگەن ەتنوس وكىلدەرى ءبىر شاڭىراق استىندا تاتۋ-ءتاتتى ءومىر ءسۇرىپ كەلەدى. وسىنداي بىرلىك پەن كەلىسىمدى دارىپتەيتىن مەرەكە قارساڭىندا قالا تۇرعىندارى مەن قوناقتارىنا ارنالعان ەرەكشە مادەني شارا ۇيىمداستىرىلدى.

سۋرەت: استانا قالاسى اكىمدىگىنەن الىندى.

1 مامىر كۇنى جەتىسۋ پاركى اۋماعىندا قازاقستان حالقىنىڭ بىرلىگى كۇنىنە ارنالعان اۋقىمدى مەرەكەلىك كونتسەرتتىك باعدارلاما وتەدى. مەرەكەلىك ءىس-شارا 3 ساعاتقا جالعاستى. ۇيىمداستىرۋشىلار بۇل كۇنى ساياباق اۋماعى ءان مەن كۇيگە، بي مەن شاتتىققا تولاتىنىن ايتتى.
مەرەكەلىك باعدارلاما اياسىندا كورەرمەندەرگە ءارتۇرلى مادەني باعىتتاعى ونەر كورسەتىلىمدەرى ۇسىنىلدى. اتاپ ايتقاندا، ۆوكالدىق نومىرلەر، ۇلتتىق جانە ەتنوستىق بيلەر، ساحنالىق قويىلىمدار، دجيگيتوۆكا ەلەمەنتتەرى مەن شىعارماشىلىق كومپوزيتسيالار كوپشىلىك نازارىنا ۇسىنىلماق. كونتسەرتتىڭ نەگىزگى ماقساتى قازاقستانداعى مادەني ارالۋاندىلىقتى كورسەتۋ، حالىقتار اراسىنداعى دوستىق پەن ءوزارا قۇرمەتتى نىعايتۋ.
ساحنادا تالانتتى ونەرپازدار ءان شىرقاپ، كورەرمەندەرگە كوتەرىڭكى كوڭىل كۇي سىيلادى. سونىمەن قاتار، «التىن ۇرپاق» بي ءانسامبلى مەن «حازار» شىعارماشىلىق ۇجىمى ارنايى كونتسەرتتىك باعدارلامالارىن ۇسىندى. بي كەشىندە كاۆكاز حالىقتارىنىڭ ۇلتتىق بيلەرى، گاۆاي ءبيى جانە زاماناۋي حورەوگرافيالىق قويىلىمدار ورىندالدى. ليريكالىق اندەر مەن اسەرلى مۋزىكالىق كومپوزيتسيالار مەرەكەلىك كەشتىڭ مازمۇنىن بايىتا ءتۇستى. ۇيىمداستىرۋشىلار كونتسەرت سوڭىندا ەرەكشە فينالدىق ءنومىر ازىرلەنگەنىن اتاپ ءوتتى.
ءىس-شارا بارىسىندا بالالار مەن ەرەسەكتەرگە ارنالعان ءتۇرلى ويىندار مەن بايقاۋلار ۇيىمداستىرىلدى. قوناقتار بەلسەندى دەمالىسقا قاتىسىپ، مەرەكەلىك اتموسفەرانى سەزىندى. مۇنداي مادەني باعدارلامالار ادامدار اراسىنداعى قارىم-قاتىناستى جاقسارتىپ قانا قويماي، قوعامداعى ىنتىماق پەن تۇسىنىستىكتى نىعايتۋعا دا ىقپال ەتەدى.
قازاقستان حالقىنىڭ بىرلىگى كۇنى — بەيبىت ءومىردىڭ قادىرىن ۇعىندىراتىن ەرەكشە مەرەكە. بۇل كۇن ەلدەگى تۇراقتىلىق پەن قوعامدىق كەلىسىمنىڭ ماڭىزىن ەسكە سالادى. قازاقستان الەمگە ەتنوسارالىق تاتۋلىقتىڭ ۇلگىسىن كورسەتىپ كەلە جاتقان مەملەكەتتەردىڭ ءبىرى رەتىندە تانىلىپ وتىر. ءتۇرلى مادەنيەتتەر مەن داستۇرلەردىڭ ءبىر قوعامدا ۇيلەسىمدى ءومىر ءسۇرۋى ەلىمىزدىڭ باستى جەتىستىكتەرىنىڭ ءبىرى.

سۋرەت: استانا قالاسى اكىمدىگىنەن الىندى.

بۇگىندە بىرلىك ۇعىمى تەك ۇران عانا ەمەس، مەملەكەت دامۋىنىڭ نەگىزگى تىرەگىنە اينالدى. حالىقتىڭ اۋىزبىرشىلىگى مەن ءوزارا قولداۋى ەلدىڭ وركەندەۋىنە جول اشادى. سوندىقتان بىرلىك كۇنىنە ارنالعان مەرەكەلىك ءىس-شارالار جاستاردى دوستىققا، سىيلاستىققا جانە وتانسۇيگىشتىككە تاربيەلەۋدە ماڭىزدى ءرول اتقارادى.
ۇيىمداستىرۋشىلار بارلىق قالا تۇرعىندارى مەن قوناقتارىن جەتىسۋ پاركىندە وتكەن مەرەكەلىك كونتسەرتكە ۇنەمى قاتىسىپ وتىرۋىن ايتتى. بىرلىك پەن دوستىقتى دارىپتەيتىن ەرەكشە كەش كوپشىلىككە كوتەرىڭكى كوڭىل كۇي سىيلاپ، مەرەكەلىك اسەر قالدىرعانى انىق.
ايتا كەتەيىك，مەملەكەت باسشىسى قاسىم-جومارت توقاەۆ بۇگىن قازاقستاندىقتاردى قازاقستان حالقىنىڭ بىرلىگى كۇنىمەن قۇتتىقتادى. ول قازاقستان ءتۇرلى ەتنوس وكىلدەرىن بىرىكتىرىپ، ءبىر ۇلكەن وتباسىعا اينالعانىن اتاپ ءوتتى.
«بۇل ءبىزدىڭ باعا جەتپەس بايلىعىمىز. بەيبىتشىلىك، جاناشىرلىق، ءوزارا كومەك داستۇرلەرى ءبىرتۇتاس حالقىمىزدىڭ ۇلتتىق بولمىسىنىڭ اجىراماس بولىگى بولىپ قالا بەرۋى ماڭىزدى. ءبىز ءارتۇرلىمىز، بىراق بىرگەمىز. «ارالۋاندىقتاعى بىرلىك» فورمۋلاسى مەملەكەتتىك ساياساتتىڭ ءمانىن دە، قازاقستاندىقتاردىڭ كۇندەلىكتى ءومىرىن دە ءدال سيپاتتايدى. سوندىقتان جاڭا كونستيتۋتسيانىڭ پرەامبۋلاسىندا بىرلىك، ىنتىماق، ۇلتارالىق جانە كونفەسسياارالىق كەلىسىم قاعيداتتارى ناقتى ايقىندالعان».
قازاقستان حالقىنىڭ بىرلىگى كۇنى — قازاقستان حالقى ءۇشىن ماڭىزى زور مەرەكەلەردىڭ ءبىرى. جىل سايىن 1 مامىر كۇنى ەلىمىزدىڭ بارلىق وڭىرىندە كەڭ كولەمدە اتالىپ وتەتىن بۇل مەيرامنىڭ باستى ماقساتى — ءتۇرلى ەتنوس پەن ءدىن وكىلدەرى اراسىنداعى ءوزارا قۇرمەتتى ارتتىرىپ، تاتۋلىقتى، ىنتىماقتى جانە ورتاق قۇندىلىقتاردى دارىپتەۋ.
قازاق حالقى ەجەلدەن بىرلىك پەن بەرەكەنى ەلدىڭ باستى بايلىعى ساناعان. «بىرلىك بار جەردە تىرلىك بار» دەگەن ناقىل دا سونىڭ ايعاعى. سوندىقتان ىنتىماق پەن تاتۋلىقتى تۋ ەتكەن مەملەكەت ءۇشىن بۇل كۇننىڭ ورنى ەرەكشە. بۇل مەرەكە حالىقتىڭ اۋىزبىرشىلىگىن نىعايتىپ، قوعامداعى بەيبىتشىلىك پەن كەلىسىمدى ودان ءارى كۇشەيتۋگە باعىتتالعان.
جىل سايىن قازاقستاندا ءومىر ءسۇرىپ جاتقان 130-دان استام ەتنوس وكىلدەرى بىرلىك كۇنىن ورتاق شاڭىراق استىنداعى دوستىقتىڭ بەلگىسى رەتىندە اتاپ وتەدى. ءتۇرلى مادەني ورتالىقتار ۇلتتىق داستۇرلەرىن تانىستىرىپ، ءان مەن بي ارقىلى ءوز ونەرلەرىن پاش ەتەدى. سونىمەن قاتار، ەلىمىزدىڭ كوپتەگەن ايماقتارىندا پاتريوتتىق شەرۋلەر، كونتسەرتتەر، سپورتتىق جارىستار جانە مادەني فەستيۆالدەر ۇيىمداستىرىلادى.
بۇگىندە «دوستىق ءۇيى» اياسىندا جۇمىس ىستەيتىن ۇلتتىق-مادەني ورتالىقتار حالىقتار اراسىنداعى ءوزارا تۇسىنىستىك پەن سىيلاستىقتى دامىتۋعا ۇلەس قوسىپ كەلەدى. مەرەكەلىك شارالاردا ءار ۇلتتىڭ سالت-ءداستۇرى مەن مادەني ەرەكشەلىكتەرى كورسەتىلىپ، كوپشىلىككە رۋحاني اسەر سىيلايدى.
1 مامىر — تاۋەلسىز قازاقستانداعى قوعامدىق كەلىسىمنىڭ سيمۆولىنا اينالعان مەرەكە. 1995 جىلدىڭ ناۋرىز ايىندا قۇرىلعان قازاقستان حالقى اسسامبلەياسى ەلىمىزدەگى ۇلتارالىق تاتۋلىقتى نىعايتۋدا ماڭىزدى ءرول اتقارىپ كەلەدى. بۇل قۇرىلىم الەمدە سيرەك كەزدەسەتىن قوعامدىق ينستيتۋتتاردىڭ ءبىرى سانالادى.
اسسامبلەيا قۇرامىنداعى جۇزدەگەن ۇلتتىق-مادەني بىرلەستىكتەر مەن وڭىرلىك ۇيىمدار قازاقستانداعى ەتنوستاردىڭ باسىن بىرىكتىرىپ، ەلدەگى تۇراقتىلىق پەن دوستىقتى ساقتاۋعا قىزمەت ەتىپ كەلەدى. بۇگىندە ءاربىر ەتنوس ءوز مادەنيەتىن، ءتىلىن جانە ءداستۇرىن دامىتۋعا مۇمكىندىك العان. بۇل — قازاقستانداعى بەيبىتشىلىك پەن قوعامدىق كەلىسىم ساياساتىنىڭ ناتيجەسى.

Abai.kz