وقۋ-جاتتىعۋ كەزىندە يندۋستريالىق پارك اۋماعىندا قوزعالىسقا ۋاقىتشا شەكتەۋ قويىلادى.

 21 ماۋسىم كۇنى استانادا كۇزەتىلەتىن تۇلعالاردىڭ قاۋىپسىزدىگىن قامتاماسىز ەتۋگە باعىتتالعان ۆەدومستۆوارالىق كەشەندى ارنايى-تاكتيكالىق وقۋ-جاتتىعۋ وتەدى.

بۇل تۋرالى قازاقستان رەسپۋبليكاسىنىڭ مەملەكەتتىك كۇزەت قىزمەتىنىڭ ءباسپاسوز قىزمەتى مالىمدەدى.

ءىس-شارا ساعات 08:00-دەن 15:00-گە دەيىن ەلورداداعى №1 يندۋستريالىق پارك اۋماعىندا ۇيىمداستىرىلادى.

وقۋ-جاتتىعۋ بارىسىندا يندۋستريالىق پارك اۋماعىندا اۆتوكولىكتەر مەن جاياۋ جۇرگىنشىلەر قوزعالىسىنا ۋاقىتشا شەكتەۋ ەنگىزىلەدى.

«وسىعان بايلانىستى قالا تۇرعىندارى مەن قوناقتارىنان وتكىزىلىپ جاتقان ءىس-شاراعا تۇسىنىستىكپەن قاراۋ، قۇقىق قورعاۋ ورگاندارى قىزمەتكەرلەرىنىڭ زاڭدى تالاپتارىن ورىنداۋ، تەك رەسمي اقپارات كوزدەرىنە سەنۋ جانە جالعان اقپارات تاراتپاۋ سۇرالادى»، - دەلىنگەن حابارلامادا.

جاتتىعۋدىڭ ماقساتى – كۇزەتىلەتىن تۇلعالاردىڭ قاۋىپسىزدىگىن قامتاماسىز ەتۋ جونىندەگى كۇشتەر مەن قۇرالداردىڭ ءوزارا ءىس-قيمىلىن پىسىقتاۋ.

Abai.kz