قاراعاندى وبلىسىنىڭ بارلىق قالا-اۋداندارىندا 9 مامىر كۇنى ۇلى وتان سوعىسىنداعى جەڭىستىڭ 81 جىلدىعىنا ارنالعان ەسكە الۋ شارالارى وتۋدە. 

تاڭ سارىدەن باستاپ قاراعاندىلىقتار «ماڭگىلىك الاۋ» مەموريالىنا گۇل شوقتارىن قويۋدا.

— ءبىز جىل سايىن ماڭگىلىك الاۋعا كەلۋگە تىرىسامىز. ۇلىمىزدى ەرتىپ كەلەمىز، ول بۇگىنگى بەيبىت ومىرىمىزگە كىمدەردىڭ ارقاسىندا قول جەتكىزگەنىمىزدى ءتۇسىنسىن دەيمىز. ءبىزدىڭ اجەمىز تىل ارداگەرى بولعان، سوندىقتان بۇل ەستەلىكتى ساقتاۋ ءبىز ءۇشىن وتە ماڭىزدى، — دەيدى قاراعاندى تۇرعىنى ەۆگەنيا كريتوۆيچ.

رەكۆيەم-ميتينگكە وبلىس اكىمى ەرماعانبەت بولەكپاەۆ، اسكەري قىزمەتشىلەر، مەملەكەتتىك ورگانداردىڭ وكىلدەرى، قوعامدىق بىرلەستىكتەر مەن قالا تۇرعىندارى قاتىستى.

سوعىس جىلدارىندا قازا تاپقانداردى جينالعاندار ءبىر مينۋت ۇنسىزدىكپەن ەسكە الدى.

ءداستۇر بويىنشا وبلىس باسشىلىعى ۇلى وتان سوعىسىنىڭ ارداگەرلەرىن ارنايى بارىپ قۇتتىقتادى.

ولار ۇلى وتان سوعىسىنا قاتىسۋشىلارعا مەملەكەت باسشىسى قاسىم-جومارت توقاەۆتىڭ جەڭىس كۇنىنە ارنالعان قۇتتىقتاۋىن جەتكىزدى.

قازىرگى تاڭدا وڭىردە مايدانگەر التى ارداگەر تۇرادى. سولاردىڭ ءبىرى — ماريا شينكەۆيچ. بيىل ول 101 جاسقا تولدى. ول مەرگەندەر مەكتەبىن تامامداعاننان كەيىن 19 جاسىندا مايدانعا اتتانعان. 1945 جىلدىڭ تامىزىنا دەيىن 3-بەلارۋس جانە ۋكراينا مايداندارىندا قىزمەت ەتتى.

ماريا شينكەۆيچ ءىى دارەجەلى وتان سوعىسى وردەنىمەن، ەكى مارتە «ەرلىگى ءۇشىن» مەدالىمەن، «گەرمانيانى جەڭگەنى ءۇشىن» مەدالىمەن جانە وزگە دە ناگرادالارمەن ماراپاتتالعان. سوعىستان كەيىن ەلدى قالپىنا كەلتىرۋ جۇمىستارىنا قاتىستى.

ارداگەر جەڭىس كۇنىن پراگادا قارسى العان. ول ءالى كۇنگە دەيىن 9 مامىردى ومىرىندەگى ەڭ باستى مەرەكە دەپ سانايدى.

— ءبىز جەڭىستى تاعاتسىزدانا كۇتتىك ءارى بۇل كۇننىڭ مىندەتتى تۇردە كەلەرىنە سەندىك. بۇگىندە سول ءساتتى تولقۋمەن ەسكە الامىن، — دەيدى ماريا شينكەۆيچ. — جاستارعا ادال ەڭبەك ەتىپ، ۇلكەندەردى قۇرمەتتەپ، ءبىر-بىرىنە قامقور بولۋدى تىلەيمىن.

سوعىس جىلدارى قازاقستاننان مايدانعا 1,2 ميلليوننان استام ادام اتتانعان.

قاراعاندى وبلىسىنان شامامەن 60 مىڭ ادام اسكەرگە شاقىرىلىپ، ولاردىڭ 25 مىڭى ەلگە ورالماعان.

كەڭەس وداعىنىڭ باتىرى اتاعى ءوڭىردىڭ 34 تۋماسىنا بەرىلسە، تاعى 13 جەرلەس داڭق وردەنىنىڭ تولىق كاۆالەرى اتانعان.

قاراعاندىدا جاساقتالعان 77-ارتيللەريالىق پولك ستالينگرادتان براتيسلاۆاعا دەيىنگى جاۋىنگەرلىك جولدان وتكەن.

Abai.kz