ۇلى جەڭىستىڭ 81 جىلدىعىنا وراي الماتى وبلىسىنىڭ ورتالىعىنداعى «ارداگەرلەر ساياباعىندا» ورنالاسقان داڭق مەموريالى جانىندا جارقىن بولاشاق ءۇشىن جانىن پيدا ەتكەن بوزداقتاردى ەسكە الۋعا ارنالعان جيىن ءوتتى. ماقساتى – ەكىنشى دۇنيەجۇزىلىك سوعىس ارداگەرلەرىنىڭ ەرلىگىن ۇلىقتاۋ، تىل ەڭبەككەرلەرىنە قۇرمەت كورسەتۋ، جاس ۇرپاقتىڭ بويىندا وتانسۇيگىشتىك پەن تاريحي جادىنى قالىپتاستىرۋ.

جينالعاندار مايدان دالاسىندا شەيىت بولىپ، جات جەردىڭ توپىراعى بۇيىرعان بوزداقتاردى ءبىر مينۋت ۇنسىزدىكپەن ەسكە الدى. ودان كەيىن وبلىس اكىمى مارات سۇلتانعازيەۆ ءسوز سويلەپ، سوعىسقا قاتىسىپ، بۇگىندە ارامىزدا قالعان ساناۋلى قارت جاۋىنگەرلەرگە قۇرمەت كورسەتۋ بارشانىڭ قاسيەتتى بورىشى ەكەنىن ايتتى.

– سوعىس جىلدارى ەلىمىزدەن 1 ميلليون 366 مىڭ جاۋىنگەر مايدانعا اتتاندى. ونىڭ 120 مىڭنان استامى الماتى وڭىرىنەن بولدى. مايدان شەبىنەن مىڭداعان بوزداق قايتىپ ورالمادى. الماتى وڭىرىنەن اتتانىپ، سوعىستا ەرەن ەرلىگىمەن تانىلعان 40 جاۋىنگەرگە كەڭەس وداعىنىڭ باتىرى اتاعى بەرىلدى. بۇل – حالقىمىزدىڭ وتان ءۇشىن جانىن اياماي، ەرلىك پەن باتىرلىقتىڭ وشپەس ۇلگىسىن كورسەتكەنىنىڭ ايقىن دالەلى.

الماتى وبلىسى اكىمدىگى تاراپىنان جىل سايىن الەۋمەتتىك، ماتەريالدىق جانە مورالدىق قولداۋ شارالارى جۇزەگە اسىرىلۋدا. بيىل دا قالىپتاسقان ءداستۇر بويىنشا الماتى وبلىسىنان سوعىسقا قاتىسقان 4 ارداگەرگە 5 ميلليون تەڭگەدەن بىرجولعى الەۋمەتتىك كومەك بەرىلدى. جەڭىسكە جەتۋ جولىندا تىل ەڭبەككەرلەرىنىڭ دە قوسقان ۇلەسى زور بولدى. سوعىس جىلدارى اۋىر ەڭبەك پەن زور جاۋاپكەرشىلىكتى مويىندارىنا الىپ، مايداندى ازىق-تۇلىكپەن، كيىم-كەشەكپەن جانە قاجەتتى قۇرال-جابدىقتارمەن قامتاماسىز ەتۋ ءۇشىن كۇن-ءتۇن دەمەي ەڭبەك ەتتى.

ولاردىڭ قاجىرلى ەڭبەگى جەڭىستى جاقىنداتقان ماڭىزدى كۇشتەردىڭ بىرىنە اينالدى. بۇگىندە وبلىسىمىزدا 2 038 تىل ارداگەرى بار. ارقايسىنىڭ ءومىر جولى – كەيىنگى ۇرپاققا ونەگە، ال جانقيارلىق ەڭبەگى ەل جادىندا ماڭگى ساقتالادى، – دەدى وبلىس اكىمى.
ودان كەيىن ءوڭىر باسشىسى، وبلىستىق ءماسليحات توراعاسى، ارداگەرلەر ۇيىمىنىڭ توراعاسى، قوناەۆ قالاسىنىڭ اكىمى، قۇقىق قورعاۋ ورگاندارى، اسكەري ءبولىم، دەپارتامەنتتەر مەن باسقارما باسشىلارى، ءماسليحات دەپۋتاتتارى، تىل جانە ەڭبەك ارداگەرلەرى، اۋعان سوعىسىنىڭ قاتىسۋشىلارى، وبلىس پەن قالانىڭ قۇرمەتتى ازاماتتارى، مەكەمە-كاسىپورىن باسشىلارى، ەتنومادەني بىرلەستىكتەردىڭ مۇشەلەرى جانە جاستار «ماڭگىلىك الاۋعا» گۇل سەبەتتەرىن قويىپ، بوزداقتار رۋحىنا تاعزىم جاسادى.

جەڭىس كۇنى قارساڭىندا مارات ەلەۋسىزۇلى وبلىس اۋماعىندا تۇراتىن كوزى ءتىرى سوعىس ارداگەرلەرىنىڭ شاڭىراعىنا ارنايى بارىپ، مەملەكەت باسشىسى قاسىم-جومارت توقاەۆتىڭ قۇتتىقتاۋىن جەتكىزدى.
قوناەۆ قالاسىنداعى مەرەكەلىك شارا ودان ءارى بەردىبەك سوقپاقباەۆ اتىنداعى ورتالىق ساياباقتا ءوز جالعاسىن تاپتى.

مۇنداعى كونتسەرتتىك باعدارلامادا اسكەري-پاتريوتتىق اندەر شىرقالىپ، مادەنيەت جانە ونەر ۇجىمدارىنىڭ قويىلىمدارى كورەرمەندەر نازارىنا ۇسىنىلدى. سونىمەن قاتار جاستاردىڭ پاتريوتتىق اكتسيالارى ۇيىمداستىرىلىپ، قالا اكىمى تىل ەڭبەككەرلەرىنىڭ ۇيىنە بارىپ، مەرەكەمەن قۇتتىقتاپ شىقتى.

Abai.kz