ءىىم ەلىمىزدە كىمدەر قىلمىستىق جانە اكىمشىلىك امنيستياعا ىلىگۋى مۇمكىن ەكەنىن ءتۇسىندىردى، - دەپ حابارلايدى Polisia.kz. جاڭا كونستيتۋتسيانىڭ قابىلدانۋىنا بايلانىستى مەملەكەت باسشىسى قىلمىستىق جانە اكىمشىلىك امنيستيا جۇرگىزۋدى باستاما ەتتى. قازاقستاننىڭ كونستيتۋتسيالىق دامۋىنىڭ جاڭا كەزەڭى ادىلەتتىلىك، گۋمانيزم جانە ادامنىڭ قادىر-قاسيەتىن قۇرمەتتەۋ قاعيداتتارىن بەكىتىپ، بۇل ەلدىڭ قۇقىقتىق جۇيەسىن ودان ءارى جاڭعىرتۋدىڭ ماڭىزدى نەگىزى بولدى.

امنيستيا قىلمىسقا جۇمساقتىق تانىتۋ ەمەس، مەملەكەتتىك ساياساتتىڭ گۋمانيستىك جانە جاسامپازدىق باعىتىن كورسەتەتىن ەرەكشە قۇقىقتىق اكت. ونىڭ نەگىزگى ماقساتى – قۇقىق بۇزۋشىلىق جاساعان، بىراق قوعامعا ايتارلىقتاي قاۋىپ توندىرمەيتىن ادامداردىڭ الەۋمەتتىك بەيىمدەلۋىنە جاعداي جاساۋ. مەملەكەت مۇنداي ازاماتتاردىڭ قوعامدىق، ەڭبەك جانە ەكونوميكالىق ومىرگە تولىققاندى ورالۋىنا كەدەرگى كەلتىرەتىن قۇقىقتىق جانە قارجىلىق كەدەرگىلەردى ازايتۋدى كوزدەيدى.

پرەزيدەنتتىڭ وسى تاپسىرماسىن ىسكە اسىرۋ ءۇشىن ءماجىلىس دەپۋتاتتارى جەكەلەگەن ساناتتاعى قۇقىق بۇزۋشىلىقتار بويىنشا امنيستيا تۋرالى زاڭ جوباسىن ازىرلەدى. ءىىم باسقا دا مەملەكەتتىك ورگاندارمەن بىرلەسىپ، قۇجات جوباسىن تالقىلاۋ جونىندەگى جۇمىس توپتارىنا بەلسەندى قاتىسۋدا. امنيستيا قىلمىستىق تا، اكىمشىلىك تە قۇقىق بۇزۋشىلىقتارعا قاتىستى. ايتا كەتۋ كەرەك، تاۋەلسىز قازاقستان تاريحىندا اكىمشىلىك امنيستيا العاش رەت وتكىزىلگەلى وتىر.

ءىىم جەلىسى بويىنشا قىلمىستىق امنيستيا قىلمىستىق تەرىس قىلىقتار مەن ونشا اۋىر ەمەس قىلمىستار جاساعان ادامدارعا قولدانىلادى. سونداي-اق ول اۋىرلىعى ورتاشا قىلمىستار ءۇشىن سوتتالعان، زالال كەلتىرىلمەگەن نەمەسە تولىق وتەلگەن جاعدايدا قولدانىلۋى مۇمكىن. ادامداردىڭ جەكەلەگەن ساناتتارى ءۇشىن قىلمىستىڭ اۋىرلىعىنا جانە سوتتالعاننىڭ تارتىبىنە بايلانىستى جازا مەرزىمىن قىسقارتۋ كوزدەلگەن.

ۇسىنىلىپ وتىرعان زاڭ جوباسى گۋمانيزم قاعيداتتارىن جانە زاڭ مەن ءتارتىپ يدەولوگياسىن ۇشتاستىرا وتىرىپ، مەملەكەتتىك ساياساتتىڭ جۇيەلىلىگىن كورسەتەدى.

قازىرگى ۋاقىتتا قۇجات قر پارلامەنتى ءماجىلىسىنىڭ قاراۋىندا.

Abai.kz