مينيستر پرەزيدەنت جارلىعىن ىسكە اسىرۋ اياسىنداعى ۇكىمەتتىڭ نەگىزگى تاسىلدەرى مەن باسىم باعىتتارىن كەڭىنەن ءتۇسىندىرىپ ءوتتى. ونىڭ ايتۋىنشا، بۇل قۇجات كوشى-قون ساياساتىن جاڭا دەڭگەيگە كوتەرەتىن ماڭىزدى قادام جانە ونى جۇزەگە اسىرۋ بارلىق مەملەكەتتىك ورگانداردىڭ ۇيلەسىمدى جۇمىسىن تالاپ ەتەدى.

«قاراپايىم تىلمەن ايتقاندا، ءبىز بۇرىنعى كۇردەلى ءارى شەكتەۋلەرگە تولى جۇيەدەن بىرتىندەپ باس تارتىپ، اشىق ءارى يكەمدى مودەلگە كوشىپ جاتىرمىز. باستى ماقسات – وتاندىق ەكونوميكاعا قاجەتتى ماماندار ءۇشىن قولايلى كوشى-قون جۇيەسىن قالىپتاستىرۋ»، دەپ اتاپ ءوتتى ايدا بالاەۆا.

كوشى-قون ساياساتىنداعى ءتورت نەگىزگى باعىت:

1. سەرۆيستىك مەملەكەت قالىپتاستىرۋ:

بۇل باعىت مەملەكەتتىك قىزمەتتەردىڭ قاراپايىم ءارى قولجەتىمدى بولۋىن كوزدەيدى. «ءبىر تەرەزە» قاعيداتىن كەڭەيتۋ، پروتسەستەردى تولىق تسيفرلاندىرۋ جانە ۆەدومستۆوارالىق كەلىسىمدەردى قىسقارتۋ ارقىلى مارتەبە راسىمدەۋ مەن جۇمىسقا رۇقسات الۋ ءبىرتۇتاس جۇيە ارقىلى جۇزەگە اسىرىلادى.

كوشى-قون ساياساتى وزگەرەدى: ولجاس بەكتەنوۆ مينيسترلەرگە ناقتى مىندەتتەر جۇكتەدى

2. بيۋروكراتيادان ارىلتۋ:

اكىمشىلىك پروتسەستەردىڭ تيىمدىلىگىن ارتتىرۋ ماقساتىندا وتىنىشتەردى قاراۋ مەرزىمدەرى قىسقارىپ، راسىمدەر وڭتايلاندىرىلادى. تسيفرلىق باقىلاۋ قۇرالدارىن ەنگىزۋ ازاماتتار مەن مەملەكەت ءۇشىن ۋاقىت پەن رەسۋرستاردى ۇنەمدەۋگە مۇمكىندىك بەرەدى.

3. «التىن ۆيزا» جانە ادامي كاپيتالدى تارتۋ:

ينۆەستورلار مەن جوعارى بىلىكتى ماماندار ءۇشىن «التىن ۆيزا» تەتىگى ەنگىزىلەدى. بۇل ءوندىرىس نەمەسە ينفراقۇرىلىم سالاسىنداعى ينۆەستورلارعا ۇزاق مەرزىمدى تۇراقتى قىزمەت ەتۋ مۇمكىندىگىن بەرەدى. سونداي-اق ينجەنەريا، IT جانە مەديتسينا سالاسىنداعى مامانداردىڭ ەڭبەك نارىعىنا شىعۋى جەڭىلدەتىلمەك.

4. ەڭبەك نارىعىنىڭ يكەمدىلىگى:

كادر تاپشىلىعى بار جانە جوعارى تەحنولوگيالىق سالالاردا كاسىبي بىلىكتىلىكتى تانۋ راسىمدەرى جەڭىلدەتىلەدى. كەي جاعدايلاردا بىلىكتىلىكتى راستاۋ مەرزىمدەرى ايتارلىقتاي قىسقارتىلىپ، بۇل رەتتە ساپا مەن قاۋىپسىزدىك تالاپتارى تولىق ساقتالادى.

ءمينيستردىڭ ايتۋىنشا، مەملەكەت رەتتەۋدى السىرەتپەيدى، كەرىسىنشە ونى ناقتى، ءدال جانە تەحنولوگيالىق تۇرعىدان ءتيىمدى ەتەدى. ستراتەگيالىق تۇرعىدان بۇل رەفورمالار قازاقستاننىڭ ينۆەستيتسيا، تەحنولوگيا جانە ادامي كاپيتال ءۇشىن جاھاندىق باسەكەدەگى ورنىن كۇشەيتۋگە باعىتتالعان. بۇل بىلىمگە نەگىزدەلگەن ەكونوميكانى دامىتۋ مەن ساپالى ءوسۋدى قامتاماسىز ەتۋ جولىنداعى ماڭىزدى قادام بولماق.