بۇگىن قوناەۆ قالاسىندا الماتى وبلىستىق «دوستىق ءۇيى» عيماراتىنىڭ قۇرىلىسى باستالدى. وڭىردەگى قوعامدىق كەلىسىم مەن ەتنوسارالىق تاتۋلىقتى نىعايتۋعا باعىتتالعان ماڭىزدى جوبانى جەرگىلىكتى ءىرى كاسىپكەرلەر ءوز قاراجاتى ەسەبىنەن جۇزەگە اسىرۋدا. شارا بارىسىندا وبلىس اكىمى مارات سۇلتانعازيەۆ پەن قر پارلامەنتى سەناتىنىڭ دەپۋتاتى جانبولات جورگەنباەۆ وبلىستىق ەتنومادەني بىرلەستىكتەردىڭ توراعالارىمەن بىرگە عيماراتتىڭ ىرگەتاسىنا ۋاقىت كاپسۋلاسىن سالدى، – دەپ حابارلايدى الماتى وبلىسى اكىمىنىڭ ءباسپاسوز قىزمەتى.

سۋرەت: شارا ۇيىمداستىرۋشىلارىنان الىندى.

سالتاناتتى راسىمگە وبلىستىق ءماسليحات دەپۋتاتتارى، باسقارما باسشىلارى، زيالى قاۋىم وكىلدەرى مەن كاسىپكەرلەر، ەتنومادەني بىرلەستىكتەردىڭ، اقساقالدار مەن انالار كەڭەسىنىڭ مۇشەلەرى، قوعامدىق كەلىسىم جانە دامۋ ورتالىعىنىڭ قىزمەتكەرلەرى قاتىستى. قازىرگى تاڭدا وڭىردە 105 ەتنوس وكىلى تاتۋ-ءتاتتى ءومىر سۇرۋدە. وبلىستا تىركەلگەن 34 ەتنومادەني بىرلەستىك پەن قوعامدىق ۇيىم ءتۇرلى الەۋمەتتىك جوبانى قولعا الىپ، ءوزارا تاتۋلىق پەن سەنىمدى ارتتىرۋعا قىزمەت ەتۋدە. سوندىقتان بۇل «دوستىق ءۇيى» اتالعان قۇرىلىمداردىڭ باسىن بىرىكتىرەتىن قارا شاڭىراققا اينالماق. مۇندا ولاردىڭ ناتيجەلى جۇمىس ىستەۋىنە بارلىق جاعداي جاسالىپ، جاستار باستامالارىن قولداۋعا، پىكىر الماسۋعا، مادەني جانە قوعامدىق جوبالاردى جۇزەگە اسىرۋعا مۇمكىندىك بەرەتىن زاماناۋي ورتا قالىپتاسادى.

سۋرەت: شارا ۇيىمداستىرۋشىلارىنان الىندى.

ايماق باسشىسى ءوز سوزىندە «دوستىق ءۇيى» قۇرىلىسىنىڭ باستالۋى وبلىس ءۇشىن تاريحي ماڭىزى زور، ايتۋلى وقيعا ەكەنىن اتاپ ءوتتى.
«مەملەكەت باسشىسى قاسىم-جومارت توقاەۆ قازاقستان حالقى اسسامبلەياسىنىڭ 2025 جىلى وتكەن ءحححىV سەسسياسىندا كوپەتنوستى الماتى وبلىسىندا «دوستىق ءۇيىن» سالۋ قاجەتتىگى جونىندە ناقتى تاپسىرما بەرگەن بولاتىن. بۇگىن سول ماڭىزدى تاپسىرمانىڭ جۇزەگە اسۋىنا كۋا بولىپ وتىرمىز. وزدەرىڭىزگە بەلگىلى، مەملەكەت تاراپىنان وبلىسىمىزدىڭ الەۋمەتتىك-ەكونوميكالىق دامۋىنا ءاردايىم ايرىقشا قولداۋ كورسەتىلىپ كەلەدى. سونىڭ ناتيجەسىندە وڭىرىمىزدە كاسىپكەرلىك پەن ءوندىرىستىڭ وركەندەۋىنە مول مۇمكىندىكتەر اشىلدى. اتاپ ايتقاندا، 2022–2025 جىلدار ارالىعىندا الماتى وبلىسىنا 3,7 ترلن تەڭگە ينۆەستيتسيا تارتىلدى. جالپى قۇنى 930,3 ملرد تەڭگە بولاتىن 120 جوبا پايدالانۋعا بەرىلىپ، ونىڭ اياسىندا 14 مىڭ جاڭا جۇمىس ورنى قۇرىلدى. وسى مۇمكىندىكتەردى ءتيىمدى پايدالانىپ، ءوڭىر ەكونوميكاسىنىڭ وركەندەۋىنە ەلەۋلى ۇلەس قوسقان كاسىپكەرلەرىمىز بۇگىن «دوستىق ءۇيىن» ءوز قاراجاتتارى ەسەبىنەن سالۋعا قولداۋ ءبىلدىرۋ ارقىلى ەل الدىنداعى ازاماتتىق جاۋاپكەرشىلىكتىڭ جوعارى ۇلگىسىن كورسەتىپ وتىر. بۇل شاڭىراق ەل بىرلىگى مەن تاتۋلىقتىڭ ورداسىنا اينالادى دەپ سەنەمىن»، – دەدى مارات ەلەۋسىزۇلى.

سۋرەت: شارا ۇيىمداستىرۋشىلارىنان الىندى.

«اسسامبلەيا جاستارى» رەسپۋبليكالىق قوعامدىق بىرلەستىگىنىڭ الماتى وبلىسى بويىنشا توراعاسى ۆەرا پلەتنەۆا جاڭا عيمارات جاڭا مۇمكىندىكتەرگە جول اشاتىنىن جەتكىزدى. «بۇگىن ءبارىمىز تاريحي ءساتتىڭ كۋاسى بولىپ وتىرمىز. قازىرگى تاڭدا قازاقستان 100-دەن استام ەتنوس وكىلىن ءبىر شاڭىراق استىنا بىرىكتىرىپ، شىنايى دوستىقتىڭ جارشىسى بولىپ وتىر. «بىرلىك بار جەردە تىرلىك بار» دەپ بەكەر ايتىلماعان. ءبىزدىڭ باستى ماقساتىمىز – تاتۋلىقتى تۋ ەتىپ، ەلىمىزدىڭ دامۋىنا ۇلەس قوسۋ. ال الماتى وبلىسىندا «دوستىق ءۇيىنىڭ» بوي كوتەرۋى ءبىزدىڭ جۇمىسىمىزعا سەرپىن بەرىپ، جاڭا بەلەستەردى باعىندىرۋعا سەپتىگىن تيگىزەدى. اسىرەسە اسسامبلەيا جاستارىنا ۇلكەن ءۇمىت پەن جىگەر سىيلايدى»، – دەگەن ول وبلىس اكىمدىگى مەن جوباعا ۇيىتقى بولعان كاسىپكەرلەرگە العىس ايتتى.
نىسان 2 قاباتتى، 1 بلوكتان تۇرادى. جوبا بويىنشا ەتنو-مادەني ورتالىقتار مەن بىرلەستىكتەر كابينەتتەرى، 56 ورىندى كونفەرەنتس-زال، 300 ورىندى ءماجىلىس زالى سالىنادى. سونداي-اق عيمارات الدىنا بيىكتىگى 92 مەتر بولاتىن تۋ تۇعىر ورناتىلادى. نىسان قۇرىلىسى ءۇش اي بويى جۇرگىزىلىپ، جىل سوڭىنا دەيىن پايدالانۋعا بەرىلەدى.

Abai.kz