الماتى وبلىسىندا تۋريستىك باعىتتاردا اۋقىمدى سەنبىلىكتەر ءوتىپ جاتىر. «تازالىق كۇندەرى» ەكولوگيالىق اكتسياسى اياسىندا شاتقالدار مەن سارقىرامالاردان باستاپ كولدەر مەن دەمالىس ايماقتارىنا دەيىنگى اۋماقتار تازارتىلۋدا. باستاما مامىر ايىنداعى مەرەكەلەر مەن دەمالىس كۇندەرى ءوڭىردىڭ نەگىزگى تۋريستىك نىساندارىن اباتتاندىرۋدى كۇشەيتۋگە باعىتتالعان.

تازالىق جۇمىستارى جۇرگىزىلىپ جاتقان باعىتتار قاتارىندا ەسىك كولى، كولساي كولدەرى، شارىن شاتقالى، اسسى جايلاۋى، پەرۆوماي توعاندارى، مۋزەيلەر اۋماعى، تابيعي ويىن-ساۋىق ساياباقتارى جانە جىل سايىن مىڭداعان تۋريستەر تاماشالايتىن وزگە دە نىساندار بار.

بۇگىن «تازالىق كۇندەرى» ەكولوگيالىق اكتسياسى اياسىندا 130 كاسىپورىن مەن ۇيىم وكىلدەرى، جالپى 20 مىڭنان استام ءوڭىر تۇرعىنى 120 گەكتاردان استام اۋماقتى تازارتتى. تازالىق جۇمىستارى تۇرگەن شاتقالىندا، «تاڭبالى تاس» ارحەولوگيالىق كەشەنىندە، «اق-بۇلاق» تاۋ-شاڭعى كۋرورتىندا، «كوشپەندىلەر قالاشىعىندا» جانە وزگە دە تانىمال تۋريستىك ورىنداردا جۇرگىزىلدى. ءبىر كۇننىڭ ىشىندە 340 توننا تۇرمىستىق قالدىق جينالىپ، ارنايى پوليگوندارعا شىعارىلدى. جۇمىسقا 22 بىرلىك ارنايى تەحنيكا جۇمىلدىرىلدى.

«تۋريستىك ورىنداردىڭ تازالىعى – ەلدىڭ ءيميدجى مەن مادەنيەتىنىڭ ايقىن كورىنىسى. تابيعاتتىڭ سۇلۋلىعىنا تامسانعان ءاربىر قوناق ونىڭ كۇتىمىنە دە نازار اۋدارادى. تازا ءارى ۇقىپتى ورتا تۋريستەرگە جاعىمدى اسەر قالدىرىپ، قايتا كەلۋگە دەگەن ىقىلاسىن ارتتىرادى. سوندىقتان ءوڭىر تازالىعىن ساقتاۋ – ءار ازاماتتىڭ مىندەتى. قاراپايىم تازالىق قاعيدالارىن ساقتاۋ ارقىلى تۋعان جەرىمىزدىڭ كوركەيۋىنە ۇلەس قوسا الامىز»، – دەدى وبلىس اكىمى مارات سۇلتانعازيەۆ «تاڭبالى تاس» ارحەولوگيالىق كەشەنىندە وتكەن سەنبىلىك بارىسىندا.

الماتى وبلىسىنداعى تۋريستىك باعىتتاردا ۇيىمداستىرىلعان «تازالىق كۇندەرى» اكتسياسى الداعى دەمالىس كۇندەرى دە جالعاسادى. سانيتارلىق تازالاۋ جۇمىستارى وڭىردەگى تانىمال شاتقالدار، كولدەر مەن دەمالىس ايماقتارىن قامتيدى. اكتسياعا وبلىس تۇرعىندارى مەن قوناقتارى، ەرىكتىلەر، كاسىپكەرلەر جانە قوعامدىق ۇيىم وكىلدەرى قاتىسا الادى. ۇيىمداستىرۋشىلار بارشا جۇرتتى باستاماعا قولداۋ ءبىلدىرىپ، تۋريستىك ورىنداردىڭ تازالىعىنا ۇلكەن جاۋاپكەرشىلىكپەن قاراۋعا شاقىرادى.

وبلىس اكىمدىگىنىڭ مالىمەتىنشە، «تازالىق كۇندەرىن» وتكىزۋ تۋريستىك ايماقتاردىڭ ەكولوگيالىق جاعدايىن جاقسارتىپ قانا قويماي، تۇرعىندار مەن قوناقتاردىڭ بويىندا تابيعاتقا دەگەن جاناشىرلىق سەزىمىن وياتادى. ەكولوگيالىق ناۋقان «تازا قازاقستان» رەسپۋبليكالىق اكتسياسى اياسىندا جۇزەگە اسىرىلۋدا.

ايتا كەتەيىك، 2026 جىلى الماتى وبلىسىندا 220 مىڭ ءتۇپ اعاش وتىرعىزۋ جوسپارلانعان. جىل باسىنان بەرى 77 مىڭ كوشەت ەگىلدى. كوكتەم باستالعالى وڭىردە 8 ءىرى سەنبىلىك ۇيىمداستىرىلىپ، 4 مىڭ توننادان استام قوقىس شىعارىلعان. سونىمەن قاتار كوشەت دانەگىن دايىنداۋ جۇمىستارى دا قولعا الىنعان. قازىرگى ۋاقىتتا قاراعاش تۇقىمىن جيناۋ ناۋقانى ءجۇرىپ جاتىر. وعان 150-گە جۋىق ادام تارتىلىپ، 400 كەلى تۇقىم جينالدى. بۇل تۇقىمدار كەيىن كوشەت وسىرۋگە جانە ەلدى مەكەندەردى كوگالداندىرۋعا پايدالانىلماق.

Abai.kz