جەتىسۋ وبلىسىندا سوڭعى 4 جىلدا جەرگىلىكتى ماڭىزى بار 1 610,6 كم اۆتوموبيل جولىنا جوندەۋ جۇمىستارى جۇرگىزىلدى. بۇل رەتتە 660,4 كم وبلىستىق ماڭىزى بار جولدار جانە 148 ەلدى مەكەندەگى ۇزىندىعى 950,2 كم بولاتىن اۋىلىشىلىك كوشەلەر قامتىلدى. سونىڭ ىشىندە وبلىس ورتالىعىندا شامامەن 335 كم جەرگىلىكتى اۆتوموبيل جولى جوندەلدى، – دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

وسى ورايدا بيىل تالدىقورعان قالاسىندا جول جوندەۋدە اۋقىمدى جۇمىستار جوسپارلانعان. جوبالار 118 كوشەنى قامتىپ، 70 شاقىرىمنان استام جولعا جاڭا اسفالت توسەلەدى.

قالالىق جولاۋشىلار كولىگى جانە اۆتوموبيل جولدارى ءبولىمىنىڭ باسشىسى ەرلان نيەتباەۆتىڭ ايتۋىنشا، ءساۋىر ايىنىڭ ورتاسىنان باستاپ قالانىڭ ورتالىق بولىگىندەگى سەگىز كوشەدە ورتاشا جوندەۋ جۇمىستارى جۇرگىزىلۋدە. اتاپ ايتقاندا، اباي، ابىلاي حان، ەسكەلدى بي كوشەلەرى مەن ن. نازارباەۆ داڭعىلىندا، سونداي-اق شەۆچەنكو، جەلتوقسان، اقىن سارا، ءبىرجان سال كوشەلەرىندە جوندەۋ قولعا الىنعان. بۇل ۋچاسكەلەردىڭ جالپى ۇزىندىعى 30,2 شاقىرىم.

– بيىلعى جوندەۋ جۇمىستارىنىڭ ەرەكشەلىگى – اتالعان كوشەلەردىڭ بارلىعىندا يكەمدى ليۋكتەر ورناتىلادى. يكەمدى ليۋك – كارىز قۇدىعىنىڭ بەتون ساقيناسىنا ەمەس، تىكەلەي جول جابىنىنا ورناتىلاتىن جەتىلدىرىلگەن قۇرىلىم. ول تەمپەراتۋرالىق كەڭەيۋ نەمەسە توپىراقتىڭ شوگۋى كەزىندە جولمەن بىردەي قوزعالىپ، اسفالتتىڭ وپىرىلۋىن، قۇدىق موينىنىڭ بۇزىلۋىن بولدىرمايدى ءارى جول بەتىنىڭ تەگىس بولۋىن قامتاماسىز ەتەدى. ەسكە سالساق، وتكەن جىلى مۇنداي ليۋكتەر گاگارين كوشەسىندە پيلوتتىق جوبا رەتىندە ورناتىلىپ، وڭ ناتيجە بەرگەن بولاتىن. بيىل قالادا وسىنداي 694 ليۋك ورناتىلادى، – دەدى ءبولىم باسشىسى.

بۇدان بولەك، 8-شاعىن اۋدان مەن «جاستار-3» تۇرعىن الابىندا جول قۇرىلىسى جۇرگىزىلۋدە. بيىل «جاستار-1» تۇرعىن الابىنداعى 53 كوشەنىڭ، «قۇلاگەر» جانە «بىرلىك» شاعىن اۋداندارىنداعى 5 كوشەنىڭ قۇرىلىسى اياقتالادى. سونىمەن قاتار «كوكتال» تۇرعىن الابىنداعى 36 كوشەدە جانە 3-بولىمشەدەگى 20 كوشەدە جۇمىستار جالعاسۋدا.

ەرلان نيەتباەۆتىڭ ايتۋىنشا، بۇگىندە وبلىس ورتالىعىندا 15 مەردىگەر ۇيىم جۇمىس ىستەپ جاتىر، سونداي-اق 200 بىرلىك ارنايى تەحنيكا تارتىلعان.

جوندەۋ جۇمىستارى اياقتالعان جول ۋچاسكەلەرى كەزەڭ-كەزەڭىمەن پايدالانۋعا بەرىلىپ جاتقانىنا جۇرگىزۋشىلەر دە وڭ پىكىر بىلدىرۋدە.

– بۇگىندە قالا ورتالىعىندا جول جوندەۋ جۇمىستارى قارقىندى جۇرگىزىلۋدە. ارينە، جوندەۋ كەزىندە جول قوزعالىسىندا بەلگىلى ءبىر قولايسىزدىقتار تۋىندايدى. دەگەنمەن جوندەۋ ناتيجەسىندە جولدارىمىز جۇرۋگە ىڭعايلى ءارى قاۋىپسىز ساپالى بولادى. سوندىقتان جۇمىس ىستەپ جاتقان ماماندارعا العىس ايتامىن، ال جۇرگىزۋشىلەر مەن جاياۋ جۇرگىنشىلەر سابىر ساقتاپ، تۇسىنىستىك تانىتادى دەپ ويلايمىن. ويتكەنى مۇنىڭ ءبارى قالا تۇرعىندارىنىڭ يگىلىگى ءۇشىن جاسالىپ جاتىر، – دەدى تالدىقورعاندىق تۇرعىن ە. سارجانوۆ.

جوندەۋ جۇمىستارى بارىسىندا جول بەلگىلەرى جاڭارتىلۋدا. جوسپار بويىنشا 100 جول بەلگىسى اۋىستىرىلىپ، 300 جاڭا جول بەلگىسى ورناتىلادى. سونىمەن قاتار ابىلاي حان مەن تىنىشباەۆ كوشەلەرىنىڭ قيىلىسىنا باعدارشام قويىلادى. جول تاڭبالارى تەرموپلاستيك ماتەريالىن قولدانۋ ارقىلى سىزىلادى، بۇل ولاردىڭ اسىرەسە تۇنگى ۋاقىتتا انىق كورىنۋىنە ىقپال ەتىپ، جول قاۋىپسىزدىگىن ارتتىرا تۇسەدى.

ەسكە سالساق، اي باسىندا وبلىس ورتالىعىندا ارنايى جۇمىس كوميسسياسى قۇرىلعان بولاتىن. كوميسسيا جول جوندەۋ جۇمىستارىنىڭ ساپاسىن بارلىق كەزەڭدە — جوندەۋ باستالعان ساتتەن باستاپ نىسانداردى قابىلداۋ جانە ولاردى كەيىن پايدالانۋ كەزەڭىنە دەيىن باقىلاپ وتىرادى. بۇل جول ينفراقۇرىلىمىنىڭ ساپاسىن ارتتىرىپ، جاڭارتىلعان جول ۋچاسكەلەرىنىڭ قىزمەت ەتۋ مەرزىمىن ۇزارتۋعا مۇمكىندىك بەرەدى. جۇمىس كوميسسياسىنىڭ قىزمەتى تەك وبلىس ورتالىعىمەن شەكتەلمەي، جول جوندەۋ جۇمىستارى جۇرگىزىلىپ جاتقان وڭىردەگى وزگە دە ەلدى مەكەندەردە باقىلاۋ جاسايدى.

اتاپ وتسەك، وبلىستاعى اۆتوموبيل جولدارىنىڭ جالپى ۇزىندىعى - 4 035 كم، ونىڭ 1 050 شاقىرىمى رەسپۋبليكالىق ماڭىزى بار، 2 985 شاقىرىمى جەرگىلىكتى ماڭىزى بار جولدارعا جاتادى.

Abai.kz