الماتىدا قۇرىلىس كومپانيانىڭ جۋرناليست ۆاديم بورەيكوعا قارسى بەرگەن ارىزى بويىنشا سوت پروتسەسى جالعاسىپ جاتىر. كەزەكتى سوت وتىرىسىندا جاۋاپكەردىڭ اشكەرەلەيتىن ماتەريالداردى قالاي دايىنداعانى بەلگىلى بولدى.

جەتى بەينەروليك جانە «جارامدى» تالون

داۋ الماتىنىڭ شاعىن اۋداندارىنىڭ بىرىندە سالىنىپ جاتقان «Premier» تۇرعىن ءۇي كەشەنىنىڭ قۇرىلىسىنا بايلانىستى تۋىنداعان. ۆاديم بورەيكو جەتى ماتەريال جاريالاپ، وندا قۇرىلىسقا جاۋاپتى كومپانيانىڭ رۇقسات قۇجاتتارى كەرى قايتارىلعانىن مالىمدەگەن. اتاپ ايتقاندا، بلوگەر مەملەكەتتىك ساراپتامانىڭ كۇشى جويىلعانىن جانە قۇرىلىس جۇمىستارىن باستاۋ تۋرالى حابارلاما تالونى تىزىلىمنەن شىعارىلعانىن ايتقان.
تالاپكەر – «Etude-Ybyrai» جشس ءجۋرناليستىڭ جالعان جاريالانىمدارى كومپانياعا ەلەۋلى شىعىن كەلتىرىپ، قۇرىلىس جۇمىستارىنىڭ ۋاقىتشا توقتاۋىنا جانە پاتەر ساتىلىمىنىڭ كۇرت تومەندەۋىنە سەبەپ بولدى دەپ وتىر.

“تۇسىرگەن مەن ەمەس، ينتەرنەتتەن كەلدى”

سوت وتىرىسى بارىسىندا ءجۋرناليستتىڭ ەفيرگە شىعارعان بەينەماتەريالدارى قارالدى. ۆيدەولاردى كورگەننەن كەيىن جاۋاپكەر كۇتپەگەن مالىمدەمە جاساپ، ءوزى نىسانعا ءىس جۇزىندە بارماعانىن جانە ۆيدەولاردىڭ مۇلدە تەكسەرىلمەگەنىن مويىندادى.
«جاريالانعان بەينەروليكتەردى مەن ءوزىم تۇسىرگەن جوقپىن جانە ولار قانداي دا ءبىر ۆەريفيكاتسيادان وتكەن ەمەس. باعدارلامالاردى دايىنداۋ بارىسىندا تۇرعىندار جىبەرگەن ماتەريالداردى پايدالاندىم»، – دەدى جۋرناليست سوتتا.
سوت زالىنداعى جاۋاپكەردەن الىنعان جاۋاپتاردىڭ ءۇزىندىسىن كەلتىرەمىز:
– ءسىز نىساندارعا بارعان كەزدە ۆيدەوعا تۇسىرمەدىڭىز بە؟
بورەيكو: جوق، تۇسىرگەن جوقپىن، ماعان تۇرعىندار جىبەرىپ وتىردى. مەندە دالەل بار – تۇرعىندار جولداعان ۆيدەولار، وندا كۇنى كورسەتىلگەن. ول جەردە قۇرىلىستىڭ ءتۇن ورتاسىنا تاياۋ ۋاقىتتا ءجۇرىپ جاتقانى انىق كورىنەدى ءارى ەستىلەدى.
– ءوزىڭىز وقيعا ورنىنا باردىڭىز با؟
بورەيكو: 6 قاڭتار كۇنى ءبىز درون ارقىلى اينالانى تۇسىردىك. ال قالعان ۆيدەولاردىڭ ءبارىن تۇرعىندار تۇسىرگەن. مەن وپەراتورلارىممەن بىرگە ول جەرگە ءبىر-اق رەت باردىم.

فاكتچەكينگتىڭ ەرەكشە ءادىسى

كوپ جىلدىق تاجىريبەسى بار ءجۋرناليستىڭ وزىنە كەلىپ تۇسكەن اقپاراتتىڭ شىنايىلىعىن تەكسەرۋ ماسەلەسى سوت پروتسەسىنە قاتىسۋشىلاردىڭ ەرەكشە قىزىعۋشىلىعىن تۋدىردى. اسىرەسە، بيزنەستى زاڭسىز ارەكەت جاسادى دەپ ايىپتاماس بۇرىن «قانداي تەكسەرىس جۇرگىزىلدىگى» دەگەن سۇراق مازالادى.
«مەن اقپاراتتى بىلاي تەكسەرەمىن: ول مەنىڭ روليكتەرگە قوياتىن تالاپتارعا ساي كەلەدى مە، جوق پا، ياعني حرونومەتراجعا سايكەس جانە زاڭعا قايشى كەلمەسە بولدى. جالپى، بار بولعانى وسى»، – دەپ جاۋاپكەر ءوزىنىڭ جۇمىس ءتاسىلىن اشىق سيپاتتادى.
كەلەسى سوت وتىرىسى 28 مامىرعا بەلگىلەندى. پروتسەسس بارىسىندا تاراپتار «گيپەربورەي» اۆتورىنىڭ كورەرمەندەر جىبەرگەن كونتەنتپەن جۇمىس ىستەۋ الگوريتمدەرىن ەگجەي-تەگجەيلى تالقىلايدى دەپ كۇتىلۋدە. روليكتەردىڭ حرونومەتراجىنان بولەك، جاۋاپكەر ماتەريال دايىنداۋ كەزىندە تاعى قانداي ولشەمدەردى باسشىلىققا العانى كەلەسى تىڭداۋدا بەلگىلى بولماق.

Abai.kz