Balkhash Tour Fest فەستيۆالىنىڭ ەكىنشى كۇنى كونتسەرتتەر مەن سپورتتىق جارىستاردان ەمەس، تابيعاتقا دەگەن جاناشىرلىقتان باستالدى.

تاڭسارىدەن فەستيۆال قاتىسۋشىلارى بالقاش كولىنىڭ جاعالاۋىن تازالاۋعا شىقتى.

ەكولوگيالىق اكتسياعا قازاقستاندىق ەرىكتىلەرمەن قاتار جەتى ەلدەن كەلگەن قوناقتار دا بەلسەندى قاتىستى. بىرلەسە اتقارىلعان جۇمىس ناتيجەسىندە ولار 30-دان استام قاپ قوقىس جيناپ، كول جاعالاۋىن تازارتتى.

ەكولوگيالىق شارا «تازا قازاقستان» ۇلتتىق باعدارلاماسى اياسىندا ۇيىمداستىرىلدى. بۇل باستاما زاماناۋي ءتۋريزمنىڭ تەك دەمالىس پەن ساياحات قانا ەمەس، سونىمەن بىرگە بارعان جەرىڭنىڭ تابيعاتىنا دەگەن جاۋاپكەرشىلىك ەكەنىن تاعى ءبىر مارتە كورسەتتى.

— تاڭەرتەڭ ەرتە ەكولوگيالىق سەنبىلىككە شىقتىق. بىزبەن بىرگە شەتەلدىك ۆولونتەرلەر دە تازالىق جۇمىستارىنا اتسالىستى. ناتيجەسىندە 30-دان استام قاپ قوقىس جينالدى. قاتىسقانىمىز ءۇشىن فەستيۆالدىڭ ەستەلىك سىيلىقتارىن الدىق، — دەدى قاراعاندى قالاسىنان كەلگەن ۆولونتەر دىنمۇحاممەد مۇقانعالي.

ونىڭ ايتۋىنشا، مۇنداي شارالار ءار ەلدىڭ جاستارىن بىرىكتىرىپ، ورتاق يگى ىستەر ارقىلى جاڭا دوستار مەن پىكىرلەس ادامدار تابۋعا مۇمكىندىك بەرەدى.

ايتا كەتەيىك، Balkhash Tour Fest فەستيۆالىنىڭ ەكىنشى كۇنى كول جاعالاۋىندا جۇزدەگەن قاتىسۋشىنى جينادى. شاراعا بالقاشپەن تانىسىپ قانا قويماي، ونىڭ بىرەگەي تابيعاتىن ساقتاۋعا ءوز ۇلەسىن قوسۋعا نيەتتى جەتى ەلدىڭ ۆولونتەرلەرى قاتىسۋدا.

Abai.kz