«قازاقمىس» توبى ءۇشىن الەۋمەتتىك جاۋاپكەرشىلىك پەن جۇمىسكەرلەرگە قولايلى ەڭبەك جاعدايىن جاساۋ نەگىزگى باسىمدىقتاردىڭ ءبىرى بولىپ قالا بەرەدى. كومپانيا قىزمەتكەرلەردىڭ ءومىر ءسۇرۋ ساپاسىن ارتتىرۋعا، كادرلىق الەۋەتتى نىعايتۋعا جانە وزىنە قاتىسى بار وڭىرلەردەگى وتباسىلاردى قولداۋعا باعىتتالعان شارالار كەشەنىن جۇيەلى تۇردە جۇزەگە اسىرىپ كەلەدى.

2026 جىلدىڭ العاشقى ءتورت ايىندا الەۋمەتتىك باعدارلامالاردى ىسكە اسىرۋعا 989 ملن تەڭگە باعىتتالدى. قولداۋ شاراسىمەن 5 751 قىزمەتكەر مەن ولاردىڭ وتباسى مۇشەلەرى قامتىلدى. قاراجاتتىڭ ەلەۋلى بولىگى ومىردە قيىن جاعدايعا تاپ بولعان جۇمىسكەرلەرگە ماتەريالدىق كومەك كورسەتۋگە باعىتتالدى. 2 941 ادامعا قولداۋ كورسەتىلىپ، تولەمنىڭ جالپى كولەمى 604 ملن تەڭگەنى قۇرادى.

قىزمەتكەرلەردىڭ دەنساۋلىعىن ساقتاۋ مەن ساۋىقتىرۋ ماسەلەسىنە ەرەكشە كوڭىل بولىنۋدە: 3 مىڭعا جۋىق قىزمەتكەر شيپاجايلىق-كۋرورتتىق ەم قابىلداسا، تاعى 717 جۇمىسكەر ساۋىقتىرۋ شىعىنىن وتەۋ باعدارلاماسىن پايدالاندى. ۇزاق جىلدار بويى زياندى ەڭبەك جاعدايىندا جۇمىس ىستەگەن زەينەت جاسى الدىنداعى قىزمەتكەرلەرگە ارنالعان قوسىمشا الەۋمەتتىك كەپىلدىكتەردى كوزدەيتىن «55/7» باعدارلاماسى ءوز جۇمىسىن جالعاستىرۋدا.

كومپانيانىڭ الەۋمەتتىك ساياساتىنىڭ ماڭىزدى باعىتتارىنىڭ ءبىرى – قىزمەتكەرلەردىڭ وتباسىن قولداۋ. جازعى كەزەڭدە جۇمىسكەرلەردىڭ 1 200 بالاسى ششۋچينسك، بالقاش قالالارىنداعى «بالداۋرەن» رەسپۋبليكالىق وقۋ-ساۋىقتىرۋ ورتالىعىنىڭ فيليالدارىندا دەمالادى. جولداما مەن جول شىعىنىن كومپانيا تولىق ءوز موينىنا الدى. بۇل ماقساتقا 450 ملن تەڭگە قاراستىرىلدى. ەرەكشە قاجەتتىلىگى بار بالالاردى ەمدەۋ مەن وڭالتۋعا قوسىمشا 31 ملن تەڭگە ءبولىندى.

تۇرعىن ءۇي باعدارلاماسى دا جۇيەلى تۇردە جۇزەگە اسىرىلۋدا. بيىل ناۋرىز، ماۋسىم ايلارىندا جەزقازعان مەن بالقاش قالالارىندا كومپانيا قىزمەتكەرلەرىنە 29 پاتەر وتەۋسىز نەگىزدە بەرىلدى. جىل سوڭىنا دەيىن بالقاش قالاسىندا جۇمىسكەرلەرگە تاعى 152 قىزمەتتىك تۇرعىن ءۇي بەرۋ جوسپارلانۋدا.

الەۋمەتتىك باعدارلامالاردى ىسكە اسىرۋمەن قاتار كومپانيا جۇمىسكەرلەردىڭ ەڭبەك جاعدايىن جاقسارتۋعا جانە وندىرىستىك-تۇرمىستىق ينفراقۇرىلىمدى دامىتۋعا جۇيەلى تۇردە ينۆەستيتسيا سالۋدا. 2026 جىلى الەۋمەتتىك-تۇرمىستىق نىسانداردى جوندەۋ مەن جاڭعىرتۋعا شامامەن 2,4 ملرد تەڭگە قاراستىرىلدى. باعدارلاما اياسىندا «قازاقمىس» توبىنىڭ كاسىپورىندارىندا 83 نىساندى جاڭارتۋ جوسپارلانعان. ولاردىڭ قاتارىندا اكىمشىلىك-تۇرمىستىق كەشەن، جاتاقحانا، جۋىناتىن بولمە، زەرتحانا، باقىلاۋ-وتكىزۋ بەكەتتەرى جانە وندىرىستىك ينفراقۇرىلىمنىڭ وزگە دە نىساندارى بار. اتالعان جوبالاردى ىسكە اسىرۋ قىزمەتكەرلەردىڭ جايلىلىعى مەن قاۋىپسىزدىگىن ارتتىرۋعا، سونداي-اق كومپانيا كاسىپورىندارىندا وندىرىستىك مادەنيەتتى ودان ءارى دامىتۋعا باعىتتالعان.

الەۋمەتتىك قولداۋدىڭ كەشەندى جۇيەسى – «قازاقمىس» توبىنىڭ كورپوراتيۆتىك ساياساتىنىڭ ماڭىزدى قۇرامداس بولىگى. ىسكە اسىرىلىپ جاتقان باعدارلامالار جۇمىسكەرلەردىڭ الەۋمەتتىك قورعالۋ دەڭگەيىن ارتتىرۋعا، وتباسىلاردىڭ ءال-اۋقاتىن نىعايتۋعا جانە كومپانيا قىزمەت ەتەتىن وڭىرلەردىڭ تۇراقتى دامۋىنا ىقپال ەتەدى.

Abai.kz